Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiiij. Capittel.

¶ Dit Capittel hout in, een Lof der wijsheyt.

1

⁺ DE^† wijsheyt prijst haer seluen, ende onder den volcke beroemtse haer.

+ A vers 1

† Prou. 1.b.20. 8.a.1.

2

Sy predickt inder ghemeyten Godts,

3

Ende prijst haer in sinen rijcke, ende spreect alsoo:

4

Ick ben Godts^† woort, ende sweue bouen de gheheele Aerde, ghelijck als de wolcken.

† Ioan. 1.a.1. 1.Ioan. 1.a.1. 5.a.7. Apoca. 19.a.13

5

Mijn Tente is in de Hoochte, ende mijnen Stoel inde Wolcken.

6

Ick alleene ben ouer al, alsoo wijdt als den Hemel is,

7

Ende alsoo diepe als den afgront is.

8

Ouer al inde See, ouer al op der Aerden, onder alle Lieden, onder alle Heydenen,

9

By alle desen heb ick een wooninghe ghesocht,

10

Op dat ick erghens een plaetse vonde.

11

⁺ Doen gheboot my de^* Schepper alder dingen, ende die my gheschapen heeft, bestelde my een wooninge,

+ B vers 11

* Genes. 1.a.1. Eccli. 1.a.6.

12

Ende sprac: In Iacob sult ghy woonen, ende Israel sal v erue zijn.

13

^* Voor de werelt van aenbeghin ben ick gheschapen, ende sal eewelijc blijuen,^† ende hebbe voor hem inder Hutten gedient,^‡ ende daer nae te Sion een seker stede ghecregen.

* Prou. 8.c.22.

† Exod. 31.a.3.

‡ Ps. 132.b.13.

14

Ende hy heeft my in de heylighe stadt gheset, dat ick te Ierusalem regeren soude.

15

Ick ben inghewortelt, by een gheeert volc,^* dat Gods Erfdeel is.

* Deut. 4.c.20. 10.c.15.

16

Ick ben hooghe gewassen ghelijc als een Ceder op den Libano, ende ghelijck een Cypres opt geberchte Hermon.

17

Ick ben opghewassen ghelijck als eenen^† Palmboom aen twater, ende als de Roosboomen, die te Iericho wassen,

† Deut. 34.a.3.

18

Ghelijc eenen schoonen Olijfboom op een vrij Velt. Ick ben opghewassen, ghelijck Ahorne.

19

⁺ Ick gaf eenen lieflijcken rueck van my, als Caneel, ende costelijcke Cruyden,

+ C vers 19

20

Ende als de beste Myrrhen, ghelijck Galban ende Onych, ende Myrrhen, ende als de Wierooc inden Tempel.

[p. 119v]

21

Ick breyde mijne Tacken wt, ghelijck als een Eycke, ende mijne tacken waren schoon ende lustich.

22

Ic gaf eenen lieflijcken rueck van my, gelijc eenen^† Wijnstock, ende mijne bloemen brachten eerlijcke ende rijcke vruchten voort.

† Ioan. 15.a.1.

23

Coemt herwaerts tot my, alle ghi die mijnder begheert, ende versadicht v van mijne vruchten.

24

Mijne predicatie is soeter dan Honich, ende mijne gifte soeter dan Honichseem.

25

^† Wie van my eet, dien honghert altijt na my: Ende wie van my drinct, dien dorst altijt nae my.

† Ioan. 6.d.35.

26

Wie my ghehoor geeft, die en coemt niet tot schanden: Ende wie my volcht, die sal onschuldich blijuen.

27

⁺ Dit alle, is effen dat Boeck des verbonts, met den Alderhoochsten Gode ghemaect,

+ D vers 27

28

Te weten,^† de Wet, de welcke Moses den huyse Iacobs tot eenen schat beuolen heeft:

† Exodi. 20.a.2 24.c.12. Deut. 4.a.1.

29

Daer de wijsheyt wt gheuloeyt is, ghelijc als dat water Phison, alst groot is, ende ghelijck dat water Tygris, alst oueruloeyt inden Meye:

30

Daert verstant wtgheuloeyt is, ghelijck als den^† Euphrates, als hy groot is,^* ende als de Iordane inden oogst:

† Gene. 2.b.14.

* Iosue. 3.d.15

31

Wt de selue is voortghecomen de onderwijsinghe, ghelijck dat licht, ende als dat water Nilus inden Herfst.

32

Hy en is noyt gheweest, diese wtgeleert hadde, ende en sal nemmermeer worden, diese wt gronderen conde.

33

Want haren sin is rijcker dan eenige See, ende haer woort, dieper dan eenighen afgront.

34

Daer vloeyen veel Beecken van my inden Hof, ghelijckmen dat water daer binnen leydet,

35

Daer watere ick mijnen Hof, ende beghiete mijn Cruytbedde,

36

Daer worden mijne Beken tot groote wateren, ende mijne wateren worden een groote See.

37

Want mijn leeringe licht so wijdt, als den lichten Morghen, ende schijnet verre.

38

Oock ghiet mijn leeringe Prophetie wt, die eewich blijuen moet.

39

^† Daer siet ghy, dat ick niet alleen voor my en arbeyde, maer voor allen, die de wijsheyt begheeren.

† Eccli. 33.c.27.