Den Bibel, Inhoudende dat Oude ende Nieuwe Testament (Biestkensbijbel)

¶ Dat .Lj. Capittel.

Een ghebet Iesu des soons Syrach.

1

⁺ ICk^† dancke v HEERE Coninck, ende loue v, Godt^* mijnen Heylandt. Ick dancke uwen Naem,

+ A vers 1

† Psalm. 111.a.2 138.a.1.

* Luce. 1.d.43

2

Dat ghy mijn Beschermer ende hulpe zijt, ende mijn lichaem wt de verderffenisse, ende vanden strick der valscher tonghen ende lueghenmonden verlost hebt:

3

Ende hebt my gheholpen teghen de vianden, ende hebt my verlost, nae uwe groote ende hooghe ghepresen bermherticheyt.

4

Van dat brullen der ghener, die my verslinden wilden,

5

Wt de hant der gheender, die my na tleuen stonden, Wt veel tribulatien daer ick in lach,

6

Wt den brandt die my omuangen hadde,^† Midden wt den viere dat ic daer in niet en verbrande,

† Danielis. 3. Esai. 43.a.2.

7

Wt den diepen monde der Hellen, Van de valsche Clappers ende Lueghenaers voor den Coninck, Ende van onrecht ordeel.

8

9

Ick was den doode heel naby, ende mijn leuen was bycans ter Hellen ghesoncken.

10

⁺ Ick was omringt, ende niemant en hielp my: Ic sochte hulpe byden menschen, ende ick en vant gheene.

+ B vers 10

11

12

Doen dacht ick HEERE op uwe bermherticheyt, ende hoe ghy altijt gheholpen hebt:

13

^† Wandt ghy beschermt alle die op v verwachten, ende verlostse wt de handen der Heydenen.

† 3.Mac. 8.198. Esai. 37.g.36.

14

Ick badt tot God tegen haer raserie, ende smeecte om verlossinghe vander doot, ende riep den HEEre mijnen Vader ende Heerschapper aen, dat hy my niet en verliet inden noot, ende als de stoute pochten, ende ick gheen hulpe en hadde.

15

Ick loue uwen Naem sonder ophouden, ende ick prijse ende dancke v, want mijn ghebet is verhoort,

16

Ende ghy hebt my verlost wt de verderffenisse, ende van alle quaet:

17

Daerom wil ick v HEERE dancken, ende louen, ende uwen Naem prijsen.

18

⁺ Doen ick noch ionck was, eer ic verleyt wert, sochte ick de wijsheydt sonder schouwen, met mijnen ghebede:

+ C vers 18

19

Ick badt daerom inden Tempel, ende wilse tot in mijn eynde soecken.

20

Mijn herte verblijt hem ouer haer, ghelijck als wanneer de druyuen rijpen.

21

Ic ghinc stracx tot haer, ende vernam van mijnder ioncheyt aen, na haer,

22

Ic hoorde na haer, ende namse aen. Doen leerde ick wel, ende nam seer toe door haer:

23

Daerom dancke ick dien,^* die my wijsheyt gaf.

* Prouer. 2.a.6

24

Ick nam voor my daer nae te doene, ende my te beneerstigen des goets, ende ick en werdt daer door niet tot schanden.

25

26

Ick worstelde na haer van herten, ende

[p. 128v]

was neerstich om daer na te doene.

27

Ic hief mijn handen op ten Hemel, doen wert mijn siele verlicht door de wijsheyt, dat ick mijn dwaesheyt bekende.

28

Ic stont met ernste na haer, si ende ick werden een herte vanden beginne, ende vantse reyn.

29

Daerom en sal ick niet verworpen worden. Mijn herte verlangde na haer, ende ick creech eenen goeden Schat:

30

De HEERE heeft my door haer een^† nieuwe tonghe ghegheuen, daer mede wil ick hem louen.

† Marc. 16.c.17

31

Maect v herwaerts tot my, ghy onbesochte, ende coemt tot my in de schole,

32

Ende wat v van noode is, dat cont ghy leeren, wandt ghy zijt ghewisselijck seer dorstich.

33

⁺ Ick hebbe mijnen mont open ghedaen ende gheleert: Denckt nv,^* ende coopt wijsheyt voor v, ter tijt dat ghyse sonder ghelt hebben cont,

+ D vers 33

* Esaie. 55.a.1.

34

^† Ende begheeft uwen hals onder haer iock, ende laet v onderwijsen. Men vintse nv nae by.

† Eccli. 6.d.26 Math. 11.c.29

35

Siet my aen,^‡ Ick heb eenen cleynen tijt moeyte ende arbeyt ghehadt, ende hebbe grooten troost gheuonden.

‡ Eccli. 6.c.20.

36

Neemt de leeringhe aen, ghelijc eenen grooten schat siluers, ende behoutse ghelijck eenen grooten hoop gouts.

37

Verblijt v der bermherticheyt Gods, ende en schaemt v zijns lofs niet.

38

Doet wat v gheboden is, de wijle dat ghy den tijt hebt, soo sal hijt v wel beloonen, tot zijnder tijt.

¶ Eynde des Boecx Iesu des soons Syrach.