Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ De oude Tobias looft Godt den HEEre, ende verwect oock de andere, hem te louen ende te eeren.

1

⁺ MAer de Oude Tobias dede zijnen mont op, loofde Godt ende sprack: HEEre ghy zijt een groot sterck Godt,^* ende v rijcke duert eewelijc.

+ A vers 1

* Esaie. 9.b.6. Dan. 2.g.44 4.a.2. 7.c.14. Luce. 2.c.29.

2

^† Ghy castijt ende troost weder, ghy connet inde Helle stooten ende weder wt brenghen:^‡ Vwe hant en can niemant ontloopen.

† Deu. 32.f.39. 1.Regum. 2.b.6 Sap. 16.b.13.

‡ Ionas. 1.a.3 Sapi. 16.c.15.

3

Ghy kinderen Israels louet den HEEre,^* ende prijset hem onder de Heydenen.

* Psal. 18.e.50 Roma. 15.a.9.

4

Wandt daerom heeft hy v verstroyt onder de Heydenen, die hem niet en kennen, Op dat ghi sine wonderlijcke daden soudet vercondighen, ende de Heydenen doen bekennen,^† datter gheen Almachtighen Godt en is, dan hy alleen.

† Deu. 32.f.39. Esai. 43.b.10 45.a.5.

5

Hy^‡ heeft ons gecastijt om onser sonden wille: Ende door sine goetheyt helpt hy ons weder.

‡ Iere. 31.c.18.

6

⁺ Siet, wat hy ons ghedaen heeft, ende met vreesen ende beuen, louet hem in zijne wercken: Ende prijset den genen die eewich heerschapt.

+ B vers 6

7

Ende ic wil hem ooc prijsen, in desen lande, daer wy geuanckelijck in zijn: Want hy heeft sine wonderlijcheyt ouer een Sondich volck bewesen.

8

^* Daerom bekeert v ghy Sondaers ende doet wat goets voor Godt, ende ghelouet dat hy v barmherticheyt bewijset.

* Esaie. 55.b.7. Ezech. 18.e.27 33.b.11. Iacob. 4.b.8.

9

Ende ick wil my nv van herten verblijden in Godt.

10

Looft den HEEre, ghy alle sine wtuercoren, hout daghen der vruechden, ende prijset hem.

11

^* Ierusalem ghy stadt Gods, God sal v castijden om uwer wercken wille, maer hy sal hem uwer wederom ontfermen.

* 2.Par. 6.a.6.

12

Louet den HEEre voor zijne gaue, ende prijset den eewigen God,^† dat hy uwe Hutten weder timmere.

† Psal. 147.a.2

13

Ende alle uwe geuangen weder hale, dat ghy v eewichlijc verblijden moget.^* Ghy sult als een claer schijnsel lichten. Ende aen allen eynden op Aerden salmen v eeren.

* Luce. 2.e.32.

14

^† Van verre landen salmen tot v comen, ende gheschencken brenghen.

† Esai. 60.a.4. Matth. 8.b.11 Acto. 2.a.5.

15

In v salmen den HEEre aenbidden, ende ghy sult dat Heylichdom heeten: Den grooten Naem des HEEren sullense in v aenroepen.

16

^+* Veruloeckt sullen si zijn, alle die v verachten. Verdoemt sullen sy zijn, alle die v lasteren. Ghebenedijt sullense zijn, alle die v timmeren.

+ C vers 16

* Gene. 12.a.3. Num. 24.b.9

17

Maer ghy sult v verblijden ouer uwe kinderen: Want si sullen alle ghesegent,^† ende tot den HEEre ghebracht werden.

† Esai. 66.d.20

18

^* Wel den ghenen die v lief hebben, ende die v wenschen dattet v wel gae.

* Psa. 122.b.6

19

^† Mijn siele louet den HEEre: Want de HEEre onse Godt,^* sal de stadt Ierusalems, van alle hare droeffenisse verlossen. Wel my, ist dat de ouerghebleuen van mijnen Sade, Ierusalem sien sullen in sine heerlijcheyt.

† Psal. 103.a.1. 104.a.1. 146.a.1.

* Apo. 21.a.4.

20

^* De poorten Ierusalems, sullen van Saphir ende Smaragden ghetimmert werden, Ende alle hare mueren, van edele Steenen rontsom.

* Apoca. 21.c.19 Esai. 54.b.11.

21

Met witten ende reynen Marmelsteenen sullen alle haer straten ghecassijt werden. Ende in allen straten salmen Halleluia singhen.

22

Gelouet sy God, diese verheuen heeft, Ende zijn rijcke blijue eewelic ouer haer. Amen.