Den Bibel, Inhoudende dat Oude ende Nieuwe Testament (Biestkensbijbel)

¶ Dat .xviij. Capittel.

¶ Van de wijsheyt Godts ende ordinantie zijnder wercken, die gheen Creatuere doorgronden en mach, mits dat de dagen des menschen cort zijn, Godt is lancmoedich, straft ende leert: Onderwijst ende keert weder, ghelijc als een herder zijn schaepkens, alle de ghene die onderwijs, leeringhe ende straffinghe aennemen.

1

⁺ O Hoe groot is de barmherticheydt des HEEren,^† ende laet hem ghenadich vinden, dien, die haer tot hem bekeeren.

+ A vers 1

† Esaie. 55.b.7. Iohel. 2.c.13. Ionas. 3.b.10

2

Want wat can doch een mensche zijn, aenghesien dat hy niet onsterflijck en is?

3

Wat is claerder dan de Sonne?^† Nochtans moet si vergaen,

† Iohel. 2.f.31. Mat. 24.b.29

4

Ende wat vleesch ende bloet versiert, dat is boos dinck.

5

Hy siet de onmetelijcke hoochde des Hemels: Maer alle menschen^* zijn Aerde ende stof.

* Eccle. 10.b.10.

6

Maer die eewich leeft,^† al wat die maect, dat is volcomen.

† Genes. 1.a.1.

7

De HEEre is alleen rechtueerdich,

8

^† Niemant en can sine wercken wtspreken: Wie can zijn groote wonderen begrijpen?

† Eccl. 43.d.42 Psal. 96.a.4. 145.a.5.

9

Wie can zijn groote macht meten?

10

Wie can zijn groote bermherticheyt vertellen?

11

Men canse noch verminderen noch vermeerderen, ende men en can zijn groote wonderen niet begrijpen. Maer een mensche, als hy al schoon zijn alder beste gedaen heeft, soo en ist noch nauwelijck begost.

12

Ende als hy meynt dat hijt voleynt heeft, soo faelgeret noch veel. Want wat is de mensche? Waer toe dooch hy? Wat can hy baten of schaden?

13

^+† Als hy lange leeft, so leeft hy hondert iaer. Ghelijck een droppelken waters tegen de zee, ende ghelijck als een Coornken, teghen het sant aender zee,^* so weynich zijn sine Iaren teghen de eewicheyt.

+ B vers 13

† Psal. 90.b.10.

* 2.Pet. 3.b.8.

14

Daerom heeft Godt lijdtsaemheydt met hen, ende giet zijn bermherticheydt wt ouer hen.

15

Hy siet ende weet wel, dat si alle des doots zijn moeten,

16

Daerom ontfermt hy hem dies te rijckelijcker ouer hen.

17

Eens menschen bermherticheydt gaet alleen ouer sinen naesten:^* Maer Godts bermherticheydt, gaet ouer al de werelt.^† Hy straft ende castijt, hy leert ende bewaert, ghelijck^‡ een Herder zijn Cudde.

* Exod. 20.a.6.

† 1.Regum. 2.b.6 Sap. 16.b.13. Tobie. 13.a.2.

‡ Psal. 23.a.1. Ezec. 34.b.12. Ioan. 10.a.11.

18

Hy ontfermt hem ouer alle, die haer laten onderwijsen, ende Godts woort neerstelijck hooren.

19

⁺ Mijn kint, als ghy yemanden wat goets doet, soo en maect v niet onweert, ende wanneer ghy yet gheeft, soo en bedroeft hem niet met harde woorden.

+ C vers 16

20

Den dau coelt de hitte,^* alsoo is een goet woort beter dan de gaue.

* Prou. 15.a.1. 25.c.15.

21

Ia een woort is dicwils aenghenamer, dan een groote gaue. Ende een vriendelijck mensche gheeftse alle beyde.

[p. 117v]

22

^† Maer een dwaes verwijtet eenen onhuesschelijc, ende een onvriendelijcke gaue, is verdrietelijck.

† Eccl. 42.b.18.

23

^* Leert eerst selue, eer ghy ander lieden leert. Helpt v seluen eerst, eer ghy ander lieden meestert.

* Roma. 2.c.11.

24

^† Straft v seluen eerst, eer ghy ander lieden oordeelt, soo sult ghy ghenade vinden, als ander ghestraft worden.

† Matth. 7.a.5

25

En spaert uwe boete niet, tot dat ghi cranck wordt:^* Maer betert v de wijle dat ghy noch sondigen cont. En vertrecket niet vroom te worden, ende en verbeyt niet mette beteringe ws leuens tot inden doot.

* Acto. 3.c.19.

26

Ende wilt ghy Gode dienen, so latet v ernst zijn, op dat ghy God niet en tempteert:

27

⁺ Denct op den toorne, die int eynde comen sal, ende op de wrake, als ghy daer af moet.

+ D vers 27

28

^† Want alsmen sadt is, soo salmen euen wel gedencken, datmen wederom hongheren can: Ende alsmen rijck is, soo salmen dencken, datmen wederom arm worden can.

† Eccli. 11.c.26.

29

Wandt het can voor den Auont wel anders worden, dant smorghens was, ende sulcx al gheschiet haest voor Godt.

30

Een wijs mensche, is in alle desen sorchuuldich,^† ende wacht hem voor sonden, de wijle dat hy noch sondighen can.

† Eccli. 21.a.1.

31

Wie verstandich is, die neemt sulcke wijsheyt aen, ende wiese crijcht, die looftse.

32

Wie sulcke leeringhe recht geleert heeft, die can hem wijsselijc houden, ende wel daer af spreken tot beteringhe.