Den Bibel, Inhoudende dat Oude ende Nieuwe Testament (Biestkensbijbel)

¶ Dat .xlv. Capittel.

¶ Vanden getrouwen ende redelijcken Helden Mose. Van Aaron sinen broeder ende der stammen Leui: Wt welc den Priesterdom gecoren wort. Van de chieragie ende cleedinge des ouersten Priesters, ende de ordinancie des Priesterdoms, ende de offerhande. Van de straffinghe Dathans, Abirams, ende Chore de muytmakers. Vanden getrouwen Helde Pinehas, ende van sinen mannelijcken daet.

1

⁺ HI heeft van hem laten comen, den heylighen Man^* Mosen, die alder werelt lief ende weert was, ende dien beyde Godt ende de menschen gonstich waren,

+ A vers 1

* Exodi. 11.a.3. Acto. 7.e.35.

2

Diens naem hooge ghepresen wort. Hy heeft hem oock gheeert, ghelijck de heylighe Vaders, ende hooge verheuen, so dat de Vianden hem vreesen moesten, ende liet hem met woorden^† veel teeckenen doen.

† Exo. 7. 8. 9. 10

3

Hy maecte hem heerlijck voor den Coninghen, ende gaf hem beuel aen zijn volc, ende toonde hem zijn heerlijcheyt.

4

Hy heeft hem wtuercoren tot eenen heyligen staet,^† om zijnder trouwe ende saechtmoedicheyts wille, ende wt alle menschen vercoren.

† Num. 12.a.3.b.7. Hebre. 3.a.5.

5

Hy liet hem zijn Stemme hooren, ende voerde hem inde duyster Wolcken.

6

Hy^† heeft hem tegenwoordich de geboden ghegeuen, te weten, de Wet des Leuens ende der Wijsheyt, op dat hy Iacob soude zijn verbont leeren, ende Israel sine Rechten.

† Exodi. 19. 20.

7

⁺ Hy heeft^† Aaron sinen Broeder, wt den seluen Stamme Leui ooc verhoocht, ende hem ghelijck wtuercoren.

+ B vers 7

† Exod. 4.c.14

8

^* Hy maecte een eewich verbont met hem, ende gaf hem dat Priesterdom inden volcke.^† Hy heeft hem eerlijck ende schoone ghecleedt, ende dede hem eenen heerlijcken Rock aen,

* Exod. 28.a.1.

† Exod. 28.a.2.

9

Ende trac hem alderley verchieringhe aen. Hy vercierde hem met costelijcke cieragie: Ende trock hem aen dat^† nedercleedt, den langhen Rock, ende den Lijfrock.

† Broecke.

10

11

Ende hinc veel gulden Bellekens ende knoopen, rontom aen hem, om dattet clincken soude, als hy wt ende in ghinck, ende dat tgheclanck int Heylichdom gehoort soude werden, op dat daer mede zijns volcks voor Godt ghedacht soude worden.

12

Iae, den heylighen Rock met goude,

[p. 126v]

gheelder zijden ende scharlaken ghestict, dat machtschildeken op de borst,^† met den LICHTE ende RECHT,

† Exod. 28.e.30.

13

Constelijcke ghewracht, met den edelen steenen, daer de namen der twaelf Stammen Israels in ghegroeft,

14

Ende in gout vast gemaect waren, door den steensnijder, op dat haerder gedacht werde voor Gode. De gouden plate des voorhoofts aenden Hoede, daer in de heylicheyt gegroeft was, dwelck alle heerlijck, costelijck, lieuelijck ende schoon was:

15

16

Men heeft dies ghelijcke voor hem noyt ghesien.⁺ Oock en moestse niemandt anders aentrecken, dan alleene zijn kinderen, ende kints kinderen voort ende voort.

+ C vers 16

17

Sijne offerhanden werden des daechs tweemael volbracht.

18

Moses vulde hem de handen,^† ende salfde hem met de heylighe Olie.

† Leuit. 8.b.12. Exod. 30.d.30

19

Met hem wert dat verbont gemaect, dat hy ende zijn sonen eewelijck, also langhe als de daghen des Hemels waren, hem dienen, Priesteren zijn, ende zijn volck in sinen Naem ghebenedijden souden.

20

Hy heeft hem vercoren wt alle leuendige, dat hy den HEEre offeren soude, Spijsoffer ende Rueckoffer, tot soeten ruec ende ghedachtenisse, om dat volck te versoenen.

21

^† Hy beual hem den dienst zijns woorts, op dat hy Iacob zijn ghetuychenisse leeren, ende Israel met zijne Wet verlichten soude.

† Deut. 17.c.14 21.a.5. Malach. 2.a.1

22

^+* Daer verhieuender haer wel ander teghen hem ende benijden hem inder woestijne, te weten, die met Dathan ende Abiram waren, ende dat woedende Rotte Korach:

+ D vers 22

* Num. 16.a.1. 26.a.9. Psa. 106.b.16

23

Maer de HEERE sacht, ende het en behaechde hem niet, ende si werden verslonden inden grimmighen toorn.

24

Hy bewees een verschrickelijc wonder aen haer,^* ende verslindese met zijnen viere.

* Num. 16.e.35

25

^† Hy eerde Aaron noch meer, ende gaf hem een erfdeel, te weten, alle eerstelinghen deylde hy hem toe.^‡ Voor allen anderen verordineerde hy haer ten eersten broots genoech, want si souden eten des HEEren offer,

† Nume. 17.b.8

‡ Exod. 29.e.32. Leui. 24.b.9. Deut. 21.a.5.

26

Dien hy hem ende zijnen sade ghaf.

27

^† Maer si en mochten gheen deel aenden Lande hebben, noch met den volcke eruen, maer de HEEre was haer deel ende erue. .28. 29.

† Deut. 12.b.12. 18.a.1.

28

29

^* Pinehas de sone Eleazar, was de derde in sulcker eeren, die ijuerde inde vreese Gods, ende doen dat volc af viel, stont hy ghetrouwelijck, vast ende koene, ende versoende Israel.

* Num. 25.b.7. 1.Mac. 2.f.54

30

Daerom wert hem ghegheuen,^* dat verbont des vreets, op dat hy dat Heylichdom, ende den volcke voorstaen, ende hy ende zijn saet de Priesterlijcke weerdicheyt eewelijc hebben souden.

* Malac. 2.a.4

31

^† Ghelijck als met Dauid wt den Stamme Iuda, dat verbont gemaect is, dat alleene van sinen sonen een Coninc zijn sal: Also sullen oock Aaron ende zijn saet, de erfghenamen zijn, op datmen ons wijsheyt leere, ende zijn volck recht regere, op dat haren staet ende heerlijckheyt niet en vergae, maer voort ende voort by haer blijue.

† 2.Reg. 7.c.12.