Den Bibel, Inhoudende dat Oude ende Nieuwe Testament (Biestkensbijbel)

[p. 112v]

Ecclesiasticus. Dat Boeck Iesus Syrach.

¶ Dat eerste Capittel.

¶ Alle wijsheyt is van Godt, want den eenighen schepper alder dinghen, den Alderhoochsten, den alder gheweldichsten, is alleen wijs: Wat goet dat wt de vreese Gods coemt.

1

⁺ ALle^† wijsheyt is van Godt den HEEre, ende is by hem eewelijc.

+ A vers 1

† 3.Re. 3.b.12. 4.c.29. Iob. 28.b.13. Iaco. 1.a.5.

2

Wie heeft te voren ghedacht, hoe veel sandts datter in de See, hoe veel druppelen inden Regen, ende hoe veel daghen der wereldt worden souden ? Wie heeft te voren ghemeten, hoe hooge dat den Hemel, hoe breet de Aerde, ende hoe diepe dat de See zijn soude?

3

^† Wie heeft Godt oyt geleert, wat hy maken soude?^* Want zijn wijsheyt is voor alle dinghen.

† Rom. 11.d.34 Esa. 40.b.13. Sap. 9.b.13. 1.Cor. 2.b.16.

* Ro. 11.d.33.

4

⁺ Dat woort Gods des Alderhoochsten, is de Fonteyne der wijsheyt, ende dat eewighe ghebot, is haer spruytader.

+ B vers 4

5

Wie coste anders weten, hoemen de wijsheyt ende cloecheyt vercrijghen soude?

6

Een isser de Alderhoochste^* de Schepper alder dinghen

* Gene. 1.a.1.

7

^† Almachtich, een gheweldich Coninck ende seer verschrickelijc^‡ die op zijnen Throon sit, een heerschappende God,

† Gen. 17.a.1. 2.Hest. 2.a.2.

‡ Esaie. 6.a.1. 66.a.1. 3.Re. 22.d.19. 2.Par. 6.d.21.

8

Die heeftse door zijnen heylighen geest vercondicht,

9

^† Die heeft alle dinc te voren gedacht, gheweten ende ghemeten.

† Eccl. 23.d.29

10

Ende heeft de wijsheyt wtghegoten ouer alle zijn wercken, ende ouer alle tvleesch na zijnder ghenaden,^‡ ende gheeftse dien, die hem liefhebben.

‡ Dan. 2.c.21.

11

De vreese des Heeren, is eere ende roem, vruecht ende een schoone Croone.

12

De vreese des HEEREN, maeckt dat herte vrolijck, ende gheeft vruecht ende ghenuechte eewelijck.

13

^† Wie den HEERE vreest, dien salt wel gaen inder laester noot, ende sal eyndelijck de segeninghe behouden.

† Pro. 14.c.26.

14

⁺ Godt liefhebben, dat is de alderschoonste wijsheyt, ende wiese siet, die bemintse,

+ C vers 14

15

Want hy siet wat groote wonderen datse doet.

16

De^† vreese des HEEREN, is dat beginsel der wijsheyt, ende is inden gront des herten, alleene byden gheloouighen, ende woont alleen byden wtuercoren Wijuen, ende men vintse alleen byden Rechtueerdighen, ende gheloouighen.

† Pro. 1.a.7. 9.b.10. Psal. 111.b.10. Iob. 28.c.29.

17

De^† vreese des HEEREN, is den rechten Godts dienst,

† Eccl. 4.c.18.

18

Die bewaert ende maect dat herte vroom, ende gheeft vruecht ende blijschap.

19

^* Wie den HEERE vreest, dien salt wel gaen, ende wanneer hy troost behoeft, so sal hy gheseghent zijn.

* Psal. 111.a.2 128.a.1.

20

Godt vreesen, is de wijsheyt, die daer rijcke maeckt,^† ende brengt alle goet met haer.

† 3.Re. 3.b.11. Sap. 7.b.11.

21

Sy veruult dat gheheele huys met haerder gaue, ende alle Cameren met haren schat.

22

De vreese des HEEren is een Croone der wijsheyt,

23

Ende gheeft rijcken vrede ende Heyl.

24

Dese wijsheyt maeckt rechte cloecke lieden,

25

Ende wie aen haer vast hout, dien helptse wt, met eeren.

26

⁺ Den HEERE vreesen is de wortel der wijsheyt, ende haer tacken groeyen eewelijck.

+ D vers 26

27

^* De vreese des HEEREN,^† weert de sonde,

* Prou. 16.a.6.

† Verdrijft

28

Want wie sonder vreese is, die en behaecht Gode niet, ende zijn verbolgentheyt salt hem ter neder werpen:

29

Maer een ootmoedich mensche verwacht den tijt, die hem troosten sal.

30

Want hoe wel zijn sake eenen tijt lanck verdruct wort, soo sullen doch de vroome zijn wijsheyt prijsen.

31

^* Gods woort is den Godloosen eenen grouwel,

* Esa. 30.b.10. Iere. 11.d.21. Amos. 2.b.9. 7.b.16.

32

Want het is eenen schat der wijsheyt,^† die hem verborghen is.

† Mat. 11.c.25 1.Cor. 2.a.7.

33

Mijn sone, wilt ghy wijs worden, so leert de gheboden, so sal v Godt de wijsheyt gheuen:

34

^‡ Want de vreese des HEEREN is de rechte wijsheyt ende onderwijsinghe,

‡ Iob. 28.c.29

35

Ende^* tghelooue ende^† lijdtsaemheyt behaghen Gode wel.

* Iere. 5.a.3. Hebre. 11.b.6

† Luc. 21.b.17

36

^‡ Siet toe, dat uwe vreese Gods geen gheueynstheyt en sy, ende en dient hem niet met valscher herten.

‡ Acto. 5.a.1.

37

^* En soeckt gheenen roem byde lieden door geueynstheyt: Ende siet toe, wat ghy spreect, ghelooft ende voor hebt.

* Ioan. 5.d.41

38

Ende en^† verheft v seluen niet, op dat ghi niet en valt ende te schanden coemt,

† Luc. 12.c.29.

39

Ende de HEEre^* uwe treken openbare ende v ter neder stoote, openbaer voor de lieden,

* Acto. 5.a.3.

40

Om dat ghy in rechter vreesen Gods niet gedient en hebt, ende v herte valsch gheweest is.