Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxvj. Capittel.

¶ Een hertelijck ghebedt tot Godt, om hulpe ende verdouwinghe der vianden. Van dat Lof eender eerbaer vrouwen.

1

⁺ HEERE Almachtighe Godt, ontfermt v onser ende siet daer in,

+ A vers 1

2

Ende verschrict alle volcken.

3

Heft^† uwe handt op ouer de vreemden, op dat sy uwe macht sien.

† Iere. 10.d.25.

4

Ghelijck als ghy voor haren ooghen gheheylicht wort by ons, Also vertoont v heerlijck aen haer voor onsen ooghen,

5

Op dat sy bekennen, ghelijck als wy bekennen,^* datter gheen ander Godt en sy, dan ghy HEERE alleen.

* Deu. 32.f.39. Esai. 43.b.10. 45.a.5.

6

^† Doet nieuwe teeckenen, ende nieuwe wonderen, bewijst uwe hant ende uwen rechten arm heerlijck.

† Acto. 4.d.30

7

Verwect de gramschap, ende ghiet den toorne wt, ruct den Tegenpartijer wech, ende vernielt den viant,

8

Ende haest v daermede,^* ende denct op uwen eedt, op datmen uwe wonderdaet prijse.

* Iudit. 9.c.18.

9

Den toorn des viers moetse verteeren, die soo seker leuen, ende die uwen volcke leedt doen, moeten ymmers vergaen.

10

⁺ Vermorselt dat hooft der Vorsten, die ons haten,^* ende segghen: Wy zijnt alleen.

+ B vers 10

* Esa. 47.b.8.

11

Vergadert alle stammen Iacobs, ende laetse uwe erue zijn,^* ghelijck als vanden beghinne.

* Deu. 4.c.20. 7 b.6. 10.c.15.

12

Ontfermt v ws volcx, dat van v den name heeft, ende des Israels, ^† dien ghy noemt uwen eersten sone.

† Exo. 4.f.22. Hozee. 11.a.1.

13

Ontfermt v der stadt Ierusalem, daer uwe Heylichdom is,^* ende daer ghy woont.

* 3.Re. 9.a.3. Eccl. 24.b.14 2.Par. 6.g.41

14

Recht Sion weder op, dat aldaer uwe woort wederom op gae, dat uwe eere onder tvolck groot worde.

15

Vertoont v den ghenen, die vanden beginne uwe^† eygendom gheweest zijn, ende veruult de Prophetien die in uwen Name vercondicht zijn.

† Exod. 19.a.5. Deu. 14.a.2.

16

Vergelt den ghenen die op v wachten, op dat uwe Propheten waerachtich beuonden worden.

17

Verhoort HEERE dat ghebet der gheender die v aenroepen,^† na de benedictie Aarons, ouer v volck, op dat alle die op Aerden woonen, bekennen, dat ghy HEERE de eewighe Godt zijt.

† Nu. 6.d.25. Psal. 115.b.12.