Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxiiij. Capittel.

¶ Der godlooser hoope is ydel, Maer de goede worden behouden, want sy hopen op Godt. Godt en wordt met gheen offeren versoent, maer met onschult des leuens.

1

⁺ ONwijse lieden bedrieghen haer seluen, met dwase hopinghe, ende sotten verlaten haer op droomen.

+ A vers 1

2

Wie op droomen acht, die grijpt nae de schaduwe, ende wil den wint vangen.

3

Droomen en zijn niet anders, dan beelden sonder wesen.

4

Wat onreyn is, hoe can dat reyn zijn, Ende wat valsch is, hoe can dat waer zijn?

5

^* Eyghen Prophetie ende bediedinghe ende droomen en zijn niet: Ende maken doch eenen sware ghedachten.

* Iere. 23.d.25.

6

^† Ende ist dat sy niet en comen door ingeuinge des Alderhoochsten, so en hout daer niet af,

† Dan. 7.a.1. 4.Esd. 11.a.1.

7

Want droomen bedrieghen veel lieden, ende het mist den ghenen, die daer op bouwen.

8

⁺ Men behoeft gheen luegenen daer toe, datmen dat gebot houde, ende men heeft genoech aen twoort Gods, alsmen recht leeren wil.

+ B vers 8

9

Een wel gheoeffent man verstaet vele, ende een wel versocht Man can van wijsheyt spreken:

10

Maer wie niet geoeffent en is, die verstaet weynich, Ende de dwalende geesten richten veel quaets aen.

11

Doen ic noch in dwalinge was, conde ick oock veel leeringe,

12

Ende was soo geleert, dat ict niet al gheseggen en conde ende ben dicwils in perijckel des doots daer door ghecomen,

13

Tot dat ick daer af verlost gheworden ben:

14

15

Nv sie ick, dat de Godtvreesende den rechten gheest hebben, want haer hope staet op dien, die haer helpen can.

16

^* Wie den HEEre vreest, die en derf hem nergens voor verschricken, nach ontsetten,^† want hy is zijn toeuerlaet.

* Psalm. 3.a.7. 27.a.3. 112.b.7 118.a.10.

† Psal. 18.b.19. 91.b.9. Pro. 3.c.25.

17

18

^* Wel dien, die den HEERE vreest waer op verlaet hy hem? Wie is zijn stueninge.

* Psal. 112.a.1.

19

^† De ooghen des HEEREN sien op de gene die hem lief hebben, hy is een gheweldich Beschutter, een groote stercte, een beschutsel teghen de hitte, een Hutte tegen den heeten middach, een Bewaerder tegen dat struyckelen, een hul-pe teghen den val:

† Psal. 33.c.18. 34.b.16. Eccl. 15.c.24. 1.Pet. 3.b.12.

20

Die dat herte verblijdt, ende dat aensicht vrolijck maeckt, ende gheeft ghesontheyt, dat leuen ende de segheninghe.