Den Bibel, Inhoudende dat Oude ende Nieuwe Testament (Biestkensbijbel)

[p. 112r]

¶ Dat .xiiij. Capittel.

¶ Tobias wort weder siende, hy wert out ende sterft, ende voor sinen doot propheteert hy, ende voorseyt wat van Niniue, ende vander salicheydt ende weluaert Israels.

1

⁺ NA dat dese dingen geschiet waren, als Tobias wederom siende gheworden was, doen leefde hy noch tweenveertich iaer^† ende sach zijns Soons kinders kinderen.

+ A vers 1

† Iob. 42.c.16. Psal. 128.a.6. Gen. 50.d.22.

2

Ende als hy nv hondert ende twee Iaer out was, soo wert hy eerlijcken te Niniue begrauen.

3

Want doen hy sesenvijftich Iaer out was, doen wert hy blint, ende int sestichste Iaer, wert hy weder siende.

4

Ende heeft de tijt zijns leuens voort vrolijck ouergebracht, ende nam toe inde vreese Gods, ende sterf in goeden vrede.

5

⁺ Maer voor sinen doot, riep hy sinen Sone Tobiam tot hem, ende de seuen Ionge gesellen zijns soons kinderen,^* ende sprac tot haer: Niniue sal gheringe verstoort werden: Want dat woort des HEEREN en sal niet faelgeren.

+ B vers 5

* Nahum. 1. 2. 3. Seph. 2.c.13.

6

Maer in Meden sal alsdan noch eenen tijt lanck vrede zijn. Ende onse Broeders, die wt dat lant Israels verstroyt zijn, die sullen weder int lant comen.

7

^† Ende onse Lant, dat nv woest is, sal ouer al wederom bewoonet werden.

† Esaie. 1.a.7.

8

^* Ende dat Gods huys,^† dat verbernt wert, sal weder ghetimmert werden, Ende alle die, die Godt vreesen, sullen daer weder comen.

* 1.Esd. 3.a.4.

† 4.Regum. 25.b.9.

9

Ende de Heydenen sullen oock hare Afgoden verlaten, ende daer woonen.

10

Ende alle Heydenen ende Coningen, sullen hen in haer verblijden, ende den God Israels aenbidden.

11

⁺ So hoort nv mijn Sonen uwen Vader^* dient den HEEre inder waerheyt, ende hout v rechtschapen tot hem: Doet wat hy geboden heeft, ende leeret sulcx uwen kinderen.

+ C vers 11

* Deut. 6.c.13. 1.Regum. 7.a.7 Iosu. 24.c.14

12

^† Dat si ooc aelmoessen geuen: Datse God altijt vreesen, ende hem van gantscher herten vertrouwen.

† Tobi. 4.b.5

13

Ende lieue kinderen hoort my, ende en blijuet hier niet te Niniue: Maer als ghy uwe moeder ooc begrauen hebt, by my in een graf, soo maect v op, dat ghi van hier reyset: Want ic sie de sonde Niniue, wert daer na met haer een eynde maken.

14

⁺ Ende terstont nae zijns Moeders doot, tooch Tobias van Niniue met zijn huysvrouwe, kinderen, ende kints kinderen.

+ D vers 14

15

Ende tooch in Meden tot zijnder huysvrouwen Vader, ende tot zijnder huysvrouwen vrienden, ende vontse fraey ende gesont, in een goet gherust Ouderdom,^† ende hy droech sorge voor haer.

† Eccle. 3.b.13.

16

Ende als si storuen, so dede hy hen ooc haer oogen toe,^* Ende creech also dat gantsce erfdeel, ende alle de goeden Raguels, Ende leefde tot in dat vijfste geslachte,^† ende sach sine kinderen, ende kints kinderen.

* Tobie. 8.e.23.

† Tobie. 9.b.6. Iob. 42.c.16. Gene. 50.d.22 Psal. 128.a.6.

17

Ende als hy negenentnegentich Iaer out was, die hy inde vreese Gods vrolijck opghebracht had, doen begroeuen hem zijn vrienden.

18

^† Ende alle zijn geslachte bleef in eenen heyligen leuen ende wesen, Also datse aengenaem waren, beyde voor Gode, ende den menscen, ende alle die int lant woonden.

† Prou. 20.a.7.

¶ Eynde des Boecx Tobie.