Den Bibel, Inhoudende dat Oude ende Nieuwe Testament (Biestkensbijbel)

¶ Dat .xix. Capittel.

¶ Menigherley leere der wijsheydt.

1

⁺ EN volcht^† uwe quade lusten niet, maer breect uwen wille,

+ A vers 1

† Roma. 6.b.12 13.14.

2

Want ist dat ghi uwe quade lusten volcht, soo sult ghy v uwen Vianden selue tot eenen spot maken.

3

En zijt gheen brasser, ende en ghewent v niet tot slampampen, op dat ghy gheen bedelaer en wort, ende als ghy geen ghelt meer inden buydel en hebt, op woecker nemen moet.

4

^* Een arbeyder die hem gheerne vol suypt, die en wort niet rijcke. Ende wie een cleyntken niet te rade en hout, die neemt van daghe tot daghe af.

* Prou. 21.c.17.

5

^* Wijn ende^† Vrouwen verdwasen de Wijsen.

* Prou. 31.a.4. Gene. 19.g.32.

† 3.Reg. 11.a.1

6

Ende die den Hoeren aenhanghen, die worden wildt, ende crijghen Motten ende Wormen te loone, ende verdorren den anderen, tot een merckelijck leuen.

7

^† Wie haest gelooft, die is lichtueerdich, ende doet hem seluen (als hy hem so verleyden laet) schade.

† Iosue. 22.c.12. Pro. 14.b.15. 3.Reg. 13.c.19.

8

⁺ Wie hem verblijt, dat hy schalckheyt bedrijuen can, die wordt veracht: Maer wie sulcke onnutte Clappaerts haet, die voorcoemt schade.

+ B vers 8

9

^* Hoort ghy wat quaets, dat en segt niet nae, wandt swijghen en schadet v niet.

* Eccli. 42.b.19

10

Ghy en sullet noch uwen vrient noch Viant seggen. Ende en openbaert niet, ist dat ghyt sonder quade conscientie doen cont.

11

Want men hoort v wel aen, ende merct daer op, mer men haet v euenwel.

12

^* Hebt ghy yet ghehoort, dat laet met v steruen, soo hebt ghy een gheruste conscientie, want ghy en sulter ymmers niet af bersten.

* Eccli. 22.d.27. 27.d.24.

13

Maer een dwaes breect wt, ghelijck als een tijdich kint wt wil.

14

Als een woort in eenen Sot steeckt, soo ist effen ghelijck als wanneer eenen Pijl inde Dgie steect.

15

^* Spreect uwen naesten daerom aen, by auontueren en heeft hijt niet gedaen: Oft heeft hijt gedaen, dat hijt niet meer en doe.

* Leuit. 19.d.17 Math. 18.b.15

16

Spreect uwen naesten daerom aen, by auontueren en heeft hijt niet gesproken: Maer heeft hijt gesproken, dat hijt niet meer en doe.

17

⁺ Spreeckt uwen vrient daerom aen, want men liecht gheerne vande Lieden, daerom en ghelooft niet al wat ghy hoort.

+ C vers 17

18

Daer ontualt wel eenen een woort, ende hy en meynet doch alsoo niet:^† Want wie isser, die somtijts niet een woort en ontualt.

† Iacob. 3.a.2.

19

Spreect uwen naesten daerom aen, eer ghy met hem pocht, ende denckt op Gods gebot,

20

Want de vreese Gods, maeckt datmen wijslijck doet, in alle saken, ende Godts ghebot, leert cloeckelijc handelen in alle hanteringhe.

21

Archlisticheyt, en is gheen wijsheyt, ende der Godlooser treken, en zijn gheen cloecheyt.

22

Maer het is een boosheyt, ende Afgoderie, ende enckel dwaesheyt, ende onwijsheyt.

23

^+* Cleyne cloecheyt met Gods vreese, is beter dan groote cloecheyt met Godts verachtinghe.

+ D vers 23

* Prou. 19.a.1. 28.a.6.

24

Daer is menich scherpsinnich, ende doch een Schalc, ende can de saken drayen hoe hyse hebben wil.^† Die selue Schalc cant hooft hanghen, ende ernstelijc sien, ende het is doch enckel bedroch. Hy slaet de oogen neder, ende luystert met Schalcx ooren.

† Mat. 6.b.16.

25

Ende ist dat ghy gheen acht op hem en hebt, so sal hy v verrasschen:

26

Ende ist dat hy te swack is, om v schade te doene, so sal hy v doch, wanneer hi sinen tijt siet, aengrijpen.

27

Men sietet eenen wel aen, ende een verstandich mensche, kent den man aen zijn ghelaet.

28

Want zijn cleedinghe,^† lachen, ende ganck, ontwerpen hem.

† Eccle. 21.d.30.