Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Op der strate aen een water, vinghen si eenen visch, vanden welcken hem de Enghel, wat te houden, beueelt, ende onderwijst hem waer toe dattet oorbaerlijck wesen sal.

1

⁺ ENde Tobias troc henen,^† ende een hondeken liep met hem. Ende nae de eerste dachreyse, bleef hy by dat water Tygris.

+ A vers 1

† Tobie 11.b.9.

2

Ende hi ghinc henen, om sine voeten te wasschen: Ende siet, eenen grooten visch schoot daer wt om hem te verslinden.

3

Voor welcken Tobias verschrickte, ende riep seer met luyder stemmen, ende sprack: O HEERE, hy wil my verslinden.

4

Ende de Enghel sprack tot hem: Grijpt hem by de kouwen, ende trect hem wt tot v.

5

Ende hy trock hem op het lant, doen huppelde hy voor sine voeten.

6

⁺ Doen sprack de Enghel: Houdt desen visch van een, dat Herte, de Galle, ende de Leuer, bewaert by v, want si zijn seer goet tot medecine.

+ B vers 6

7

Ende sommighe stucken vanden visch die brieden si, ende namense mede op den wech. Dat ander soutense voor haer, op dat zijt onderweghen souden hebben, tot dat sy quamen in de stadt Rages in Meden.

8

Doen vraechde Tobias den Enghel, ende sprack tot hem: Ick bidde v Asaria mijn broeder, dat ghy my wilt segghen, watmen voor Medecine maken can, van de stucken, die ghi my beuolen hebt te bewaren? Doen sprack de Enghel: Als ghy een stucxken van dat herte op de gloeyende colen legt, soo verdrijft de Rooc allerley boose^† spokerie, van Mannen ende van Vrouwen, alsoo, datse geen schade meer doen en can.

† Gheesten.

9

Ende de Galle vanden vissche, is goet om de ooghen daer mede te saluen, om een schelle daer mede te verdrijuen.

[p. 110r]

10

⁺ Ende Tobias sprac: Waer willen wy dan ter Herberghe trecken? Ende de Enghel antwoorde, ende sprac:^† Hier is een Man genaemt Raguel, die v becant is, van uwen gheslachte, die en heeft maer een eenighe dochter, die heet Sara, ende anders gheen kinderen meer.

+ C vers 10

† Num. 27.a.1. 36.c.6.

11

V zijn alle sine goeden toe gheschict, ende ghy sult de dochter tot een huysvrouwe nemen.^* Daeromme begheertse van haren vader, Soo sal hyse v gheuen tot een huysvrouwe.

* Tobie. 7.c.15.

12

Doen sprac Tobias: Ick heb ghehoort,^† datse alreede te voren, seuen Mannen ghegeuen is, die zijn alle doot, Ende daer toe seytmen, dat eenen boosen gheest die ghedoot heeft, daerom vreese ick, dattet my oock alsoo gaen mochte.

† Tobie. 3.b.8.

13

Soo souden dan mijne Ouders van droeffenisse steruen, nademael dat ick een eenich Sone ben.

14

⁺ Doen sprac de Engel Raphael: Hoort toe, Ick wil v segghen, ouer welcken de Duyuel macht heeft, te weten, ouer de ghene, die Godt verachten,^* ende alleen om oncuysheydt wille vrouwen nemen,^† ghelijck de onuerstandighe beesten.

+ D vers 14

* 1.Tess. 4.a.3.

† Psalm. 32.b.9

15

^‡ Mer ghy, als ghy met uwe Bruyt, in de Camer coemt, so sult ghy v drie daghen van haer^* onthouden, ende met haer bidden.

‡ Tobi. 8.b.7.

* 1.Corin. 7.a.5

16

Ende in de selue nacht als ghy de Leuer van den visch, op de gloeyende colen legt, soo sal de Duyuel verdreuen werden.

17

Maer de tweede nacht sult ghy manierlijck tot haer gaen, gelijc als de Heylighe Patriarchen. In de derde nacht, sult ghy vercrijghen, dat ghesonde kinderen van v gheboren werden.

18

Maer als de derde nacht voorby is, soo sult ghy v by de Ionckfrouwe doen, met de vreese Gods, meer wt begheerte der kinderen, dan wt boosen luste.

19

Op dat ghy ende uwe kinderen de Segheninghe vercrijcht, die dat Saet Abrahe belooft is.