Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Wijsheyt leert barmhertich zijn, ende vriendelijc tegen alleman: Wat belooninghe de wijsheyt den ghenen gheeft diese soecken ende beminnen.

1

⁺ EEn vernuftich mensch leert Gods woort geerne, ende wie de wijsheit lief heeft, die hoort gheerne toe.

+ A vers 1

2

^† Ghelijc alst water een bernende vier wtblust, alsoo wischt de aelmoesse de sonde wt.

† Psal. 41.a.1. Dan. 4.d.26. Matt. 5.a.7. Tob. 12.b.11.

3

Ende de Ouerste vergelder salt namaels ghedencken, ende sal hem int ongheluck beschermen.

4

^† Lieue kint, en laet den armen geenen noot lijden, ende en weest niet hert teghen den nootdruftigen.

† Ecc. 14.b.11. Deut. 15.a.7.

5

En veracht den hongerigen niet, ende en bedroeft den nootdruftigen niet in zijn armoede.

6

Een bedroeft herte en doet niet meer rouwen aen, ende geeft de gaue den nootdruftighen geringe.

7

De bede des ellendigen en ontsegt hem niet:^* Ende en keert v aensicht niet vanden armen.

* Tob. 4.b.5.

8

En keert uwe oogen niet vanden behoeftigen, opdat hy ouer v niet en clage:

9

Want die hem gemaect heeft, die verhoort zijn gebet als hy met trueriger herten ouer v claeht.

10

⁺ En weest niet kijfachtich voor tgherechte,^‡ ende hout den Rechter in eeren.

+ B vers 10

‡ 1.Pet. 2.b.17.

11

Hoort den armen gheerne, ende antwoort hem vriendelijck, ende saechtmoedelijc.

12

^* Verlost dien, dien gewelt gheschiet, van dien, die hem onrecht doet, ende weest onuerschrict, als ghy ordeelen sult.

* Esa. 1.c.17. Gen. 14.c.14 Exo. 2.b.12.

[p. 113v]

13

^‡ Hout v tegen de Weesen als een Vader, ende tegen haer Moeder, als een huysheere,

‡ 4.Esd. 1.c.20 Esai. 1.c.17.

14

So sult ghy zijn als een Sone des Alderhoochsten, ende hy sal v lieuer hebben, dan v uwe Moeder heeft.

15

De wijsheyt verhoocht hare kinderen, ende neemt die aen, diese soecken.

16

Wiese liefheeft, die heeft dat leuen lief, ende diese neerstelijc soect, die sal groote vruecht hebben.

17

⁺ Wie vaste aen haer hout, die sal groote eere vercrijghen, ende wat hy voorneemt, daer sal de HEERE gheluc toe geuen.

+ C vers 17

18

^† Wie Gods woort eert, die doet den rechten Gods dienst, ende wiet liefheeft,^* dien heeft de HEERE oock lief.

† Eccle. 1.c.17.

* Ioan. 14.c.13.

19

Wie der wijsheyt gehoor gheeft, die can ander lieden leeren, ende wie hem by haer hout^† die sal seker woonen.

† Pro. 3.c.23.

20

Wie sonder valscheyt is, die salse vercrijgen, ende zijn nacomelinghen sullen ghedijen:

21

Ende oft sy haer ten eersten anders tegen hem stelt, ende maect hem beangst ende bange, ende beproeft hem met haer Roede^† ende versoect hem met haer castijdinge,

† Iob. 1.b.12. Tob. 2.c.8. Pro. 3.b.11.

22

Tot dat sy beuint, dat hy sonder valscheyt sy,

23

So sal sy dan weder tot hem comen op den rechten wech, ende hem verblijden,

24

Ende sal hem openbaren haer heymelijcheyt:

25

Mer indien hy valsch beuonden wort, so sal si hem verlaten, so dat hy verderuen moet.

26

Lieue kint^† gebruyct den tijt, ende wacht v voor een onrechte sake,

† Rom. 12.b.11.

27

Ende en schaemt v niet voor uwe siele, dat recht te bekennen.

28

^† Want men can hem also schamen, datmen sonde daer aen doet, ende men can hem ooc also schamen, datmen genade ende eere daer af heeft.

† Mar. 8.e.38.

29

^+† En laet v geenen Persoon bewegen v tot schade, noch verschrict maken, v tot verderuinghe:

+ D vers 29

† Leu. 19.d.15. Deu. 1.c.17. 17 a.2. Pro. 24.c.23.

30

Maer bekent dat recht vrij, wanneermen de Lieden helpen sal.

31

Want door belijdinghe, wort de waerheit ende dat recht openbaer.

32

En spreect niet teghen de waerheyt, maer laet den spot ouer v gaen, ist dat ghi inder saken gefaelgeert hebt.

33

En schaemt v niet te bekennen, ist dat ghy ghefaelgeert hebt, ende en worstelt teghen den stroom niet.

34

En dient eenen Sot in zijnder saken niet, ende en siet zijne macht niet aen,

35

^† Maer strijdt voor de waerheyt tot inden doot, so sal Godt de HEEre voor v strijden.

† 1.mach. 2.f.50 Apoca. 2.b.10.

36

En weest niet gelijc die, die haer met groote woorden bieden, ende en doen doch daer niet met allen toe.

37

En weest gheen Leew in in uwen huyse, ende gheen Tyran teghen v ghesin.

38

^* Dijn hant en sal niet open ghedaen zijn om altijt te nemen, ende toeghesloten, om nemmermeer te gheuen.

* Act. 20.e.33.