Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxix. Capittel.

¶ Hoe datmen hem inder barmherticheyt houden sal, ende int leenen sinen naesten: Hoe dat hem wederom, die den ghenen die gheleent wort, teghen sinen weldader houden sal: Hy waerschout haer voor onbedachte borchtocht ende pracherie.

1

⁺ VVie sinen^† naesten leent, die doet een werck der bermherticheydt, ende wie goeden heeft, die behoort sulcx te doen.

+ A vers 1

† Deut. 15.a.4 Luce. 6.d.35.

2

Leent uwen naesten, als hijt behoeft, ende ghy ander, gheuet weder op den ghesetten tijt.

3

Hout wat ghy ghesproken hebt, ende en handelt niet bedriechelijck met hem, so vint ghy altijts uwen nootdruft.

4

Menich meynt,^* het sy gheuonden, wat hy^† borcht, ende maeckt den ghenen onwillich, die hem gheholpen heeft.

* Eccli. 8.b.15.

† Ontleent.

5

Hy cust eenen de hant, de wijle datmen hem leent, ende spreect soo ootmoedelijck om des naesten ghelt.

6

Maer als hyt weder gheuen sal, soo vertreckt hijt, ende claecht seer, het sy eenen swaren tijt.

7

Ende oft hijt al schoon wel vermach, so en geeft hy doch nauwelijcx de helft weder, ende rekenet genen voor een gewin toe:

8

Maer vermach hijt niet, so brengt hy genen om tgelt: Die selue heeft dan hem seluen eenen viant gecocht, met sinen eygen ghelde:

9

Ende ghene betaelt hem met vloecken ende schelden, ende gheeft hem spijtighe woorden, voor danck.

[p. 121r]

10

⁺ Menich leent noode, wt gheen quade meyninghe, Maer hy moet vreesen, dat zijne quijt te worden.

+ B vers 10

11

Nochtans hebt medelijden met uwen Naesten inder noodt, ende doet de aelmoessen daer toe, dat ghy hem tijt laet.

12

Helpt den armen om des^† ghebots wille, ende en laet hem inder noot niet ledich van v gaen.

† Deu. 15.a.7. Lu. 6.d.35. Rom. 12.b.13.

13

Verliest gheerne v ghelt om ws broeders ende naestens wille, ende en begrauet niet onder eenen steen, daert doch vergaet.

14

^* Vergadert v eenen schat, na dat gebodt des Alderhoochsten, die sal v beter zijn dan eenich gout.

* Mat. 6.c.20. Lu. 12.d.33. 1.Tim. 6.d.19

15

Legt^† uwe aelmoessen aen een sonderlinghe plaetse, dat selue sal v beschermen van alle ongheluck,

† Da. 4.d.26. Luc. 11.d.41. Acto. 10.a.2.

16

17

Sy sal voor v strijden teghen uwen viant, beter dan eenighen schilt oft spiese.

18

Een vroom man wort borge voor zijnen naesten:

19

Maer een onbeschaemt mensche laet zijnen vorghe staen.

20

En vergheet de weldaet van uwen borghe niet, want hy heeft hem seluen voor v verset.

21

⁺ De godloose brengt zijnen borghe in schade,

+ C vers 21

22

Ende een ondancbaer mensche laet zijnen Verlosser steken.

23

24

^† Borghe te worden, heeft veel rijcke Lieden verdoruen, ende ghins ende weder gheworpen, ghelijck als de baren inder See.

† Eccl. 8.b.16.

25

Het heeft groote lieden verdreuen, dat sy in vreemde Landen moesten gaen dolen.

26

Een godloose, ist dat hy borge geworden is, ende met loose treken om gaet, dat hy hem daer wt draye, die en sal der straffinghe niet ontgaen.

27

Helpt uwen naesten wt, soo veel als ghy cont, ende siet voor v, dat ghy selue daer door niet tot schade en coemt.

28

^* Het is ghenoech tot dit leuen, wie water ende broot, cleederen ende huys heeft, daermede hy zijnen nootdruft bedecken can.

* Eccl. 40.b.16 Prou. 27.c.27

29

^+* Cleyne neeringhe, onder een eygen berderen dack, is beter, dan een costelijcke tafel onder den vreemden.

+ D vers 29

* Eccle. 41.a.8.

30

^† Latet v wel behagen, ghy hebt luttel oft veel, want het is een schandelijck leuen, van huyse tot huyse trecken.

† Psal. 37.b.16. 1.Tim. 6.b.8. Hebre. 13.a.5. Eccle. 4.a.6.

31

Ende waer een vreemt is, daer en derf hy zijnen mont niet open doen.

32

Hy moet ouer hem laten ghaen, ende eenen yeghelijcken met hem laten drincken, ende gheenen danck daer toe hebben. Moet daer toe bitter woorden hooren, te weten:

33

Gast gaet henen, ende bereit de tafel, laet my met v eten, wat ghy hebt.

34

Item, Trect wech, ick heb eenen eerlijcken gast ghecregen, ick moet dat huys selue hebben, mijn broeder treckt tot my in.

35

Sulcx is swaer eenen vernuftigen man, dat hy om der herberghen wille, sulcke woorden eten moet, ende datment hem verwijdt alsmen hem gheleent heeft.