Den Bibel, Inhoudende dat Oude ende Nieuwe Testament (Biestkensbijbel)

¶ Dat .xv. Capittel.

¶ Van het profijt ende vrucht der wijsheyt ende vreese Gods, die doch de schalcken niet aen en nemen.

1

⁺ VVel dien^† die daer altijts met Gods woort omgaet, ende dat selue wtleyt ende leert,

+ A vers 1

† Deut. 6.a.7. Psal. 1.a.2.

2

Diet van herten ouerleyt, ende grondelijc leert verstaen, ende na de wijsheyt altijts verder verneemt, ende sluypt haer na waer datse henen gaet,

3

Ende siet tot haerder vensteren in, ende luystert voor haerder dueren, soect herberge naby haren huyse, ende rechtet zijn Hutte op, aen haerder wandt,

4

Ende is hem een goede herberge.^* Hy brengt zijn kinderen oock onder haer dack, ende blijft onder haer logie,

* Tob. 1.b.10.

5

Daer wort hy voor de hitte onder beschermt, ende het is hem een heerlijcke wooninghe.

6

Sulcx en doet niemant, dan die den HEEre vreest, ende wie hem aen Gods woort hout, die vintse.

7

Ende sy sal hem te ghemoet gaen als een moeder, ende sal hem ontfangen als een ionge Bruyt.

8

^+† Sy sal hem spijsen met tbroot des verstants, ende sal hem lauen^* met water der wijsheyt.

+ B vers 8

† Mat. 4.a.4.

* Ioan. 4.b.14 7.d.38.

9

Daer door sal hy sterc worden, dat hi vast staen can, ende sal hem aen haer houden, dat hy niet te schanden en worde.

10

^* Sy sal hem verheffen bouen zijnen naesten,^† ende sal hem zijnen mont open dien inder gemeynte.

* Ge. 41.f.40

† 2.Esd. 8.b.7 Acto. 1.c.15. 15 b.7.

11

Sy sal hem croonen met vruechden ende blijschap, ende met eenen eewighen name begiften.

12

^* Maer de Sotten en vindense nyet, ende de godloosen en connense niet te sien crijgen,

* 1.Co. 17.b.14

13

^† Want si is verre vanden hooueerdighen, ende de huychelaers en weten niet van haer.

† Sap. 1.a.4.

14

Een godloose en can niet recht leeren, want het en coemt niet van Gode,

15

Want totter rechter leere behoort de wijsheyt, so geeft Godt genade daer toe.

16

⁺ Ghy en behoeft niet te seggen: Heb ic onrecht geleert, so heuet Godt ghedaen, want wat hy haet, dat en soudt ghy niet doen.

+ C vers 16

17

Ghy en behoeft niet te segghen: Heb ick onrecht gheleert, so heeft hy my bedroghen, want hy en behoeft gheenen godloosen.

18

^* Want de HEEre haet alle Afgoderie,^† ende wie hem vreest, die wacht hem daer voor.

* Exo. 20.a.1. Sap. 14.b.9.

† Dan. 3.c.16. Tob. 1.a.6. 1.mach. 2.b.19

19

^* Hy heeft den mensche vanden beginne geschapen, ende hem den kuer gegeuen.

* Gen. 1.d.27.

20

Wilt ghy, so hout de geboden, ende doet wat hem behaecht, in recht betrouwen.

21

^† Hy heeft v Vyer ende Water voor ghestelt, grijpt tot welc ghy wilt,

† Gen. 2.b.16. Iere. 21.b.8. Deut. 11.d.26. 30. c.19.

22

De mensche heeft voor hem dat leuen ende den doot, welck hy wil, dat sal hem gegheuen worden.

23

Want de wijsheyt Gods is groot, ende hy is machtich ende siet alle dinck,

24

^† Ende zijn ooghen sien op de ghene, die hem vreesen, ende hy weet wel, wat recht gedaen oft^* huychelie is.

† Psal. 33.c.18. 34.b.16 Heb. 4.c.13.

* geueynstheit

25

Hy en beueelt niemant godloos te zijne, ende hy en consenteert niemant te sondighen.