Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxij. Capittel.

¶ Het verkiesen tot eenen dienst der Ouerheyt en sal den mensche niet stout noch hooch maken, sonder sorchuuldicheyt, neerstich ende ghetrouwe, ouer de ghene die hem beuolen zijn, Ende ander schoone leeringhe.

1

⁺ MIjn kindt, gheeft my ghehoor, ende en veracht my niet, op dat v ten laetsten mijne woorden niet en treffen.

+ A vers 1

2

Neemt voor v yet te arbeyden, soo en ouercoemt v gheen cranckheyt.

3

^* Eenen spijsmilden man, prijsen de lieden, ende segghen, hy sy een eerlijck man, ende sulcx is een goeden roem,

* Pro. 22.b.9.

4

Maer van eenen vrecken vilt, spreect de gheheele stadt qualijck, ende men seght recht daer aen.

5

En zijt gheen Wijnsuyper,^† want de wijn verdoet veel Lieden.

† 1.Reg. 20.b.16 Iudit. 13.a.8.

6

Dat Forneys proeft dat gehertte ijserwerc, also proeft de wijn, de moetwillige herten, als sy droncken zijn.

7

^* De wijn vermaeckt den mensche dat leuen, alsmen hem matelijck drinct:

* Psa. 104.b.15 Prou. 31.a.6. 1.Tim. 5.c.23.

8

Ende wat is dat leuen, daer gheenen wijn en is?

9

De wijn is gheschapen, om dat hy de menschen vrolijck soude maken.

10

De wijn ter nootdruft gedroncken, verblijdt Lijf ende Siele,

11

Maer alsmen dies te veel drinckt, brengt hy tverdriet des herten.

12

^* De dronckenschap maect eenen dullen Sot noch duller, so dat hy tercht ende pocht, tot dat hy wel gheblout, geslaghen ende ghewondt wort.

* Prou. 20.a.1. 3.Esdre. 3.c.18 Iudit. 13.a.4.

13

^* En berispt uwen naesten niet by den wijn, ende en versmaet hem niet in zijnder blijschap.

* Eccle. 20.a.1.

14

En gheeft hem geen quade woorden, ende en gaet hem niet te ghemoet met herde redenen:

15

Maer hout v gelijc als sy, ende richt v na haer, soo sit ghy recht.

16

Ende geeft daer toe wat v behoort, wilt ghy mede sitten, op dat sy met v vrolijck zijn moghen,

17

Ende ghy de eere daer af crijcht, datmen v eenen sedighen vriendelijcken Man noeme.

18

⁺ De oudtste sal spreken, want het betaemt hem als die^* veruaren is.

+ B vers 18

* Expert.

19

Ende en belet de speellieden niet, ende alsmen Lieden singt, soo en clapter niet tusschen,

20

⁺ Ende spaert uwe wijsheyt tot op eenen anderen tijt. Ghelijck als eenen Robijn in fijnen goude schijnt, alsoo verciert een ghesanck de maeltijt.

+ Eccl. 20.a.6.

21

Ghelijck als een Smaragde in schoonen goude staet, alsoo vercieren de Liedekens by den goeden wijn.

22

Een ionghelinck mach oock wel eens

[p. 122r]

oft tweemael spreken, alst hem van nooden is. Ende alsmen hem vraecht,

23

So sal hijt cort maken, ende hem houden als die niet veel en weten, ende lieuer swijghen.

24

^* Ende en sal hem den Heeren niet gelijc achten, Ende als een out man spreect, daer tusschen niet clappen.

* Iob. 32.b.6.

25

⁺ Donderen brengt grooten blixem: Schaemte maect groote gonste.

+ C vers 25

26

Staet oock in tijts op, ende en zijt de laetste niet, mer gaet haest thuyswaerts,

27

Ende speelt aldaer, ende doet wat ghi wilt, doch dat ghy niet quaets en doet, ende niemant qualiljck toe en spreeckt,

28

Maer danct voor dat alle, dien, die v gheschapen, ende met zijne goeden versaedt heeft.