Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvij. Capittel.

¶ Menigherley schoone spruecken.

1

⁺ DAer zijn twee stucken, die my verdrieten, ende dat derde maeckt my toornich.

+ A vers 1

2

Alsmen eenen strijtbaren man ten laetsten armoede laet lijden. Ende de Wijse Raetsheeren ten laetsten veracht.^* Ende wie vanden rechten gelooue afualt tot dat onrechte ghelooue, Dese heeft Godt totten Sweerde verwesen.

* Eccli. 2.b.16. Iere. 17.b.13.

3

Een coopman can hem swaerlijck wachten voor onrecht. Ende een Cramer voor sonden.

4

Wandt om tgoets wille doender vele onrecht.^† Ende die daer rijck willen worden, die keeren de ooghen af.

† Prou. 30.a.8. 1.Tim. 6.b.9. Prou. 23.a.4.

5

Ghelijck als eenen nagel inden muer tusschen twee steenen steect, alsoo steect oock de sonde tusschen den cooper ende vercooper:

6

Hout hy hem niet met neersticheyt inde vreese des HEEren, so sal zijn huys haest verstoort worden.

7

Wanneermen siftet, soo blijft dat onreyne inden seue, alsoo, soo wat de mensche voorneemt, daer cleeft wat onreyns aen.

8

^† Ghelijc als den Ouen den nieuwen pot beproeft, also beproeft de droeffenis des menschen sin.

† Prou. 27.c.21 1.Petri. 1.b.7

9

^+* Aen de vruchten merctmen, hoe den Boom gheoeffent is, also merctmen aen de redene, hoe dat herte gheschict is.

+ B vers 9

* Matt. 7.b.15. Luce. 6.e.44

10

Ghy en sult niemanden louen, ten sy dat ghy hem ghehoort hebt, wandt aen de Redene kentmen den Man.

11

Volcht ghy de gherechticheyt na, soo suldyse crijghen,^† ende haer aentrecken, ghelijck eenen schoonen Rock.

† Eccli. 6.d.32. Baruc. 5.a.4

12

De Voghelen voegen haer tot haers ghelijcken, also hout haer de waerheydt tot de ghene, die haer ghehoor gheuen.

13

Ghelijc als de Leeu op den roof loert, alsoo grijpt ten laetsten de sonde den quaetdoender.

14

^* Een Godtvreesende mensche spreect altijt dat heylsaem is: Maer een Sot is veranderlijck ghelijck de Mane.

* Psal. 37.d.30. Prou. 31.d.26

15

Als ghy onder de onwijse zijt,^* soo merct wat den tijt lijden wil: Maer onder de Wijse moechdy voort varen.

* Roma. 12.b.11 Collo. 4.a.4

16

Der Sotten reden is wter maten verdrietelijck, ende haer^† lachen is enckel sonde, ende kittelen haer nochtans daer mede.

† Eccli. 21.d.30.

17

⁺ Waermen veel hoort^† sweeren, daer gaen eenen de hayren te berghe, ende haer kijuen maect, datmen de ooren toe moet houden.

+ C vers 17

† Eccli. 23.b.10.

18

Als de hooueerdighe met malcanderen twisten, so volchter bloetuerghieten nae, ende het is verdrietelijck te hooren, als si malcanderen schelden.

19

^† Wie heymelicheyt openbaert, die verliest het ghelooue, ende en sal nemmermeer eenen ghetrouwen vrient crijghen.

† Eccli. 19.b.13. 22.d.27. Prou. 20.c.19

20

Hout uwen vrient weerdich, ende hout hem gelooue. Maer ist dat ghy zijn heymelijcheyt openbaert, so en sult ghy hem niet weder crijghen.

21

Wie sinen vrient verliest, dien gheschiet wel soo veel leedts, als dien zijn Viant ontgaet.

22

⁺ Ghelijck als wanneer ghy eenen Vogel wt der hant laet, alsoo ist, als ghy uwen vrient verlaet, ghy en vangt hem niet weder,

+ D vers 22

23

Ghy en derft hem niet na loopen, hy is te verre wech, hy ist ontsprongen, ghelijc een Rhee wt den nette.

24

Wonden canmen verbinden, scheltwoorden canmen versoenen,^* mer wie heymelicheyt openbaert, met dien ist wt.

* Eccli. 19.b.13.

25

Wie^† metten oogen wenct, die heeft wat quaets inden sin, ende en laet hem daer niet af keeren.

† Prou. 6.b.13. 10.b.10.

26

Voor v can hy soetelijc spreken, ende prijst seer wat ghy spreect: Maer achter uwen rugge spreect hy anders, ende verkeert v uwe woorden.

27

Ick en ben gheen dinck so Viant als dien, ende de HEERE is hem oock Viant.