Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ Als de Ionghe Tobias een weynich tijts langer vertrect om des bruylofts wille, soo wordt zijn Vader seer bedroeft, desghelijcken weent oock de moeder ende claget iammerlijck, ende en was niet te troosten, Nae langhe bidden, als Tobias de Ionghe niet blijuen en woude, soo laet Raguel sinen Swagher Tobiam reysen met sinen Wijue.

1

⁺ MAer als de Ionge Tobias om sine Bruylofts wille, langhe wt was, soo begost de Oude Tobias zijn Vader te sorghen, ende sprack:

+ A vers 1

2

Waerom mach doch mijn sone so lange wt zijn? Wat mach hem doch vertoeuen? By auontueren is Gabel ghestoruen, ende dat hem niemant dat ghelt weder gheuen en wil.

3

Ende si worden seer truerich, beyde, Tobias ende zijn huysvrouwe Hanna, ende weenden alle beyde, dat haer Soon op den bestelden tijt niet weder te huys en quam.

4

Ende zijn Moeder weende soo seer, datse haer niet en woude laten troosten, ende sprack:

5

Och mijn Sone, Och mijn Sone, Waerom hebben wi v laten reysen,

[p. 111r]

onse eenighe vruechde, onsen eenighen^† troost in onse Ouderdom, onse herte ende onse Erfghenaem? Wy hadden schats ghenoech ghehadt, al en hadden wy v niet laten wech trecken.

† Tobie. 5.d.22.

6

⁺ Ende Tobias sprack tot haer: Swijcht stille, ende weest te vreden: Onsen sone gatet (en God wil) wel: Hy heeft een goede ghetrouwe geselle met hem.

+ B vers 6

7

Maer si en woude haer niet laten troosten, ende liep alle daghe wt,^† ende sach op alle heyrstraten, daer hy henen comen soude, oft si hem erghens ghewaer worde.

† Tobie. 11.b.5.

8

Maer Raguel sprack tot zijns dochters man Tobia: Blijft by ons, ick wil een Bode henen seynden tot Tobia uwen Vader, ende hem laten weten, dattet v wel gaet.

9

Ende Tobias sprack: Ick weet, dat mijn Vader ende Moeder, nv alle de daghen ende vren rekenen, ende om mijnen twille seer becommert zijn.

10

⁺ Ende als Raguel met veel woorden Tobiam badt, ende hy het gheensins en woude toestaen, gaf hi hem Sara ouer, ende gaf hem de helft van alle sine goeden, van knechten ende Maechden, van Beesten, Kemelen, ende Runderen, ende veel Ghelts: Ende liet hem ghesont ende vrolijck van hem trecken, ende sprack:

+ C vers 10

11

^* De heylighe Enghel des HEEren sy by v op den wech, ende brenge v ghesont weder te huys, dat ghy uwe Ouders ghesont vinden moget. Ende Godt gheue dat mijne ooghen uwe kinderen moghen sien, eer dat ick sterue.

* Tobie. 5.c.20.

12

^* Ende de Ouders namen de dochter, ende custense , ende lietense van haer gaen, ende vermaenden haer, datse ymmers soude haers mans Ouders in eeren houden, als haer eyghen ouders:

* Gen. 24.g.60

13

Ende haren^† Man lief hebben: Dat huysgesin neerstich regeren, ende haer seluen onstraffelijck houden.

† Titum. 2.a.4 1.Petri. 3.a.1.