Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Vander ontrouwe ende schalcheyt des rijcken vrecken. Een vermaen tot weldoen, ende der wijsheydt aen te hanghen.

1

⁺ HEt en staet eenen^* druckpenninck niet wel, dat hy rijcke is. Ende wat sal ghelt ende goet eenen vrecken hont.

+ A vers 1

* Vrecken.

2

^† Wie veel vergadert, ende hem seluen niet goets en doet, die vergaderet anderen lieden, ende andere sullent verbrassen.

† Iere. 17.b.11. Luce. 12.b.19.

3

Die hem seluen niet goets en doet, wat soude hy ander lieden goet doen? Hy en wordt nemmermeer vrolijck van sinen goede.

4

Daer en is geen schandelijcker dinc, dan dat eenen hem seluen met goets en gout, ende dat is de rechte plaghe voor zijn boosheyt.

5

Doet hy wat goet, soo en weet hy ghewisselijck daer niet af, ende wort ten laetsten onuerduldich daer ouer.

6

Dat is een boos mensce, die niet sien en mach datmen den lieden wat goets doet, maer keert zijn aensicht wech, ende en ontfermt hem niemants.

7

Een baetsoeckende mensche en laet hem met zijn deel nemmermeer ghenoeghen, ende hy en can van ghiericheydt niet ghedijen.

8

⁺ Een afgonstich mensche en siet niet gheerne eten, ende het doet hem wee, als hy te eten gheuen moet.

+ B vers 8

9

Mijn kint, doet v seluen wat goets vanden uwen,^† ende gheeft den HEERE offeren, die hem toebehooren.

† Deut. 26.b.9.

10

Gedenct, dat de doot niet en vertoeft, ende ghy weet ymmers wel, wat verbont dat ghy metter doot hebt.

11

^* Doet den vrient wat goets voor uwen eynde, ende doet den armen hantreyckinghe nae v vermoghen.

* Eccle. 4.a.4. Tobie. 4.b.5.c.13. Luce. 16.b.21.

12

^† En vergheet den Armen niet, als ghy eenen vrolijcken dach hebt, so sal v ooc de vruecht toe comen, die ghi begeert.

† 3.Esd. 9.e.52

13

Ghy moet doch v suer sweet anderen laten, ende uwen arbeyt den erfghenamen ouergheuen.

14

^* Gheeft gheerne,^† so sult ghy weder ontfanghen, ende heylicht uwe siele, want als ghy doot zijt, so hebt ghi wtgheteert.

* 2.Cor. 9.b.7

† mat. 25.d.34

15

^+‡ Allet vleesch verslijt gelijc een cleet:

+ C vers 15

‡ Esa. 40.a.6 1.Pet. 1.d.24. Iacob. 1.b.10. Psal. 90.a.6.

[p. 116v]

^* Want dat is dat oude verbont: Ghy moet steruen.

* Eccl. 8.a.8. Heb. 9.d.27.

16

Gelijck als de groene bladeren op eenen schoonen boom, sommige vallen af, sommige wassen weder, alsoo gaetet met den Lieden ooc toe,^† sommighe steruen, sommige worden gheboren.

† Eccl. 3.a.3.

17

Alle verganckelijc dinc moet een eynde nemen, ende die daer mede omgaen, die varen oock mede wech.