Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ Hoe de armen haer voor de rijcke wachten sullen, ende voor de geweldighen haer verberghen.

[p. 116r]

1

⁺ VVie peck aentast, die besmet hem daer mede:^† Ende wie gheselschap heeft met den hooueerdighen, die leert hoouerdie.

+ A vers 1

† Deut. 7.a.4.

2

En maect gheen ghemeynschap met den gheweldighen ende rijcken, oft ghy ladet eenen swaren last op v.

3

Wat sal den Aerden pot, by den Metalen pot? Wandt ist dat si teghen malcanderen stooten, so breect hy in stucken.

4

De rijcke doet onrecht, ende pocht noch daer toe:

5

Maer de Arme moet lijden, ende daer toe dancken. Also lange als ghy hem nut zijt, so ghebruyct hy v: Maer als ghy niet meer en vermuecht, soo laet hy v varen.

6

De wijle dat ghi wat hebt, soo teert hy met v, ende het en becommert hem niet, dat ghy verderft.

7

Wanneer hy v behoeft, soo can hy v fijn bedrieghen, ende lacht v aen,

8

Belooft v vele, ende gheeft v de beste woorden, ende seyt:

9

Behoeft ghy wat? Ende noodet v eens oft driemael bedriechelijc te gaste, tot dat hy v om dat uwe brengt, ende spot met v int laetste.

10

Ende oft hy v al schoon in noot siet, so laet hy v doch varen, ende schut den cop ouer v.

11

Daerom siet toe, dat uwe eenuoudicheyt v niet en bedriege, ende in ongheluck en brenghe.

12

⁺ Wanneer v een gheweldich man tot hem wil trecken, soo weyghert v, soo sal hy v dies te meer tot hem trecken.

+ B vers 12

13

En dringt v seluen niet tot hem, op dat ghy niet verstooten en wort,

14

En onslatet v ooc niet te seer, datmen v ter noot ghebruycken can.

15

En weyghert v niet, ist dat hy v wat beueelt: Maer en verlaet v daer niet op, dat hy hem met v soo ghemeyn maect.

16

Wandt hy versoeckt v daer mede, ende met zijn vriendelijck ghelaet haelt hy v wt.

17

Wanneer hy onghenadich wort, so en blijftet by sulcke vriendelijcke woorden niet,

18

Ende hy en ioct niet met straffen ende geuanckenissen.

19

Daerom wacht v, ende siet wel voor v, ghy leeft in groot perijckel.

20

⁺ Een yeghelijc dier hout hem by zijns ghelijcke, alsoo sal hem oock een mensche voeghen tot zijns ghelijcke.

+ C vers 20

21

Het is^† euen als oft hem een Wolf tot den schape voechde, als een godloose met den vromen gheselschap maect.

† 2.Cor. 6.c.14.

22

Ghelijck als Hyena met den hondt ghemeynschap maect, also ooc de Rijcke met den Armen.

23

Ghelijck als de Leeu het Wilt verslint inder Heyden, alsoo verslinden de Rijcke den Armen.

24

Ghelijck als den hoouaerdighen onweert is, al wat cleyn is, alsoo is de Arme den Rijcken oock onweert.

25

Als de Rijcke vallen wil, soo helpen hem zijn vrienden op. Als de Arme valt, so stooten hem ooc zijn vrienden ter neder.

26

Wanneer een rijck man niet recht gedaen en heeft, soo zijnder vele diet glimpen. Als hy hem met woorden vergrepen heeft, soo moetment laten recht zijn.

27

⁺ Maer wanneer een arm Man niet recht ghedaen en heeft, so canment groot achten, ende al ist dat hy wijsselijck spreect soo en heeftet doch gheen plaetse.

+ D vers 27

28

^* Als de Rijcke spreect, so swijcht alle man, ende zijn woort heftmen inden Hemel:

* Psal. 73.b.9.

29

Maer als de Arme spreeckt, soo seytmen: Wie is die? Ende ist dat hy faelgeert, soo moet hijt verghelden.

30

Rijcdom is wel goet, alsmen dien sonder sonde gebruyct, maer de armoede des godtloosen leert hem veel quaets spreken.

31

Wat een inden sin heeft, dat sietmen hem aen de oogen aen, het sy goet oft quaet.

32

Heeft hy wat goets inden sin, so siet hy vrolijcken op: Maer wie met heymelijcke stucken omgaet, die en can gheen ruste daer af hebben.

33

^* Wel dien, die gheenen boosen raet en gheeft, ende gheen quade conscientie daer af en heeft.

* Psalm. 1.a.1.

34

Wel dien, die gheen quade Conscientie en heeft, ende zijn toeuerlaet hem niet ontuallen en is.