Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Van de rechte ende valsche vrientschap, een vermaninghe om de wijsheyt te hooren.

1

⁺ EN laet v niet te cloec duncken, alle man te straffen, op dat uwe bladeren niet en verwelcken, ende uwe vruchten niet en verderuen,

+ A vers 1

2

Ende dat ghy oock niet eens en wort ghelijc eenen dorren boom.

3

Want een sulck fenijnich mensche schadet hem seluen, ende wordt zijn Vianden eenen spot.

4

Wederomme, wie alle dinck ten besten wtleyt, die maect hem veel vrienden.

5

^† Ende wie dat beste totter sake spreeckt, van dien spreectmen wederom dat beste.

† Eccle. 20.b.13.

6

Hout v vriendelijc met alle man, maer en betrouter onder duysent nauwelijck eenen.

7

^+† En betrout gheenen vriendt, oft ghy en hebt hem bekent inder noodt.

+ B vers 7

† Mich. 7.a.5. Mat. 10.c.35. Iere. 9.a.4.

8

Want vele zijn vrienden, dewijle dat sy des genieten connen, maer inder noot en blijuen sy niet.

9

Ende daer is menich vrient, die haestelijc Viant wort, ende wiste hy een moort van v, hy seydet na.

[p. 114r]

10

^† Daer zijn ooc sommige, Tafel vrienden, ende sy en blijuen niet inder noot:

† Eccl. 37.a.13.

11

Ter wijlen dattet v wel gaet, soo is hy dijn gheselle, ende leeft in dijnen huyse recht als ware hy oock Huysheere.

12

Maer in dien dattet v qualijck gaet, so staet hy tegen v, ende en laet hem nergens vinden.

13

Ontrect v van uwe vianden, ende wacht v oock euen wel voor uwe vrienden.

14

^† Een ghetrouwe vrient is een stercke vasticheyt, wie dien heeft, die heeft eenen grooten schat.

† Pro. 27.b.10. Eccl. 9.b.12.

15

Een ghetrouwe vrient, en is met geenen gelde noch goede te betalen:

16

Een getrouwe vrient, is eenen troost des leuens. Wie Godt vreest die vercrijcht sulc eenen vrient.

17

Want wie Godt vreest, dien salt wel ghelucken met vrienden: Ende gelijc als hy is, soo sal oock zijnen vrient zijn.

18

^+* Lieue kint, laet v de wijsheyt leeren van iuecht op, soo wort van v een wijs man.

+ C vers 18

* Tren. 3.c.27. Sap. 8.a.1.

19

Stelt v tegen haer, ghelijc als die daer ackert en saeyt, ende verwacht haer goede vruchten.

20

^† Ghy moet eenen cleynen tijt om haren wille moeyte ende arbeyt hebben, maer seer haest sult ghy haerder vruchten genieten.

† Eccl. 51.d.35.

21

Sy is bitter den onghescicten menschen, ende een roeckeloos mensch en blijft niet by haer,

22

Want sy is hem eenen herden proefsteen, ende hy werpse haest van hem.

23

Sy roemen wel veel vander wijsheit, maer sy weten weynich daer af.

24

^+* Lieue kint gheeft mijnder leere gehoor, ende en veracht mijnen raet niet.

+ D vers 24

* Pro. 1.a.8. 2.a 1. 3.a.1. 4.a.1. 5.a.1.

25

Begheeft uwe voeten in haer boeyen, ende uwen hals in hare halsijseren:

26

^† Buycht uwe schouderen ende draechtse, ende en worstelt niet teghen haer banden.

† Matt. 11.c.29.

27

^† Hout v aen haer van gheheelder herten, ende blijft met alle crachten op haren wech.

† Eccle. 2.a.2.

28

Verneemt na haer, ende soectse, so sult ghyse vinden. Ende wanneer ghyse crijcht, so en laetse niet van v,

29

Want ghy sult ten eynde troost van haer hebben, ende uwen rouwe, sal v in vruecht verandert worden.

30

Ende haer boeyen sullen v een stercke vasticheyt, ende haer halsijsers een heerlijck cleedt worden.

31

Sy heeft een gulden croone met een purpuren huyue,

32

^† Dat selue cleet sult ghy aentrecken, ende de schoone croone sult ghy op setten.

† Eccle. 27.b.11.

33

Lieue kint, wilt ghy volgen, soo wort ghy wijs, ende neemt ghijt ter herten, so wort ghy cloeck.

34

Ist dat ghi geerne gehoor geeft, so sult ghyse crijgen: Ende ist dat ghy uwe ooren neyget, soo sult ghy wijs worden.

35

Sijt geerne by den Ouden, ende ist datter een wijs man is, by dien houdt v.^† Hoort gheerne Gods woort, ende aen merct de goede spruecken der wijsheyt.

† Eccle. 8.a.9.

36

Ist dat ghy eenen verstandigen man siet, tot dien gaet met neersticheyt, ende gaet alleneen met hem wt ende in.

37

^* Ouerdenct altoos Gods gebot, ende denct gestadichlijck op zijn woort, die sal dijn herte volcomen maken, ende v wijsheyt geuen ghelijck ghy begheert.

* Psal. 1.a.2. Iosue. 1.a.8.