Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxiij. Capittel.

¶ Hoemen Godt vreesen ende zijn gebot houden sal. Van onderscheyt der daghen ende menschen. In allen wercken Gods zijn altijt twee teghen malcanderen. Hoe dat de Ouders den kinderen gheen ghewelt ouer haer geuen en sullen. Hoemen dat huysgesin houden sal.

1

⁺ VVie^† den HEERE vreest, die laet hem geerne onderwijsen, Ende wie hem vroech daer toe schickt, die sal ghenade vinden.

+ A vers 1

† Psal. 141.a.5 Prou. 9.b.8.

a2

Wie na Gods woort vraecht, die salt rijckelijck vercrijghen: Maer wiet met ernst niet en meynt, die wort daer door slechs ergher.

3

Wie den HEERE vreest, die treft de rechte leere, ende maect de gherechticheyt blinckende ghelijck een licht.

4

Een godloose en laet hem niet straffen ende weet hem te behelpen, met ander Lieden exempel in zijn voornemen.

5

Een verstandich man, en veracht geenen goeden Raet, maer een wilt ende hooueerdich mensch, en vreest hem niet, hy hebbe oock ghedaen, wat hy wil.

6

En doet niet sonder Raet, soo en berouwet v niet na der daet.

7

En gaet den wech niet daer ghy vallen moghet, noch daer ghy v aen de steenen stooten muecht. En verlaet v daer op niet, dat de wech effen is.

8

Ia wacht v oock voor v eyghen kinderen.

9

Wat ghi voor neemt, so betrout God van geheelder herten, want dat is Gods ghebot houden.

10

Wie^† Gods woort ghelooft, die acht de geboden, ende wie den HEERE betrout, dien en sal niet ghebreken.

† 4.Re. 22.b.11.

11

^* Wie Godt vreest, dien en gheschiet geen leet, maer als hy aengheuochten is, soo sal hy weder verlost worden.

* Eccl. 1.c.19.

12

⁺ Een wijs Man en laet hem Gods woort niet verleeden, maer een huychelaer sweeft ghelijck als een Schip op de ongeduerighe See.

+ B vers 12

13

Een verstandich mensche hout vast aen Gods woort, ende Gods woort is hem seker, als een clare redene.

14

Wort der saken seker, daer na spreect daeraf: Laet v eerst wel leeren, soo cont ghi antwoorden.

15

^† Des sotten herte is ghelijck als een Rat aen den waghen, ende zijn ghedachten loopen om, ghelijck de radtschijue.

† Eccl. 21.c.17.

16

Ghelijck als de bespringhengst briest tegen alle Merien, also hangt de Huychelaer allen bespotters aen, ende seyt:

17

Waerom moet den eenen dach heyligher zijn dan den anderen? Na dien doch de Sonne den eenen dach soo wel maect int Iaer, als den anderen.

18

De wijsheydt des HEEren heeftse alsoo onderscheyden, ende hy heeft de tijden des iaers, ende vierdaghen also geordineert:

19

Hy heeft sommige wtuercoren, ende gheheylicht voor ander daghen.

20

Ghelijck als alle menschen vander Aerden,^† ende Adam wt dat stof gheschapen is, ende doch de HEERE haer onderscheyden heeft, door zijn menichuuldighe wijsheyt, ende heeft menigherley maniere onder haer geordineert,

† Genes. 2.a.7.

21

Sommighe heeft hy ghesegent, verhoocht ende gheheylicht, ende tot sinen dienste vercoren: Maer sommighe heeft hy veruloect ende vernedert, ende van haren staet af ghestooten.

22

^† Wandt si zijn in zijnder hant, ghelijck dat leem in des Potbackers hant, hy maect alle sine wercken alsoot hem behaecht:

† Iere. 18.a.6. Roma. 9.c.21.

23

Alsoo zijn oock de menschen inder handt des gheens, diese ghemaect heeft, ende^* beghift eenen yeghelijcken alsoot hem goet dunct.

* 1.Cor. 12.a.11.

24

Also is dat goet teghen dat quaet, ende dat leuen teghen de doot,^† ende de godtvreesende teghen den godtloosen gheordineert.

† Malac. 3.c.18 2.Cor. 6.b.14

25

Alsoo aenschout alle wercken des Alderhoochsten, soo zijnder allen een twee teghen twee, ende deen teghen dat ander gheordineert.

26

⁺ Ick ben de laetste op gewect, als een die inden Herfst nae leest, ende Godt heeft my de segheninghe daer toe ghegheuen, dat ick mijn Wijnpersse oock vol ghemaect hebbe, gelijc inden vollen Herfst.

+ C vers 26

27

^† Siet, hoe dat ick niet voor my ghearbeyt en hebbe, maer voor alle die geerne leeren wilden.

† Eccl. 24.d.39.

28

Hoort na my, ghy groote Heeren, ende ghy Regenten inden volcke, nemet ter herten:

29

En laet den sone,^* den wijue, den broeder, den vrient, geen macht ouer v, de wijle dat ghy noch leeft, Ende en gheeft niemant v goeden ouer, op dattet v niet en berouwe, ende haer daerom bidden moet.

* Eccle. 9.a.2.

30

De wijle dat ghy leeft, ende adem hebt, so en ondergheeft v gheenen anderen mensche.

31

Het is beter, dat uwe kinderen uwer behoeuen, dan dat ghy haer moet in de handen sien.

32

Blijft ghy de Ouerste in uwe goeden, ende en laet v uwe eere niet nemen.

33

Als uwe eynde coemt, dat ghyder van moet,^* als dan deylt uwe erue wt.

* Gen. 48.d.22 1.Mac. 1.a.7.

34

⁺ Den Esel behoort zijn voeder, de gheessel ende last,^‡ alsoo den knecht zijn broot, straf ende arbeyt.

+ D vers 34

‡ Ecc. 42.b.26

35

Hout den knecht tot den arbeyt, so hebt ghy ruste van hem, laet ghy hem ledich gaen, soo wil hy een ioncker zijn.

6[36]

Dat iock ende de stricken buygen den hals: Eenen boosen knecht stock ende

[p. 122v]

clippel.

37

Drijft hem tot den arbeyt, dat hy niet ledich en gae. Ledich gaen leert veel quaets.

38

Legt hem arbeyt op, die eenen knecht toebehoort: Hoort hy dan niet, soo set hem inden stock:

39

Doch en legt gheenen te vele op, ende hout mate in allen dinghen.

40

^† Hebt ghy eenen knecht, so hout van hem als van v seluen, want wie hem yet doet, die meynt dijn lijf ende leuen.

† Eccl. 7.c.23.

41

Hebt ghy eenen knecht, so laet hem houden als oft ghi tegenwoordich waert, want ghi behoeft zijnder, gelijc als dijns eyghen leuens.

42

Maer en houdt ghy hem niet wel^† dat hy hem op maect, ende van v loopt, waer wilt ghy hem weder soecken?

† 3.Re. 2.f.39.