Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Een hertelijck aenroepen ende bidden tot Godt inder gheuanckenissen, ende een vermaninghe totten volcke om beteringhe ende bekeeringhe.

1

⁺ ALmachtighe HEEre, ghy Godt Israels, in desen grooten angst ende noot, roep ick tot v,

+ A vers 1

2

Hoort ende zijt genadich HEEre, want wy hebben teghen v ghesondicht.

3

Ghy regeret in eewicheyt, maer wy vergaen altijt.

4

Almachtighe HEEre ghy Godt Israels, hoort nv dat ghebet Israels, die de doot in den hals steken, ende dat ghebet der genen, die haer aen v besondicht hebben, ende die de stemme des HEEREN haers Gods niet gehoort en hebben. Daerom is oock de straffe altijt achter ons gheweest.

5

En ghedenckt niet de misdaet onser Vaderen, maer weest nv gedachtich aen dijne hant, ende aen uwen Name,

6

Want ghy HEERE zijt doch onsen Godt, so willen wy HEERE v louen.

7

Want daerom hebt ghi dijn vreese in onse herte gegeuen, dat wy uwen Naem aenroepen, ende v in onse gheuanckenisse louen souden. Wandt alle misdaet onser vaderen, die voor v ghesondicht hebben, gaet ons ter herten,

8

Wy die nv zijn in onse gheuanckenisse, daer ghy ons henen verstooten hebt, tot een versmaetheydt, tot vermaledijdinghe ende grouwel, om alle misdaet wille onser vaderen, die vanden HEERE haren Godt af gheweken zijn.

9

⁺ Hoort Israel de geboden des leuens, merct neerstich daer op, ende behoutse wel.

+ B vers 9

10

Hoe comet Israel, dat ghy inder Heydenen landt versmacht? Dat ghy in een vreemt Landt zijt?

11

Dat ghy v veronreynicht onder de dooden? Dat ghy onder die gherekent zijt, die in de Helle varen?

12

^* Dat is de oorsake, dat ghi de^† Fonteyne der wijsheyt verlaten hebt.

* Ierem. 2.c.16.

† Iere. 2.b.10.

13

Waert ghy op Gods wegen ghebleuen, so hadt ghy wel altijt in vrede ghewoont.

14

So leert nv rechte wijsheyt, op dat ghy muecht weten, wie die is, die een lanc leuen, goeden, vrede ende blijschap geeft.

15

Wie weet waer si woont? Wie is in haer camer geweest?

16

Waer zijn de Vorsten der Heydenen, die ouer de wilde beesten opter Aerden heerscappen?

17

⁺ Die daer spelen metten voghelen des Hemels?^† Die siluer ende gout vergaderen, daer de Menschen haer betrouwen op setten,^* ende en connen dies nimmermeer sat werden?

+ C vers 17

† Esaie. 2.b.7.

* Ecclesi. 5.b.9.

18

(Want si vergaderen gelt, ende zijn neerstich daer op, ende is doch altemael om niet)

19

Sy zijn wtgheroeyt, ende in de Helle gheuaren, ende andere zijn in haer stede ghecomen.

20

De Nacomelinghen sien dat Licht wel, ende woonen op dat Aertrijc, ende en vinden doch den wech niet, daermen de wijsheyt vint,

21

Want si verachten die. Daer toe hare kinderen, zijn oock verdoolt ghegaen.

22

In Canaan en hoortmen niet van haer, tot Theman en sietmen haer niet.

23

⁺ De kinderen Hagar ondersoecken wel na de Aertsche wijsheyt. Desghelijcx de Cooplieden van Meran, ende die van Theman, die haer duncken laten cloec te zijn. Maer si en raken nochtans den wech niet, daermen de wijsheyt vint.

+ D vers 23

24

O Israel, hoe heerlijck is dat huys des HEEren?^† Hoe wijt ende groot is de plaetse zijnder wooninghe?

† Deut. 4.f.39. Ier. 23.d.24. Psal. 145.a.3

25

Sy en heeft geen eynde, ende is onmetelijc hooch.

26

Daer waren in voortijden^* Ruesen, groote beroemde Lieden, ende beuaren Crijchslieden,

* Gen. 6.a.4.

27

Die selue en heeft de HEEre niet wtuercoren, noch oock den seluen den wech der bekentenisse niet gheopenbaert.

28

Ende nademael sy de wijsheyt niet en hadden, soo zijn si vergaen in hare dwaesheyt.

29

⁺ Wie is ten Hemel op geuaren, ende heeft die gehaelt, ende wt de wolcken af gebracht?

+ E vers 29

30

Wie heeft ouer de zee gheuaren, ende heeftse gheuonden, ende om costelijck gout herwaerts ghebracht.

31

Summa, daer en is niemant die den wech weet daermen de wijsheyt vint.

32

Maer die alle dinck weet, die kentse, ende heeftse door zijn verstant gheuonden.^* Die dat Aertrijc geschapen heeft vant beghinne, ende dat veruult met alderley dieren.

* Genesis. 1.

33

Die dat Licht laet op gaen, ende als hijt weder roept,^† so moetet hem gehoorsaem zijn.

† Iosue. 10.c.13. Esaie. 38.b.8. Eccle. 46.a.5

34

De Sterren schijnen in hare ordeninge met vruechden, ende als hijse voor roept, soo antwoordense:

35

Hier zijn wy, ende lichten met vruechden om des gheens wille diese gheschapen heeft.

36

Dat is onse Godt,^* ende niemant en is by hem te ghelijcken.

* Esai. 44.b.7 Ierem. 10.a.6 49.c.19.

37

Die heeft de wijsheyt gheuonden, ende heeftse ghegheuen Iacob sinen dienaer, ende Israel sinen beminden.

38

^† Daer na is hy op ter Aerden ghesien, ende heeft by den Menschen ghewoont.

† Ioan. 1.b.14. 1.Ioan. 1.a.1. 1.Tim. 3.b.15.

[p. 130r]

39

Dese wijsheydt is dat Boeck van de geboden Godts,^† ende van de Wet die eewich is,^* Alle diet houden, die sullen leuen. Maer diet ouertreden, die sullen steruen.

† Esaie. 40.a.8 Math. 5.b.18 24.c.35. Psal. 33.a.4. 1.Petri. 1.c.25

* Leuit. 18.a.5 Ezech. 20.b.13 Roma. 10.a.5

40

Keert v daer wederom toe Israel, ende nemet aen, Wandelt alsulcken Licht na, dat v verlichtet.

41

En gheeft dijne Eere eenen anderen niet ouer, ende dijne weerdicheyt, een vreemt volck.

42

^‡ O salich zijn wy Israel, want Godt heeft ons sinen wille gheopenbaert.

‡ Deut. 33.c.29