Den Bibel, Inhoudende dat Oude ende Nieuwe Testament (Biestkensbijbel)

¶ Dat. I. Capittel.

1

⁺ MAer den Brief luyde also: De groote Coninck Artaxerxes^† van India, tot aen Morenlant, ontbiet de hondert ende seuenentwintich Vorsten, met den Onderdanen, zijne groete.

+ A vers 1

† 1.Hest. 1.a.1. 2.Hest. 5.a.2.

2

Hoe wel ick een machtich Coninc ben, ende de grootste Heere op Aerden^* so en hebbe ick my nochtans mijns ghewelts niet willen verheffen, maer my beneersticht genadichlijc, ende saechtmoedich te regeren, ende den lieuen vrede, dies hem een yeghelijck verhuecht, te behouden, Op dat een yeghelijck gherustelijck leuen, ende zijne hanteringe drijuen mochte.

* Iudit. 1.b.8. 1.Mac. 1.a.6.

3

Daer na hiel ick met mijne Vorsten eenen Raedt, hoe dat sulcx gheschieden mochte.⁺ Doen gaf my Haman, mijn aldercloecste, liefste, ende ghetrouste Raet, die naest den Coninck de hoochste is, te kennen:

+ B vers 3

4

^† Hoe dat daer een volc is, dat in allen Landen verstroyt, bysonderlijcke wetten hout, teghen alle Landen ende Lieden maniere, ende altijt des Conincx gebodt veracht, daer door sy vrede ende eenicheyt int Rijcke beletten.

† 1.Hest. 3.b.8.

5

Als wy nv sulcx vernomen hebben, dat hem een eenich volck tegen de geheele Werelt set, ende zijn eygen maniere hout, ende onse geboden ongehoorsaem is, daer door sy groote schade doen, ende vrede, ende eenicheyt in ons Rijck verhinderen:

6

So beuelen wy, dat alle die, die Haman de Ouerste Vorst, ende de hoochste naest den Coninc, onse Vader, vernemen can, met vrouwen ende kinderen door hare vianden sweert sonder alle bermherticheyt gedoot, ende niemant gespaert en werde. Ende dat op den veerthienden dach der twelfster Maent Adar, in dit Iaer:

7

Op dat de ongehoorsamen altemael op eenen dach verslaghen werden, ende eenen duerenden vrede, in onsen Rijcke blijuen mach.