Den Bibel, Inhoudende dat Oude ende Nieuwe Testament (Biestkensbijbel)

[p. 117r]

¶ Dat .xvij. Capittel.

¶ Hoe Godt de menschen geschapen ende ghemaect heeft. Hoe hy hem sinen wille ende wet gheopenbaert heeft, ende oock Israel wt alle volcken vercoren heeft.

1

⁺ MIin^† kint gheeft my ghehoor, ende leert wijsheyt, ende merct op mijn woort met ernste.

+ A vers 1

† Prouer. 1.a.8 2.a.1. 4.b.10. 5.b.7. Iob. 22.c.22.

2

Ick wil v een ghewisse leeringhe gheuen, ende v claerlijck onderwijsen.

3

^* Godt heeft van aenbeghinne zijne wercken wel gheordineert, ende eenen yeghelijcken zijn eyghen werck ghegeuen.

* Genes. 1.d.31.

4

Ende hy houtse voort ende voort in sulcker ordinantie, dat si haer officie altoos doen,

5

Ende gheen dat ander en hindere,^† maer zijn altoos sinen beuele ghehoorsaem.

† Baruch. 3.e.33

6

Voorder heeft hy oock op de Aerde ghesien, ende haer met zijne goeden veruult.

7

^* Ende maect dat Aertrijck vol dieren, de welcke weder onder de Aerde comen.

* Gene. 1.c.24.

8

^† Godt heeft den mensche gheschapen vander Aerden, ende maeckt hem weder tot Aerde,

† Genes. 2.a.7.

9

Ende stelt hen den tijt haers leuens, ende schiepse alle beyde, een yeghelijck tot zijnder aert,^* ende maectese nae zijn beelt.

* Gene. 1.d.27. Sapi. 2.d.23.

10

Hy gaf haer, dat alle dat vleesch, hen vreesen moeste, ende dat si heerschappen souden ouer de dieren ende voghelen.

11

Hy gaf haer vernuft, sprake, ooghen, ooren ende verstant ende bekentenisse,^† ende toonde haer beyde goet ende quaet.

† Gene. 2.b.16.

12

Ende heeftse voor andere dieren sonderlijck aenghesien, om haer te toonen sine groote Maiesteyt.

13

^‡ Hy heeftse gheleert, ende hen een wet des leuens ghegheuen.

‡ Deut. 4. 5. 9.

14

Hy heeft een eewich verbont met haer ghemaeckt, ende hen sine Rechten gheopenbaert.

15

^* Sy hebben met haren oogen sine Maiesteyt ghesien, ende met haren ooren zijn heerlijcke stemme ghehoort.

* Exodi. 19.c.21 20. c.18.

16

⁺ Ende hy sprack tot haer: Wacht v van alle onrecht,^† ende beual eenen yeghelijcken sinen Naesten.

+ B vers 16

† Exod. 20. 21. 22. 23.

17

Haer wesen is altijts voor hem, ende niet verborghen.

18

^* In allen Landen heeft hy heerscappie gheordineert.^† Maer ouer Israel is hy selue HEERE gheworden.

* Roma. 13.a.1.

† Deut. 4.c.20 10.c.15.

19

Alle haer wercken zijn voor hem openbaer, als de Sonne^‡ ende zijn oogen sien sonder ophouden alle haer wesen.

‡ 2.Par. 16.b.9 Psal. 33.b.13. Eccle. 23.d.27 Prou 15.a.3. Hebre. 4.c.13

20

Oock zijn hem alle haer boosheden onuerborgen, ende alle hare sonden zijn voor hem openbaer.

21

Hi bewaert de weldaet des menschen, ghelijck als eenen seghelrinck ende de goede wercken ghelijc eenen oochappel.

22

Ende ten laetsten sal hy ontwaken,^† ende eenen yeghelijcken op zijn hooft verghelden, ghelijck hijt verdient heeft.

† Iere. 17.b.10. 32.c.19. Iob. 34.b.11. Psal. 62.b.13. Roma. 2.a.6.

23

^* Maer die haer beteren, die laet hy tot genaden comen, ende die daer moede worden, die troost hy, dat si niet en vertwijfelen.

* Acto. 2.d.38.

24

^+‡ So bekeert v nv tot den HEEre, ende verlaet v sondich leuen. Bidt den HEERE, ende hout op vanden quaden.

+ C vers 24

‡ Hiere. 3.b.9 c.17. 25.a.5. 35.c.15. Ezech. 18.e.30.

25

Hout v tot den Alderhoochsten, ende keert v van onrecht, ende haet met ernste de Afgoderie.

26

^† Wie wil den Alderhoochsten louen inder Hellen?

† Psalm. 6.a.6. 30.b.10. 88.b.12. 115.b.17. Esaie. 38.d.18

27

Want alleen de leuendighe connen louen, de dooden, als die niet meer en zijn, en connen niet louen:

28

Daeromme looft den HEERE de wijle dat ghy leeft ende ghesont zijt.