Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Een claghe ende vermaninge totten volcke Israels, dat zijt souden ter herten nemen, ende lijdtsaem souden zijn.

1

⁺ HEbt eenen goeden moet mijn volc, ghy prijs Israels.

+ A vers 1

2

^† Ghy zijt den Heydenen vercocht, niet tot verderffenisse, Maer daerom dat ghy Godt vertoornt hebt, zijt ghy uwen vianden ouer ghegheuen.

† 4.Re. 17.d.18 25.

3

Want ghy hebt den ghenen, die v geschapen heeft vertoornt, daer mede, dat ghi niet God,^† maer den duyuelen gheoffert hebt.

† Deut. 32.c.17. Psal. 106.e.37

4

Ghy hebt vergheten den eewighen Godt, die v gheschapen heeft, Ende Ierusalem die v op gheuoet heeft, die hebt ghy bedroeft.

5

Wandt si heeft ghesien den Toorne Gods, die ouer v comen soude, ende gheseyt: Hoort toe ghy inwoonders Sion, God heeft my groot leet toe ghesonden,

6

⁺ Want ick heb ghesien de gheuanckenisse mijnre Sonen ende Dochteren, welcke de Eewighe ouer haer gebracht heeft.

+ B vers 6

7

^† Ic hebse met vruechden opgheuoet, maer met weenen ende herten leedt heb icse sien wech voeren.

† 4.Esd. 2.a.3.

8

Niemant en verblijde hem ouer my, dat ick een Weduwe, ende van vele verlaten ben. Ick ben tot een woestijne ghemaect, om de Sonde wille mijnder kinderen: Want si zijn van de Wet Godts af gheweken,

9

Ende en hebben zijne Rechten niet bekent. Sy en hebben niet lief ghehadt na Godts beuel, ende en hebben sine gheboden niet ghehouden.

10

Coemt herwaerts ghy Inwoonders Sion, ende vercondicht de gheuanckenisse mijnder Sonen ende Dochteren, welcke de Eewighe ouer haer ghebracht heeft.

11

^+† Want hy heeft ouer haer gebracht een volc van verre, een grouwelijc volc, ende een onbekende Sprake.

+ C vers 11

† Deu. 28.e.49 Ierem. 5.c.15.

12

Die haer niet en ontsien voor de Ouden, noch haerder kinderen ontfermen. Die selue hebben wech gheuoert de beminde [Soons] der weduwen, ende de Eensame van haren Dochteren berooft.

13

Maer hoe can ick v doch helpen?

14

Wat die dit ongeluck ouer v ghebracht heeft, die sal v van uwer Vianden hant verlossen.

15

Treckt henen ghy lieue kinderen, treckt henen, Maer ick ben verlaten alleene.

16

Ic heb mijn vruechden cleet wt ghetoghen. Ick wil roepen tot den Alderhoochsten, altijt ende eewichlijck.

17

Hebt eenen goeden moet, kinderen^† roept tot God, so sal hy v verlossen, van dat gewelt ende hant der vianden.

† Deut. 4.c.29. 30.a.2. Psal. 130.a.1.

18

⁺ Want ick nv al hope, dat de Eewige v helpen sal. Ende ick sal vruechde hebben vanden Heyligen, om der bermherticheyt wille, die v haestelijck gheschieden sal, van onsen eewighen Salichmaker.

+ D vers 18

19

^† Ic heb v laten trecken met trueren ende weenen, Maer Godt sal v my weder geuen, met ghenuechte ende vruechde eewichlijck.

† Psal. 126.a.5.

20

Ende ghelijck als de Inwoonders Sion, nv ghesien hebben uwe gheuanckenisse, Alsoo sullen si oock terstont sien, de verlossinghe van uwen Godt, welcke ouer v comen sal, met groote heerlijcheyt ende eewighen troost.

21

^* Ghy kinderen lijdt verduldelijc den toorne, die van God ouer v coemt. Want v Viant heeft v veruolcht, ende ghy sult gheringhe sien zijn verderffenisse, ende op hare halsen sult ghy treden.

* 2.Re. 16.b.10.

22

Mijne teere [kinderen] moesten gaen op eenen quaden wech. Sy zijn wech gheuoert ghelijck als een Cudde [beesten] van de Vianden gherooft.

23

Hebt eenen goeden moet, ghy kinderen, ende roept tot Godt: Wandt die v wech heeft laten voeren, die en sal uwer niet vergheten,

24

⁺ Want^† ghelijc als ghi neerstich gheweest zijt van Godt af te wijcken,^* Alsoo bekeert v nv, ende zijt thien mael meer neerstigher, den HEERE te soecken.

+ E vers 24

† Roma. 6.c.19

* Esaie. 55.b.7.

25

Want die ouer v dese straffe heeft laten gaen, die sal v helpen, ende eewighe vruechde brenghen.

26

Ierusalem hebt eenen goeden moet, want die sal v troosten, daer ghy na genoemt zijt.

27

^† Onsalich moeten sy zijn, die v gheplaecht, leedt ghedaen, ende haer ouer uwen val verblijt hebben.

† Ierem. 50.b.9 c.15.

28

Onsalich moeten zijn de Steden, den welcken dijne kinderen ghedient hebben. Ende onsalich moetse zijn, die dijne kinderen gheuanghen hout.

29

Want ghelijck si haer ouer uwen val verhuecht, ende haer ouer uwe verderffenisse verblijdt heeft, Also salse bedroeft zijn, als si verwoest wort.

30

Ende ick wil hare macht wech nemen, daer si haer op verlieten, ende haren hoomoet in claghen veranderen:

31

^† Want een vier sal ouer haer comen vanden Eewigen, veel daghen lanck, ende de Duyuelen sullen haer wooninge in haer hebben, langhen tijt.

† Iob. 20.d.26. Esaie. 30.f.33. 66.d.24.