Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxix. Capittel.

¶ Hoe dat wijsheyt ende Gods vreese alle ander dingen te bouen gaet, ende wat profijt dat sy brenghen. Een vermaninghe tot Gods lof ende verwonderen zijnder wercken ende zijns ghewelts. Alle Creaturen ende alle dinghen zijn den gheloouigen van Godt tot goede gheschapen. De godloosen verkeeren haer seluen tot schade ende verderuen.

1

⁺ VVie de Scrift leeren sal^† die en can geenen anderen arbeyt waernemen: Ende wyen men leeren sal, die en moet anders niet te doene hebben.

+ A vers 1

† 2.Tim. 2.a.4.

2

Hoe can die de leeringe waernemen, die daer ploegen moet, ende die gheerne de ossen metter sweepen drijft, ende met dier ghelijcke wercken omgaet, ende niet en weet, dan van ossen te spreken?

3

Hy moet dencken, hoe hy ackeren moete, ende moet spade ende vroech den koeyen voeder gheuen.

4

Also ooc de Scrijnwerckers ende Timmerlieden, die dach ende nacht arbeyden, ende snijden beeltwerck, ende doen neersticheyt om menigerley aerbeydt te maken, die moeten dencken, dattet recht worde, ende vroech ende spade daer aen zijn, op dat zijt voleynden.

5

Alsoo een smidt, die moet by zijnen aenbeeldt zijn, ende zijn smisse waernemen, ende wort mat vanden viere, ende arbeyt hem moede voor het Forneys.

6

Dat geluyt der Hameren, slaet hem die ooren vol, ende merct daer op, hoe hi dat werc recht make,

7

Ende moet dencken, hoe hijt gereet make, ende vroech ende spade daer aen zijn, op dat hijt reyn volmake.

8

Alsoo een Potbacker die moet by zijn werck zijn, ende de schijue met zijnen voeten om draeyen, ende moet altijts met sorgen zijn werck maken, ende heeft zijn seker dachwerck.

9

Hy moet met zijnen armen wt dat leem zijn vat formeren, ende moet hem tot zijne voeten moede bucken. Hy moet dencken hoe hyt fijn verglase, ende vroech ende spade den ouen vaghen.

10

⁺ Dese alle troosten haer op haer hantwerck. Ende een yeghelijck beneersticht hem, dat hy zijn werck connen mach.

+ B vers 10

11

Men en can haerder in de stadt nyet ontbeeren: Maer men canse nergens henen seynden:

12

Sy en connen oock dat officie niet waernemen, noch inder ghemeynte regeren.

13

Sy en connen dat verstant niet hebben, om de Schrift te leeren, noch om dat recht ende de gerechticheyt te predicken.

14

Sy en connen de spruecken niet lesen, maer moeten de tijdelijcke neeringe gade slaen, ende en dencken niet verder dan wat sy met haren arbeyt gewinnen moghen.

15

Maer wie hem daer toe geuen sal, dat hy de Wet des Alderhoochsten leere,

16

Die moet de wijsheyt alder Ouden ondersoecken, ende in de Propheten studeren.

17

Hy moet de gheschiedenissen der vermaerder Lieden mercken, ende op de selue dencken, wat si bedieden ende leeren.

18

Hy moet de gheestelijcke spruecken leeren, ende hem seluen in de diepe redenen oeffenen.

19

Die can dan den Vorsten dienen, ende by den Heeren zijn.

20

Hy can hem laten verseynden in vreemde Landen, want hy heeft versocht, wat by den Lieden duech oft niet en duech:

21

Ende denct, hoe hy vroech op staen sal, om den HEERE te soecken die hem geschapen heeft, ende bidt voor den Alderhoochsten.

22

⁺ Hy doet zijnen mondt vrijmoedich open,^† ende bidt voor des gheheelen volcx sonde.

+ C vers 22

† Exo. 32.b.11. Nu. 14.b.13. 1.Esd. 9.b.6. 3.Esd. 8.f.76

23

Ende als de HEEre dan alsoo versoent is, soo geeft hy hem den geest der wijsheyt rijckelijcken, soo dat hy wijsen raet ende leeringhe gheweldelijck geuen can,^* daer hy den HEEre voor danct in zijn ghebet.

* Dan. 2.c.19.

24

Ende de HEEre gheeft ghenade daer toe, dat sinen Raet ende Leeringhe voortgaen,

25

Ende hy ouerlegghet eerst by hem seluen, daer na spreect hy sinen Raet ende leeringhe wt, ende bewijset met de heylighe Schrift.

26

^* Ende veel verwonderen haer zijnder wijsheyt, ende si en sal nemmermeer vergaen. Sijns en wordt nemmermeer vergheten, ende sinen naem blijft voort ende voort.

* 3.Re. 10.a.4.

27

^† Wat hy gheleert heeft, dat salmen voorder prediken, ende de ghemeynte sal hem prijsen:

† Eccl. 44.b.15

28

De wijle hy leeft, heeft hy eenen grooteren naem, dan duysent ander, ende nae zijn doot, blijft hem den seluen naem.