Den Bibel, Inhoudende dat Oude ende Nieuwe Testament (Biestkensbijbel)

¶ Dat .xlij. Capittel.

¶ Hoemen hem niet schamen en sal. Wat sorghe de kinderen den Vader toe voeghen. Hoemen de dochteren opbrenghen sal.

1

⁺ DE kinderen der Godloosen, ende die met de Godtloosen ghemeynschap hebben, worden enckel grouwelen.

+ A vers 1

2

^* Der Godtlooser kinderen erfgoet vergaet, ende haer nacomelinghen moeten veracht zijn.

* Eccli. 41.a.5.

3

De kinderen moeten clagen ouer den Godloosen Vader,^† want om sinen wille zijn si veracht.

† 3.Reg. 2.d.27.

4

Wee v Godtloosen, ghy die des Alderhoochstens Wet verlaet, ghy leeft oft sterft,^* soo zijt ghy veruloect.

* Deut. 11.d.26. 27.d.26. 28.b.15.

5

^† Ghelijck als alle dat ghene dat wt der Aerden coemt, wederom tot Aerde wort, alsoo comen de Godloosen, wt den vloeck totter verdoemenissen.

† Gene. 3.d.19 Eccli. 41.a.1. Eccles. 12.b.7

6

Eens menschen lijden mach hier dueren, alsoo langhe als hy leeft, maer der Godloosen naem moet te niet gedaen worden, want hy en dooch niet.

7

^† Siet toe, dat ghy eenen goeden naem behout, die blijft sekerder dan duysent groote schatten gouts.

† Prou. 22.a.1 Eccle. 7.a.2. Cantic. 1.a.3. 1.Mac. 2.f.51.

8

Een leuen, het sy so goet alst wil,^* so duertet eenen cleynen tijt: Maer een goeden naem blijft eewelijck.

* Iob. 7.a.1. 14.a.1. Sapien. 2.a.1

9

Mijn kinderen, alst v wel gaet, so siet toe, ende blijft inde vreese Godts.^‡ Waerom schaemt ghy v mijnder woorden?

‡ Mar. 8.d.38 Roma. 1.b.16 1.Timo. 1.b.8

10

Men schaemt hem dicwils, daermen hem niet en behoort te schamen, ende men staet dicwils wel toe, fatmen niet en behoort toe te staen.

11

Vader ende Moeder schame haer der hoererien:^† Een Vorst ende Heere der lueghenen:

† Prou. 29.b.12

12

^* Een Rechter ende Raet des onrechts: De ghemeynte ende tvolc, der onghehoorsaemheyt:

* Deut. 17.a.2

13

^‡ Een naeste ende vrient leedt te doen: Een ghebuer des stelens. Schaemt v, dat ghy met uwen arm ouer Tafel op dat broot ligt.

‡ Gene. 37.c.18. 2.Reg. 3.e.27. 20.b.10.

14

Schaemt v, dat ghy qualijck bestaet inder rekenschap, ende niet en danct, alsmen v groet.

15

^† Schaemt v, nae de Hoeren te siene, ende uwe aensicht van uwen bloetvrient te keeren.

† Eccli. 9.a.5.

16

Schaemt v, dat erfdeel ende morghengaue te ontkeeren,^* ende eens anders Wijf te begheeren.

* Exod. 20.c.17 Math. 5.d.28

17

^† Schaemt v, eens anders dienstmaecht te begheeren, ende by haer bedde te staen.

† Iob. 31.a.1. Exod. 20.b.17

18

Schaemt v, uwen vrient yet voor te werpen,^* ende als ghy hem wat gheeft, soo en verwijtet hem niet.

* Eccli. 18.c.22 20.b.15.

19

^+† Schaemt v, nae te segghen, al wat ghy ghehoort hebt,^‡ ende te openbaren heymelijcke betroude redenen.

+ B vers 19

† Eccl. 19.b.10

‡ Pro. 20.c.19 Eccli. 22.d.27. 27.c.19.d.24.

20

Alsoo schaemt ghy v recht, ende sult by alle Lieden lief ende weert zijn.

21

Maer deser stucken en schaemt v niet, ende en doet om niemandts wille onrecht, te weten:

22

^† Des Wets ende verbont des Alderhoochsten: Den Godvreesenden bi recht te houden:

† Psa. 119.f.46 Roma. 1.b.16 2.Timo. 1.b.8

23

Getrouwelijc te handelen, teghen den naesten ende gesellen: Den vrienden dat erfdeel toe te keeren:

24

Neerstich zijn,^* om rechte mate ende ghewichte te houden:^† Te vreden zijn, ghy wint veel oft luttel:

* Leuit. 19.g.36 Deut. 25.c.15. Prou. 20.b.10

† Eccl. 29.d.30 41.a.8. 1.Tim. 6.b.8.

25

Recht te handelen met tijdelijcke goeden, in coopen ende vercoopen:

26

^‡ De kinderen met neersticheydt te onderwijsen:^* Den quaden knecht wel te gheesselen:

‡ Deut. 6.a.7. Prou. 13.e.24 23.b.13. Eccli. 7.c.25. 30.a.1.

* Ecc. 33.d.34

27

Voor een quade huysvrouwe, dat uwe wel te bewaren: Waer veel te nemen is, alle dinc wel te besluyten:

28

Watmen hen moet onder de handen gheuen, al wel te tellen ende af te weghen: Alle wtgheuinghe ende ontfanck aen te schrijuen:

29

Den onuerstandighen ende dwasen te onderwijsen: Ooc de gheheel Oude Lieden, dat si met de Iongen niet en twisten.

30

Also wort ghy een recht wel gheschict mensche, ende by alle Lieden ghepresen.

31

Een dochter die noch onghehout is, die maect den Vader veel wakens, ende dat sorgen voor haer beneemt hem veel slapens. De wijle dat si Ionck is, dat sy mochte verouden: Oft als si eenen Man crijcht, dat hy haer mocht haten:

32

Oft ter tijt dat si noch Maecht is,^† dat sy mochte ghescheynt, ende in des Vaders huys beurucht worden: Oft als si byden Man is, dat si haer niet recht houden en mochte, oft dat hy gheen kinderen by haer hebben en conde.

† Gene. 34.a.2. 2.Reg. 13.c.14

33

^+* Als uwe dochter niet schamel en is. so houtse in bedwanck, op dat si v uwen Vianden niet tot eenen spot en make, ende de gheheele stadt van v spreke, ende dat ghy van eenen yeghelijcken schande

+ C vers 33

* Eccli. 26.b.13.

[p. 125v]

hooren, ende v voor alle Lieden schamen moet.

34

^* En siet niet om na scoone menschen, ende en zijt niet soo gheerne by de vrouwen,

* Eccli. 9.a.5. 25.d.28.

35

Want ghelijck als wt den cleederen Motten comen,^† also coemt vanden vrouwen veel quaets.

† Genes. 3.b.6. 3.Reg. 21.b.7.

36

Het is sekerder by eenen boosen Man te sine, dan by een vriendelijck Wijf,^* die eenen tot smaet ende spot maect.

* Iudic. 16.c.16