Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ Eenen troost totten volcke, van des goedertierenheyts weghen, die haer God loouen sal. Ende van de roepinghe der Heydenen.

1

⁺ SIet rontsom v Ierusalem na dat Oosten, ende siet den troost die v van God coemt.

+ A vers 1

2

Siet dijne kinderen, die wech gheuoert zijn, comen, Iae si comen vergadert,^† beyde vant Oosten ende vant Westen, door dat woort des Heyligen: Ende beroemen Gods eere.

† Esaie. 43.a.5. Matth. 8.b.11 Luce. 13.c.27.

3

Trect wt Ierusalem v truercleedt, ende treckt aen dat heerlijcke Cieraet van Godt eewichlijck.

4

^* Treckt aen den Rock der gherechticheyt Godts, ende sedt de Croone der heerlijcheyt des Eewighen, op dijn hooft.

* Ecclesi. 6.d.32 27.b.11.

5

Want Godt sal dijne heerlijcheydt onder den gheheelen Hemel openbaren.

6

Wandt uwen name sal van God genoemt werden eewichlijc, vrede,

[p. 130v]

gherechticheyt, prijs ende Godsalicheyt.

7

^+* Maect v op Ierusalem, ende treckt op de hoochte, ende^† siet rontsom v, nae het Oosten, ende siet uwe kinderen, die beyde vanden opganc der Sonnen, ende vanden nederganck, vergadert zijn, door dat woort des Heyligen, ende verblijden haer, dat Godt haerder weder ghedachtich is geweest.

+ B vers 7

* Esai. 51.d.17. 52.a.2.

† Esa. 60.a.4

8

Sy zijn te voete van v, door de vianden wech gheuoert, Maer Godt brengtse tot v verheuen met eeren, als kinderen des Rijcx.

9

^* Want God wil alle hooge bergen vernederen, ende de hooge steenrootsen, ende de dalen, ghelijcx den Lande toe vullen: Op dat Israel sekerlijc mach wandelen, ende God prijsen.

* Esaie. 2.b.11. 40.a.4. Luce. 3.a.5.

10

Maer de Bosschagien, ende alle welrieckende boomen, sullen Israel, wt Godts beuel schaduwe geuen:

11

Want Godt sal Israel wederom brengen met blijscappen, door sinen heerlijcken Troost, met bermherticheyt ende sine gherechticheyt.