Den Bibel, Inhoudende dat Oude ende Nieuwe Testament (Biestkensbijbel)

¶ Uoorreden Iesus Syrach, op zijn Boeck.

VEle ende groote lieden, hebben ons de wijsheydt wt de wet, de Propheten ende andere, die de selue nageuolcht hebben, te kennen ghegheuen. Waer af men met rechts Israel prijsen moet om haerder wijsheyt ende leeringhen wille. Daerom behooren de gene, diese hebben ende lesen, niet alleene wijs daer wt te worden, maer oock den anderen te dienen, met leeren ende met schrijuen.

Mijn Grootuader Iesus, na dien hy hem sonderlijcke beneerstichde te lesen de Wet, de Propheten ende ander Boecken meer, die ons van onsen Vaderen ghelaten zijn, ende hem daer in wel gheoeffent hadde, soo nam hy oock voor hem, wat te schrijuen, van wijsheyt ende goede seden, op dat de ghene die gheerne leeren ende cloeck wilden worden, dies te verstandigher ende gheschicter souden worden, om een goet leuen te leyden.

Daerom bid ick, dat ghijt vriendelijc aennemen ende met neersticheydt lesen wilt, ende ons ten besten afnemen, al en connen wy soo wel niet spreken, als de hooch beroemde Oratueren. Want wat inde Hebreeusche sprake gheschreuen is, dat en luydt soo wel niet, alsment in een ander sprake brengt. Niet alleene dit mijn Boeck, maer oock des Wets, der Propheten ende ander Boecken meer, luyden gheheel veel anders, als si in haer sprake ghesproken worden.

Als ic nv in Egipten quam, int achtendertichste Iaer, ter tijt des Conincks Ptholomei Euergetis, ende alle zijn leefdaghe daer in bleef, so creech ick tijt om veel goede dingen te lesen ende te schrijuen. Daerom sach ict voor goet ende nootsakelijck aen, dat ick de neersticheyt ende moeyte daer op dede, ende dit Boeck ouersettede. Ende de wijle dat ick den tijt hadde, arbeyde ick, ende dede neersticheydt daer aen, dat ick dit Boeck wt maeckte, ende aenden dach brochte, op dat ooc de vreemde (die leeren willen) haer tot goede seden gewennen, op dat sy nae de Wet des HEEREN leuen moghen.