Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiij. Capittel.

¶ Een hertelijck ghebet tot Godt, dat hy den mont ende tonge voor schadelijcke redenen ende sweeren, dat hert voor quade ende arghe ghedachten behoede: Wat schandelijck laster dat Ouerspel is.

1

⁺ DAt ic een Slot,^* voor mijnen mont conde hanghen, ende eenen vasten Seghel op mijnen mont drucken, op dat ic daer door niet te vallen en quame, ende mijne tonghe my niet en verdorue.

+ A vers 1

* Psal. 141.a.3.

2

HEERE Godt^† Vader, ende HEERE mijns leuens, en laet my niet onder de lasteraers comen, ende en laet mi niet onder haer verderuen.

† Matt. 6.b.9. 23.a.8.

3

O dat ic^* mijne ghedachten inden toom conde houden, ende mijn herte met Gods woort castijen, ende dat ick mi niet en verschoonde, waert dat ick faelgeerde,

* Iob. 42.a.2. Eccli. 43.a.4 Hebre. 4.b.13

4

Op dat ick gheen sonde aen en rechtede, ende groote dwalinge

[p. 119r]

stichtede, ende veel quaets beginghe, op dat ick niet ondergaen en dorste voor mijne Vianden, ende haer tot eenen spot werde.

5

HEERE Godt Vader, ende HEEre mijns leuens, bewaert my voor onschamel ghesichte, ende keert van mi alle quade lusten.

6

En laet my niet in gulsicheydt ende^† oncuysheyt vallen, ende behoet mi voor een onbeschaemt herte.

† 1.Cor. 6.c.18. 1.Tessa. 4.a.3

7

⁺ Lieue kinderen,^* leert den mont houden, want wien hout, die en sal hem met woorden niet vergrijpen,

+ B vers 7

* Iaco. 1.b.19. Prou. 17.d.27

8

Ghelijc als de Godloose, ende Lasteraers, ende stoute daer door vallen.

9

^* En ghewent uwen mont niet tot sweeren, ende Godts Naem te voeren.

* Exod. 20.b.7. Eccli. 27.c.17. Mat. 5.d.34.

10

Want ghelijc als een knecht, die dicwils ghegeesselt wordt, niet sonder stramen en is, alsoo en can hy oock niet reyn van sonden zijn, die dicwils sweert, ende Godts Naem voert.

11

Wie dicwils^† sweert, die sondicht dicwils, ende de plaghe en sal van zijnen huyse niet blijuen.

† Psal. 10.a.7. 109.c.18.

12

Sweert hy, ende en verstaet hijt niet, soo sondicht hy euen wel:

13

Verstaet hijt, ende veracht hijt, soo sondicht hy dubbel:

14

Maer sweert hy te vergheefs, so en is hy nochtans niet sonder sonde, zijn huys sal hardt ghestraft worden.

15

⁺ Daer is ooc eenen dootlijcken^† vloec, daer voor behoede Godt dat huys Iacobs,

+ C vers 15

† Leui. 24.b.11 2.Reg. 16.b.7

16

Ende de Godureesende vlieden sulcx, ende en besmetten haer niet met dese sonde.

17

En gewent uwen mont niet tot lichtueerdich sweeren, wandt dat coemt wt quaet voornemen.

18

19

En vergheet ws Vaders ende ws Moeders leeringhe niet: So sult ghi onder de Heeren sitten, ende ws en sal ooc niet vergeten worden, op dat ghy v niet en ghewent totter sotheyt, ende ten laetsten wildet, dat ghy noyt gheboren en waert,^† ende veruloeckt den dach uwer gheboorten.

† Iob. 3.a.1. Iere. 20.d.14

20

Wie hem ghewent tot versmaden, die en betert hem zijn leefdaghe niet.

21

Ten tweeden mael sondighen, dat is te veel, ten derden mael brengtet de straffinghe met hem.

22

^* Wie met lust ontstoken is, die is ghelijck een bernende vier, ende en hout niet op, tot dat hy hem seluen verbrant.

* Iudit. 10.d.15 12.d.15. Eccli. 9.a.9. 2.Regum. 11.a.2 13.a.2. Susan. b.8.

23

Een oncuysch mensche, en heeft geen ruste aen zijn Lijf, tot dat hy een vier ontsteect.

24

⁺ Eenen oncuysschen mensche, is alle spijse soete, ende en laet niet af, tot dat hijt volbrengt.

+ D vers 24

25

Een man die ouerspel doet, ende denckt by hem seluen:^† Wie siet my?

† Iob. 22.b.13. Ezech. 8.b.12. 9.c.9. Esaie. 29.c.15.

26

Het is duyster rontom my, ende de wanden verberghen my, soo dat my niemant en siet: Wien sal ick schouwen? De Alderhoochste en acht mijn sonden niet.

27

Soodanich een schouwet alleen der menschen ooghen, ende en denckt niet,^* dat de oogen des HEEREN veel claerder zijn dan de Sonne,

* Psal. 33.b.13 2.Par. 16.d.9 2.Mac. 9.a.5. 11.d.22. Hebre. 4.c.13 Prou. 15.a.3.

28

Ende sien al wat de menschen doen, ende sien oock inde heymelijcke hoecken.

29

Alle dinghen zijn hem bekent, eer si geschapen worden, alsoo wel, als wanneer si gheschapen zijn.

30

Die^† selue man sal openbaerlijc inder stadt ghestraft worden, ende sal ghegrepen worden, als hijt minst vermoet.

† Leuit. 20.b.10 Deut. 22.c.22.

31

32

Alsoo salt den Wijue oock gaen, die haren man verlaet, ende eenen erfgenaem van eenen anderen crijcht.

33

⁺ Ten eersten, is si den^† ghebode Gods ongehoorsaem: Ten tweeden, sondicht si teghen haren man: Ten derden, brengtse door haer Ouerspel, kinderen van eenen anderen,

+ E vers 33

† Exod. 20.c.14

34

Dese salmen wter gemeynte werpen, ende hare kinderen moeten haerder ontgelden.

35

^* Hare kinderen en sullen niet wortelen, ende hare tacken en sullen gheen vrucht voortbrenghen.

* Sapi. 3.d.16.

36

Sy laet een veruloecte ghedachtenisse achter, ende hare schande en wordt nemmermeer wtghedaen.

37

Daer de nacomelinghen aen leeren, datter niet beters en sy,

38

^* Dan Godt vreesen, ende niet soeters, dan op Gods ghebot achten.

* Eccle. 12.c.11. 4.Esd. 16.g.68. Apoc. 14.b.7.