Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ Vander trouwe Simons, ende zijn sonen, ende hoe hem Ptolomeus verradelijck ter doot bracht ende dat Lant verriet.

1

⁺ DAerom tooch^* Ioannes van Gaza op, tot sinen Vader Simon, ende seyde hem aen: Dat Cendebeus hem int lant gheuallen was, ende hadde schade ghedaen.

+ A vers 1

* 1.Ma. 16.c.19

2

Doen liet Simon zijn twee Outste Sonen voor hem comen Iudam ende Iohannem, ende sprac tot haer: Ick ende mijne broederen, ende mijns vaders huys, hebben van iuecht op, tot op desen tijt, Crijch gheuoert, teghen de vianden des volcx Israels,^† Ende Godt heeft ons gheluck ghegheuen, soo dat Israel menichmael door onse handen verlost is.

† 1.Mach. 13.f.47.

3

Maer nademael ick nv out ende swack ben, soo sult ghy in mijne ende mijnder broederen stede treden, ende sult wt trecken, ende voor v volck strijden. Godt moet v, vanden Hemel helpen, ende by v zijn.

4

Ende hy liet int Landt aennemen twintich duysent Mannen, ende sommige Ruyters. Met desen Hoop, togen Iohannes ende Iudas teghen Cendebeum, ende lagen dien nacht ouer te Modin.

5

Maer des morghens, doense van Modin int vlacke velt quamen, so trock daer een groot Heyr te voet ende te Peerde teghen hen daer henen. So was daer nv een Beecke tusscen beyde de Heyren.

6

Doen trock Iohannes aen de beecke, ende weynde hem teghen de vianden.⁺ Maer als hi sach, dat haer dat volc daer voor ontsach haer int water te gheuen, so waechde hijt eerst daer in [te treden] ende quam ouer dat water. Als den hoop dit sach, soo volchdense hem na.

+ B vers 6

7

Daer na maecte Iohannes sine ordeninghe tot den Slach, ende ordineerde de Ruyters by dat voetvolc. Mer de vianden hadden eenen veel machtigeren Ruyters Tocht.

8

Maer als Iohannes de Trompetten liet op blasen, met der Priesters Basuynen, ende de vianden aengreep: Soo gaf Cendebeus de vlucht met zijn Heyr, ende daer werdender veel gewont ende doorsteken. Maer de Ouerghebleuen vloden in een vaste Stercte.

9

In desen Slach wert Iudas Iohannes broeder oock ghewont. Maer Iohannes iaechde de vianden na, tot aen de Stercte^† Cedron.

† 1.Mach. 15.f.40.

10

Ende de vianden vloden op de Stercten, op dat Landt by Azod. Doen verbrande Iohannes de selue Stercten, so dat van de vianden by twee duysent doot bleuen. Daer nae tooch Iohannes weder nae huys, int Lant Iuda met vrede.

11

Maer daer was een Hooftman ouer dat lant Iericho, genaemt Ptolomeus, de sone Abobi, die was seer rijck.

12

Ende de hooghe Priester Simon, hadde hem een Dochter ghegeuen.

13

Daerom was

[p. 144r]

hy stout, ende stond daer nae, dat hy een Heer int Lant [mochte] werden, ende nam voor hem Simon ende sine Sonen, met list te dooden.

14

Als nv Simon int Lant Iuda rontsom trock om de Regimenten te besien, ende te bestellen: Ende tot Iericho quam met twee sonen, Matathia ende Iuda, int hondert ende seuenentseuentichste Iare, in de elfste maent die ghenoemt werdt Sabath.

15

Doen ontfinckse de sone Abobi, op sine Borcht, welck ghenoemt wert Doch, ende rechte hem een heerlijcke maeltijt aen. Maer ten was niet dan bedroch, want hy verborch daer heymelijc Crijchsvolck op.

16

^† Ende als Simon ende zijn Sonen vrolijck waren, ende wel ghedroncken hadden, so maecte hem Ptolomeus op, met zijn knechten, ende namen hare wapenen, ende vielen tot Simon in daerse saten, ende sloeghen hem met zijn twee sonen ende knechten doot.

† 2.Reg. 13.f.28

17

Dese schandelijcke ontrouwe dede Ptolomeus in Israel: Ende bewees hem sulcke boosheyt voor sine weldaet.

18

Daer nae schreef hy sulcx den Coninc Antiocho, ende badt, dat hy hem Crijchsvolck te hulpen seynden wilde, om dat Landt ende de Steden met alle [hare] toebehoorten in te nemen.

19

⁺ Hy seynde ooc eenen Hoop na Gaza, om^† Iohannem doot te slaen. Ende schreef aen de Hooftlieden, datse tot hem comen souden, soo wilde hy haer groote Besoldinghe ende gheschencken gheuen.

+ C vers 19

† 1.Mac. 16.a.1

20

Oock seynde hi Crijchsvolc wt om Ierusalem ende dat Heylichdom in te nemen.

21

Maer een Bode quam te voren tot Gaza, die seyde Iohanni, dat zijn vader ende sine broeders doot gheslaghen waren, ende dattet bestelt was, datmen hem oock dootslaen soude.

22

Doen Iohannes sulcx hoorde, ontsette hy hem seer, ende liet de Lieden vanghen, de welcke wtgesonden waren om hem te dooden. Ende doen hy vernam, datse hem wilden vermoort hebben, soo liet hyse dooden.

23

Maer wat Iohannes daer nae meer ghedaen heeft, ende de Crijghen die hy gheuoert heeft, ende hoe hy gheregeert ende ghetimmert heeft:

24

Dat is altemael beschreuen in een bysonder boeck, van de tijt zijns Regiments, soo langhe als hy, nae sinen vader, hooghe Priester geweest is.

¶ Eynde des eersten Boecx der Machabeen.