Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxviij. Capittel.

¶ Hoemen den Medecijn ende medecijne als een gaue Gods in eeren houden sal, ende ghebruycken, doch in alle crancheyt tot Godt loopen. De dooden machmen truerlijck beclagen, doch en salmen nyet te veel truerich zijn, maer hem oock totten doodt bereyden.

1

⁺ MIjn kint, proeft wat uwen lichaem ghesont is, ende siet, wat hem onghesont is, dat en gheeft hem niet.

+ A vers 1

2

^† Wandt alderley en dient alle man niet, alsoo en mach oock alle man alderley niet.

† 1.Cor. 6.c.12. 10.c.23.

3

En ouerlaet v niet met alderley lecker spijse, ende en eet niet te gierichlijck.

4

Want veel eten, maect cranck^* ende een onuersadich eter crijcht dat grimmen.

* Eccl. 31.b.23.

5

Veel hebben haer doot gegeten, maer wie matelijck eet, die leeft dies te langer.

6

Eert den Medecijn met behoorlijcker eeringe, op dat ghy hem hebben moecht inder noot, want de HEEre heeft hem geschapen,

7

Ende de Medecine coemt vanden Alderhoochsten, ende Coningen eeren hem. De conste des Medecijns verhoocht hem, ende maect hem groot by de Vorsten ende Heeren.

8

De HEEre laet de Medecijne wt der Aerden wassen, ende een verstandich mensche en verachtse niet.

9

^† Dat bitter water werdt doch soete van een houdt, op datmen zijn cracht bekennen soude.

† Iudit. 5.d.17. Exo. 15.d.25. 4.Re. 4.c.41

10

Ende hy heeft sulcke conste den menschen ghegheuen, op dat hy ghepresen werde in zijn wonderdaden.

11

Daermede heelt hy ende verdrijft de smerten,

12

Ende de Apoteker maect Medecine daer wt. Summa: Men en can Gods wercken niet alle vertellen, ende hy gheeft al wat goedt is op Aerden.

13

⁺ Mijn kint^† als ghy cranck zijt, soo en veracht dit niet, maer bidt den HEERE so sal hy v gesont maken.

+ B vers 13

† Esa. 38.a.3. 2.Pa. 16.c.12.

14

Laet af vander sonde, ende maeckt uwe handen onstraffelijck, ende reynicht uwe herte van alle misdaet.

15

Offert soeten rueck, ende wit meel, tot een ghedenckoffer, ende gheeft een vetoffer, als of ghy scheyden moet.

16

Daer na laet den medecijn tot v comen, want de HEERE heeft hem geschapen, ende en laet hem niet van v, dewijle dat ghy zijnder doch behoeft.

17

De vre can comen, dat den crancken alleen door gene geholpen worde,

18

Als sy den HEEre bidden, dattet met hem beter worde ende ghesontheyt crijge, om langer te leuen.

19

Wie voor zijnen Schepper sondicht, die moet den Medecijn inde handen comen.

20

^+† Mijn kint, alsser een sterft, so beweent hem, ende^* beclaecht hem als of v groot leedt gheschiet ware, ende bewindt zijn lichaem na behoorlijcker maniere, ende bestelt hem eerlijck te graue.

+ C vers 20

† Eccl. 22.b.10. Ioan. 11.d.33.

* Acto. 8.a.2.

21

Ghy^† sult bitterlijck weenen, ende hertelijck bedroeft zijn, ende rouwe dragen, daer na dat hy gheweest is, ten alderminsten eenen dach oft twee, op datmen niet qualijck van v spreken en mach. Ende

† Gen. 23.a.2. 50 b.10. 2.Reg. 3.f.32.

[p. 124r]

troost v oock weder, op dat ghi niet truerich en wordt.

22

^† Want van trueren coemt de doot, ende des herten truericheyt beneemt de crachten.

† Pro. 12.c.25. 17.d.22. Eccl. 30.c.22.

23

Truericheyt ende armoede doet dat herte wee, inde aenuechtinge, ende ouertreedt.

24

En laet de truericheyt in v herte niet, maer slaetse van v, ende denct opt eynde,

25

Ende en vergeet dat niet, want daer en is geen wedercomen, het en helpt hem niet, ende ghy doet v seluen schade.

26

Ghedenct op hem, gelijc als hy gestoruen is, so moet ghy oock steruen, gisteren wast aen my, heden ist aen v.

27

Nademael dat de^† doode nv in de ruste leyt, so houdt oock op zijns te gedencken. Ende troost v wederom ouer hem, aenghesien dat zijnen gheest van hier gescheyden is.

† 2.Reg. 12.c.21.