Den Bibel, Inhoudende dat Oude ende Nieuwe Testament (Biestkensbijbel)

[p. 120v]

¶ Dat .xxviij. Capittel.

¶ Men sal hem voor wrake wachten, den naesten vergheuen, niet kijuen noch twisten: Wat schade dat van valsche tongen ende oorblasers coemt, wat schadelijcker dinck een valsche tonghe is.

1

⁺ VVie den steen inde hoochte werpt, dien valt hy op den Cop: Wie heymelijc steect, die wont hem seluen.

+ A vers 1

2

^† Wie eenen cuyl graeft, die valt daer selue in. Wie eenen anderen stricken leyt, die vangt hem seluen.

† 1.Hest. 7.b.10 Psal. 7.b.16. 8.b.35. 16.c.9. Prou. 26.c.27 Eccle. 10.b.4. Susan. g.62. Dani. 6.e.24

3

Wie den anderen scade doen wil, dien comet selue ouer sinen hals, dat hi niet en weet van waer.

4

De hooueerdighe, ghecken ende spotten, maer de wrake loert op haer, ghelijc eenen Leeu.

5

Die haer verblijden alst den vroomen qualijc gaet, die worden inden strick gheuanghen, dat hertseer salse verteren, eer si steruen.

6

Toornicheydt ende raserie, zijn grouwelen, ende de Godtloose bedrijftse.

7

Wie hem wreect,^† aen dien sal hem de HEERE weder wreken, ende sal hem zijn sonden oock behouden.

† Deut. 32.e.35. Roma. 12.c.19

8

^* Vergheeft uwen naesten, wat leedt dat hy v ghedaen heeft, ende bidt dan, so worden v uwe sonden oock vergheuen.

* Matth. 5.b.23 6.b.14. 18.b.22.d.35.

9

Een mensche behout teghen den anderen den toorne, ende wil byden HEEre ghenade soecken.

10

Hy is onbermhertich teghen zijns ghelijcke, ende wil voor zijne sonden bidden.

11

Hy is slechs vleesch ende bloet, ende behout den toorne, wie wil hem dan sine sonden vergheuen?

12

^+* Ghedenct aen dat eynde, ende laet de Viantschap varen (die den doot ende de verderffenisse soect) ende blijft inde gheboden.

+ B vers 12

* Eccli. 7.d.39.

13

Ghedenct aen tghebot, ende verlaet v dreyghen teghen uwen naesten. Ghedenct aen dat verbondt des Alderhoochsten, ende vergheeft de onwetenheyt.

14

^† Laet af vant ghekijf, so blijuen veel sonden achter: Wandt een toornich mensch richt ghekijf aen,

† Eccli. 8.a.1.

15

Ende de Godloose verwerret goede vrienden, ende hist tegen malcanderen, die, die goeden vrede hebben.

16

^* Alsser veel houts is, soo wordt des viers dies te meer: Ende als de lieden gheweldich zijn, so wort den toorne dies te grooter. Ende wanneer de lieden rijc zijn, so wort den toorne dies te heftiger, ende als de kijuagie langhe duert, soo brandet dies te meer.

* Prou. 26.c.21.

17

⁺ Bereyt te zijn tot twist, ontsteect vier: Ende bereyt zijn tot kijuen, vergiet bloet.

+ C vers 17

18

Blaest ghy int voncxkens, soo coemt daer een groot vier af: Maer spout ghy opt voncxkens, soo blusschet wt, ende beyderley can wt uwen monde comen.

19

^* De oorblasers^† ende valsche quade tonghen, zijn veruloect, want si verwerrender veel, die goeden vrede hebben.

* Eccli. 21.d.31.

† Psal. 120.a.3

20

Een quade^* tonghe maect veel lieden oneens, ende drijftse wt dat een Lant in het ander.

* Iacob. 3.a.5.

21

Sy destrueert vaste steden, ende verstoort Vorstendommen.

22

Een quade tonghe verstoot redelijcke Wijuen, ende berooftse van al tgene dat haer suer gheworden is.

23

Wie haer ghehoor geeft, die en heeft nemmermeer ruste, ende en can nerghens met vreden blijuen.

24

De gheessel maect stramen, maer een quade tonghe breect beenen ende alle dinck in stucken.

25

Veel zijnder geuallen, door de scherpte des Sweerts: Maer nerghens na so veel als door quade tonghen.

26

⁺ Wel den ghenen, die voor de quade tonghe bewaert is, ende van haer ongeplaecht blijft, ende haer Iock niet draghen en derf, ende in haren stricken niet ghebonden en is.

+ D vers 26

27

Want haer Iock is ijseren, ende haer stricken metalen,

28

Haer plage is bitterder dan de Doot, ende ergher dan de Helle.

29

Maer si en sal den Godtureesenden niet onderdrucken, ende hy en sal in haer vier niet branden.

30

Wie den HEEre verlaet, die sal daer in vallen, ende daer in branden, ende het en sal niet wtghebluscht worden: Het sal hem oueruallen, ghelijck eenen Leeu, ende te niete maken als eenen Luypaert.

31

Ghy betuynt uwe goeden met doornen, waerom en maect ghi niet veel meer uwen monde dueren ende grendelen?

32

Ghy weecht v gout ende siluer,^* waerom en weecht ghy uwe woorden oock niet op de goutwaghe?

* Eccli. 21.d.28

33

Wacht v, dat ghy daer door niet en slippert, ende valt voor uwe Vianden, die op v loeren.