Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxv. Capittel.

¶ Dat welbehaechlijck offer is houdinghe der gheboden Gods, Danckbaerheyt, bermherticheyt, afstaen vanden boosen.

1

⁺ VVie van onrechtuaerdighen goede offert, diens offer is eenen spot, maer sulck eenen spot der godloosen, en behaecht Gode niet met allen.

+ A vers 1

2

^† De gauen der godloosen en behagen den Alderhoochsten gheheel niet, ende sonden en laten haer niet versoenen, met veel offeren.

† Esaie. 1.b.13. Prou. 15.a.8. 21.d.27.

3

Wie van des aermen goet offert, die doet ghelijck als die den sone voor des Vaders ooghen slaet.

4

De Aerme en heeft niet dan een weynich broots, wie hem daer af berooft, die is een moordenaer.

5

Wie eenen zijn neeringhe neemt, die doot zijnen naesten.

^* Wie den arbeyder zijnen loon nyet en gheeft, die is een bloet hont.

* Deut. 24.c.15 Tobie. 4.c.11.

6

Als een timmert, ende dat selue wederom onstucken breeckt, wat heeft dye daer meer af dan arbeyt?

7

Als een bidt, ende wederom vloeckt, hoe sal dien de HEERE verhooren?

8

^* Wie hem wascht, als hy eenen dooden aengheroert heeft, ende roert hem wederom aen, wat helpt dien zijn wasschen?

* Num. 19.b.11

9

^† Alsoo is de mensche die voor zijn sonden vast, ende sondicht altoos wederom. Wie sal diens ghebet verhooren, ende wat helpt hem zijn vasten?

† 2.Pet. 2.c.20.

10

^† Gods ghebot houden, dat is eenen rijcken offer: Gods ghebot groot achten, die offer helpt wel.

† Ierem. 7.c.22

11

Wie Gode danckt, dat is een recht Meeloffer.

^* Wie bermherticheyt doet, dat is den rechten Danckoffer.

* Hebre. 13.c.16

12

Aflaten vanden sonden, dat is eenen Gods dienst, die den HEEre behaecht: Ende ophouden van onrecht te doene, dat is eenen rechten Soenoffer.

13

^* Maer ghy en sult daerom niet ledich voor den HEERE verschijnen, want sulcx moetmen ooc doen, om Gods ghebots wille.

* Exod. 34.c.20

14

Des^† gherechten offer maect den Altaer rijck, ende sinen rueck is soete, voor den Alderhoochsten.

† Genes. 4.c.4 8.d.21.

15

Des gherechten offer is aenghenaem, ende des seluen en wert nemmermeer vergheten.

16

^+* Gheeft Gode zijn eere, met vrolijcken ooghen, ende uwe eerstelinghen sonder eenich ghebreck.

+ B vers 16

* Prouer. 3.b.9 Deut. 26.a.2.

17

^† Wat ghy gheeft, dat geeft gheerne, ende heylicht uwe tienden blijdelijck.

† Tobie. 1.a.7. 2.Cor. 9.b.7.

18

^* Gheeft den Alderhoochsten, na tgene dat hy v verleent heeft,

* Tobi. 4.b.6

19

Ende wat uwe hant vermach, dat gheeft met vrolijcke ooghen.

20

^† Want de HEERE die een verghelder is, salt v seuenuoudich verghelden.

† Eccli. 12.a.8. Mat. 25.d.34

21

En maect geen stomperie van uwer

[p. 123r]

gaue, want het en is niet aengenaem.

22

En soect geen voordeel als ghy offeren wilt, want de HEERE is een wreker,^† ende voor hem en gelt geen aensien der Persoonen.

† Deu. 10.d.17. 2.Par. 19.b.7 Sap. 6.b.8. Iob. 34.c.19. Acto. 10.e.34. Rom. 2.b.11. Gal. 2.a.6. Ephe. 6.b.9. Coll. 3.c.25. 1.Pet. 1.b.17.

23

Hy helpt den aermen, ende en siet gheen persoonen aen, ende hy verhoort dat ghebet des genen, dien onrecht aengedaen is.

24

Hy en veracht des Weesen ghebet niet, noch de weduwe als sy claecht.

25

De tranen der weduwen, vlieten wel ter wangen nederwaerts, maer sy roepen opwaerts, teghen dien, diese daer wt dringt.

26

Wie Gode dient met lust, die is aenghenaem, ende zijn ghebet reyct tot in de wolcken.

27

^+† Dat ghebet der ellendighen dringt door de wolcken, ende ten laet niet af, tot dattet daer toe come, ende het en houdt niet op, tot dat de Alderhoochste daer in siet. Ende de HEERE sal recht oordeelen ende straffen,

+ C vers 27

† Tren. 3.d.44 Acto. 10.a.4. Exod. 3.a.7. Tob. 3.d.18.

28

Ende het niet vertrecken, noch langher lijden, tot dat hy den onbermhertighen de lenden onstucken slae, ende hem aen sulcke lieden wreke,

29

Ende verdoe alle de ghene, die ghenen onrecht aendoen, ende dat gewelt der ongherechtigher ter neder werpe,

30

^† Ende eenen yegelijcken gheue nae zijn wercken, ende haer loone, ghelijck zijt verdient hebben,

† Iere. 17.b.10. Psal. 28.a.4. 62.b.13. Iob. 34.b.11. Rom. 2.a.6. Apoc. 2.d.23.

31

Ende zijn volck wreke ende hen verblijde met zijnder bermherticheyt.

32

Ghelijck als den reghen ter rechter tijt coemt, alst drooghe is, alsoo coemt de bermherticheyt oock inder noot, ter rechter tijt.