Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxvij. Capittel.

¶ Van valsch ende getrouwe gheselschap ende vrientschap. Van rechten goeden raetslach, diemen by goede god vreesende menschen soecken sal, voor aen van Godt.

1

⁺ DEn buyck neemt alderley spijse tot hem, nochtans is de een spijse beter dan de ander.

+ A vers 1

2

Ghelijck als de tonge dat Wiltbraet smaeckt,^* alsoo merckt een verstandich herte, de valsche woorden.

* 1.Cor. 2.b.15.

3

^† Een bedriegelijc mensch, can eenen in een ongeluc brenghen: Maer een die versocht is, weet hem daer voor te wachten.

† Eccle. 6.b.7.

4

De Moeders hebben alle sonen lief, ende een Dochter geraect nochtans somtijts beter dan de sone.

5

Een schoon wijf verblijt haren Man, ende een Man en heeft niet lieuers:

6

Als sy daer toe vriendelijc ende vroom is, so en vintmen dies mans gelijcken niet.

7

Wie een huysvrouwe heeft, die brengt zijn goet te profijte, ende heeft eenen ghetrouwen hulper, ende eenen Pilaerne, daer hy hem op troosten can.

8

Waer geenen tuyn en is, daer wort het goet verwoest: Ende waer geen huysvrouwe en is daer gaetet den huysweert, recht al ginge hy verdwaelt.

9

Ghelijck alsmen eenen Straetroouer niet en betrout, die van deen Stadt in dander sluypt, alsoo en betroutmen oock niet eenen man, die geenen nest en heeft, ende ter herberghe trecken moet, waer hy te laet coemt.

10

Een yegelijck vrient seyt wel: Ick ben oock vriendt, maer sommighe zijn alleen metten name vrienden.

11

Als vrienden malcanderen viant worden, so blijft den haet tot inden doot.

12

Och van waer coemt doch dat quade dinc dat al de werelt so vol valsheyt is?

13

^† Alst den vrient wel gaet, soo verblijden sy haer met hem, maer wanneert hem qualijc gaet, so worden sy zijn vianden.

† Eccle. 6.b.10.

14

Sy trueren met hem om des buycx wille, maer als den noot aen gaet, so houden sy haer tot eenen schilt.

15

En vergheet uwen vrient niet, als ghy vrolijck zijt, ende ghedenct zijnder, als ghy rijcke wort.

16

^+† Een yeghelijck Raedtgheuer wil raden, maer sommighe raden tot haer ey-

+ B vers 16

† Eccle. 8.c.20.

[p. 123v]

ghen profijt.

17

Daerom wacht v voor de Raedtgheuers, bedenckt te voren oftet goedt sy, want hy denckt misschien hem seluen te raden, ende wilt v laten waghen, ende spreeckt:

18

Ghy zijt op de rechte bane, ende hy staet euen wel teghen v, ende merckt daer op, hoet ghelucken sal.

19

^† En hout geenen raedt met dien, die een quaet vermoeden op v heeft, ende en neemt niet te rade, die v benijden.

† Eccle. 9.c.19.

20

Ghelijck als wanneer ghy een wijf om Raedt vraecht, hoemen haer viandinne vriendelijck zijn moete? Oft eenen versaechden, hoemen crijghen moet?

21

Oft eenen coopman, hoe hooghe dat hy uwe ware, tegen de zijne achten wil? Oft eenen cooper, hoe diere dat ghyse geuen moet? Oft eenen nijdighen, hoemen weldoen, oft eenen onbermhertighen, hoemen ghenade bewijsen moet? Oft eenen luyen, van grooten arbeydt?

22

Oft eenen dachlooner die nerghens beseten is, hoemen wt den arbeyt niet gaen en moet? Oft eenen tragen huysknecht, van veel bedrijfs?

23

Sulcke Lieden en neemt niet te rade,^† maer houdt v alleneen tot Godtureesende lieden, die ghy weet, dat sy Gods ghebodt houden, die ghesint zijn ghelijck ghij zijt, die medelijden met v hebben, ist dat ghy struyckelt:

† Exo. 18.c.24.

24

⁺ Ende blijft by haren raedt, want ghy en sult gheenen ghetrouweren raedt vinden,

+ C vers 24

25

Ende sulck een can dickwils wat beter mercken, dan seuen Wachters die bouen op de wacht sitten.

26

Doch in dat al, roept oock den Alderhoochsten aen, dat hy dijn doen, wel ghelucken, ende niet faelgeren en late.

27

^† Eer ghy wat beghint, soo vraecht eerst, ende eer ghy wat doet, soo neemt raet daer toe.

† 3.Re. 22.a.6. 4.Reg. 3.b.11.

28

Want alsmen wat nieus voor heeft, daer moet van die vier een comen, dattet goedt oft quaedt worde, dat leuen oft de doot daer wt volghe, ende dit al regeert altijts de tonghe.

29

Menighe is wel gheschict, om ander lieden te raden, ende hemseluen en is hy niet nut.

30

Menighe wil wijsselijck raden, ende men hoort hem doch niet gheerne, ende blijft een Bedelaer,

31

Want hy en heeft daer toe, de ghenade vanden HEERE nyet, ende daer en is gheen wijsheyt in hem.

32

⁺ Menighe is wijs door eyghen ondersochtheyt, doet voordeel met zijnen raet, ende tref het.

+ D vers 32

33

Een wijs man can zijn volck leeren,^* ende doet met zijnen raedt profijt, ende tref het.

* Exod. 18.c.24

34

^† Een wijs man wort hooghe gheloeft, ende alle die hem sien, prijsen hem.

† 3.Re. 10.a.4. Dan. 2.g.46. Iob. 14.a.4. Psal. 39.a.6.

35

^* Een yeghelijck heeft eenen bestelden tijt te leuen, maer Israels tijt, en heeft gheen ghetal.

* Ge. 41.f.40

36

^† Een wijs man heeft by zijnen lieden een groot aensien, ende zijnen naem blijft eewelijck.

† Exod. 11.a.3.