Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ Een leere hoemen hem met de vrouwen hebben sal. Oude vrienden en salmen niet verlaten, ende ander schoone leeringhe.

1

⁺ EN zijt niet ieloers van dijn vroom Wijf, want sulcken herden opsien, en brengt niet goets.

+ A vers 1

2

En^† laet den Wijue gheen macht ouer v, dat sy v Heere niet en worde.

† Eccle. 33.c.29.

3

^* Vermijdt de boelersse, op dat ghy in haren stricken niet en valt.

* Ontwijct. Pro. 2.b.16. 5.a.3. 7.a.5.

4

En gewent v niet met der Sangerinne, dat sy v niet en vanghe met hare^‡ listicheyt.

‡ Aenlocken.

5

^† En siet niet na de maechden, dat ghy niet ontsteken en wort teghen haer.

† Iob. 31.a.1.

6

^‡ En hangt niet aen de Hoeren, dat ghy niet om dat uwe en coemt.

‡ Prou. 5.b.8.

7

En gaept niet ouer al inder stadt om, ende en loopt niet door alle hoecken.

8

^* Keert dijn aensicht van schoone wijuen, ende en siet niet na de gedaente van ander wijuen.

* Mat. 5.d.28.

9

^* Want schoone wijuen hebben menigen verdwaest, ende boose lust ontsteect daer af, gelijck als vyer.

* Gen. 34.a.2. 2.Re. 11.a.4. 13.a.2. Iudit. 10.d.15

10

⁺ En sit niet by eens anders wijf, ende en omhelst v niet met haer,

+ B vers 10

11

Ende en bancketeert niet met haer, op dat v herte aen haer niet en hanghe, ende uwe sinnen niet verdwaest en worden.

12

En^* gheeft eenen ouden vrient niet ouer, want ghy en weet niet, oft ghy aen den nieuwen soo veel crijcht.

* Pro. 27.b.10. Eccl. 6.b.14. 7.b.20.

13

Eenen nieuwen vrient, is eenen nieuwen wijn: Laet hem out worden, so sal hy v wel smaken.

14

En laet v oock den godloosen niet beweghen in zijn groote eere, want ghy en weet niet hoet een eynde nemen sal.

15

En laet v der godloosen voornemen nyet behaghen, want sy en worden nemmermeer vroom tot inder Hellen toe.

16

⁺ Hout v van dien, die daer macht heeft te dooden, so en dorft ghi niet sorgen dat hi v doode:

+ C vers 16

17

Maer moet ghy by hem zijn,

[p. 115r]

soo en vergrijpt v niet, op dat hy v dat leuen niet en neme, wanneer ghy daer alderminst op vermoeyt.

18

Ende weet dat ghy onder de stricken wandelt, ende gaet op enckel hooghe^† spitsen.

† Scerpten.

19

Leert met alle neersticheyt uwen naesten kennen^‡ ende als ghy raet behoeft, so soecten by wijse lieden,

‡ Eccl. 37.b.19. Tob. 4.c.15.

20

Ende hout sprake met den verstandigen, ende recht alle dijne saken na Gods woort.

21

Hout geselschap met vrome lieden,^* ende zijt vrolijck, doch inder vreesen Gods.

* 1.Tes. 5.b.16. Phil. 4.a.4.