Den Bibel, Inhoudende dat Oude ende Nieuwe Testament (Biestkensbijbel)

¶ Dat .L. Capittel.

¶ Dat Lof Simeons des soons Onie.

1

⁺ SImon de sone^* Onie, de hooge Priester, die tot zijnder tijt rontom dat huys ganghen timmerde, ende Pilaernen daer aen sette,

+ A vers 1

* 3.Mach. c.38. 2.Mac. 3. 4.

2

Ende den gront noch eens soo hooghe op muerde, ende den omganck bouen aen den Tempel wederom maecte.

3

Tot zijnder tijt was de Fonteyne veruallen, die maecte hy vast met Coper.

4

Hy sorchde voor de schade zijns volcx, ende maecte de stadt sterck, teghen de Vianden.

5

Hy dede een louelijck werck, dat hy dat volck weder in rechter ordinancie brachte. Als hy wt den voorhanck voort ghinck,

6

So blincte hy ghelijc de morgensterre, door de wolcken, ghelijck de volle Mane,

7

Ghelijck

[p. 128r]

als de Sonne schijnt, op den Tempel des Alderhoochsten: Ghelijck den Regenboghe met zijn schoone verwen,

8

Ghelijc een schoone Roose inden Mey, ghelijck de Lelien aent water. Ghelijck den wieroocboom inden Meye,

9

10

Ghelijck ontsteken wieroock int wieroocuat, ghelijck een gulden Iuweel met alderley edel gesteente verciert,

11

Ghelijc eenen vruchtbaren Olijfboom, ende ghelijc den alderhoochsten Cypressen boom.

12

⁺ Als hy den schoonen langhen Rock aen dede, ende de gheheele verchieringhe aen trac, ende tot den heyligen Altaer tradt, so vercierde hy dat geheele Heylichdom rontsom.

+ B vers 12

13

Maer als hy wt der Priesteren handen de offerstucken nam, ende byden viere stont, dat op den Altaer brande, so stonden zijn broeders rontom hem, ghelijck als de Cederen op den Libano gheplant, ende omringden hem ghelijck de Palmtacken.

14

Ende alle de kinderen Aarons in haer verchieringhe, ende hadden des HEEREN offer in haren handen, voor de gheheele ghemeynte Israels.

15

Ende hy rechte sinen dienst wt, op den Altaer, ende dede also den Alderhoochsten, den Almachtigen, eenen schoonen offer.

16

17

Hy stack zijn hant wt met den Drancoffer, ende offerde den rooden wijn, ende goot dien aen den bodem des Altaers, tot eenen soeten rueck, den Alderhoochsten, die alder Coninck is.

18

⁺ Soo riepen de kinderen Aarons luyde, ende bliesen met trompetten, ende maecten groot gheluyt, op dat haerder ghedacht werde voor den Alderhoochsten.

+ C vers 18

19

Soo viel alsoo haestelijck dat volck met malcanderen ter Aerden, op haer aensicht, ende baden den HEEre, haren Almachtighen Alderhoochsten Godt aen.

20

Ende de Sangers loofden hem met Psalmen, ende dat gheheele huys clanc, vanden soeten gheschalle.

21

Ende dat volck badt tot den HEEre den Alderhoochsten, dat hy ghenadich zijn wilde, tot dat den Godts dienst wt was, ende dat si haren dienst voleynt hadden.

22

Ende als hy dan weder af ghinck, so stack hy zijn handt wt, ouer de gheheele ghemeynte der kinderen Israels, ende gaf haer de benedictie des HEEren met sinen monde, ende wenschte haer Heyl in sinen Naem.

23

So baden si wederom, ende namen de benedictie aen, vanden Alderhoochsten, ende spraken:

24

Nv danct alle Gode, die groote dinghen doet, aen allen eynden. Die ons van Moeders lichaem af leuendich behout, ende doet ons alle goet.

25

Hy gheue ons een vrolijck herte, ende verleene altijts vrede, tot onser tijt in Israel,

26

Ende dat sine ghenade altijts by ons blijue, ende ons verlosse, alsoo langhe als wy leuen.

27

⁺ Tweederley volc ben ick van herten viant, maer dat derde hate ic so seer als eenich:

+ D vers 27

28

Den Samaritanen, den Philistijnen, ende den dullen volcke te Sichem.

29

Dese leeringhe ende wijsheydt heeft Iesus de sone Syrach van Ierusalem, in dit Boeck gheschreuen, ende wt zijnder herten, sulcke leeringe voortgebracht.

30

^† Wel dien, die hem seluen hier in oeffent, ende wiet ter herten neemt, die sal wijs worden,

† Psalm. 1.a.2.

31

Ende ist dat hy daer nae doet, soo sal hy tot alle dingen gheschict zijn, wandt des HEEREN licht leyt hem.