Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Een leere hoe de kinderen Vader ende Moeder eeren sullen. Hoe dat de mensche ootmoedich wesen sal.

1

⁺ LIeue kinderen, geeft my uwen Vader gehoor, ende leeft alsoo, op dattet v wel ga.

+ A vers 1

2

^† Want de HEERE wil den Vader vanden kinderen geeert hebben, ende wat de Moeder den kinderen beueelt, dat wil hy ghehouden hebben.

† Eccl. 7.c.29. Exo. 20.b.12. Deu. 5.b.16. Ephe. 6.a.2. Mat. 15.a.4.

3

Wie zijnen Vader eert, diens sonde en sal Godt niet straffen,

4

Ende wie zijn Moeder eert, die vergadert eenen goeden schat.

5

Wie zijnen Vader eert, die sal ooc vruecht van zijnen kinderen hebben, ende als hy bidt, so wort hy verhoort.

6

Wie zijnen Vader eert^* die sal dies te langer leuen, ende wie om des HEEren wille ghehoorsaem is, aen dien heeft de Moeder eenen troost.

* Exo. 20.b.12. Deut. 5.c.16.

7

Wie den HEEre vreest, die eert ooc den Vader^* ende dient zijn Ouders, ende houtse voor zijne Heeren.

* Luc. 2.f.50.

8

⁺ Eert Vader ende Moeder metter daet met woorden ende verduldicheyt,^† op dat haren segen ouer v come.

+ B vers 8

† Gen. 27.d.28. 49.a.2. Heb. 11.d.20. Deu. 33.a.1.

9

Want des Vaders segen timmert den kinderen huysen: Maer des Moeders vloec trectse ter neder.

10

En bespot ws Vaders ghebreck niet, want het en is v gheen eere:

11

Want den Vader eeren, is v eyghen eere,

12

Ende v moeder verachten, is v eyghen schande.

13

Lieue kint^† besorcht uwen Vader in zijn Ouderdom, ende en bedroeft hem ymmers niet, alsoo lange als hy leeft,

† Tob. 14.d.15.

14

Ende nemet hem ten besten af, ist dat hy kintsch wort, ende en veracht hem ymmers niet, omdat ghy geschicter zijt,

15

Want der weldaet, den Vader bewesen, en sal nemmermeer vergeten worden, ende v sal goet geschieden, hoe wel dat ghy oock een Sondaer zijt,

16

Ende uwer sal gedacht worden inder noot, ende uwe sonden sullen vergaen, gelijc het ijs vander Sonnen.

17

Wie zijnen Vader verlaet, die wort gescheynt,^* ende wie zijn Moeder bedroeft die is veruloect van den HEERE.

* Deu. 27.c.16.

18

⁺ Lieue kint^† blijft geerne in leegen staet, dat is beter, dan al tgene daer de werelt na staet.

+ C vers 18

† Ro. 12.c.16.

19

^† Hoe dat ghy hooger zijt, so veel te meer verootmoedicht v, soo sal v de HEERE gonstich zijn:

† Phil. 2.a.5.

20

Want de HEEre is de Alderhoochste,^† ende doet groote dingen door de ootmoedighen.

† Iudit. 13.a.8. 1.Re. 17.f.49

21

En^* staet niet na hoogheren staet, ende en denct niet bouen v vermogen.

* Pro. 25.d.27 Rom. 12.a.3.

22

^† Maer wat v Godt beuolen heeft, dat neemt gestadelijc aen.

† Deu. 4.a.2.

23

Want het en baet v niet, dat ghi gaept na tghene, dat v niet beuolen en is:

24

Ende wat tot v Officie niet en hoort, daer laet v curioesheyt in achter,

25

Want v is alreede meer beuolen, dan ghy wtrechten cont.

26

Soodanich duncken heefter veel bedroghen, ende haer vermetenheyt heeftse ter neder gheworpen:

27

Want wie hem gheerne in perijckel geeft, die verderft daer in:

28

^† Ende eenen vermetelijcken mensche vergatet ten laesten qualijc.

† Iudit. 13.a.8. 4.Re. 19.b.10 g.37. 2.Mac. 9.a.4

29

Een vermetelijc mensche maect hem seluen veel ongelucx ende recht deen iammer na dander aen.

30

Want hoochmoet en doet nemmermeer goet, ende daer en can niet dan wat quaets wt spruiten.