Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Tobias gheeft sinen sone (doen hy meynde dat de doot hem by was) schoone leeringen ende onderwijsinghen, te leuen onstraffelijc ende Godtsalichlijck.

1

⁺ DOen nv Tobias dachte, dat zijn gebet also verhoort was, dat hy steruen soude, so riep hy sinen sone tot hem, ende sprack tot hem: Lieue sone, hoort mijn woorden, ende behoutse vast in uwe herte.

+ A vers 1

2

Wanneer Godt mijn siele sal wech nemen, so begraeft mijn Lichaem,^† ende eert uwe Moeder, alle de daghen ws leuens.

† Exod. 20.b.12 Eccle. 7.c.29.

3

Ghedenct daer aen, in hoe groote perijckel si ghestaen heeft, doen sy v onder haer herte droech. Ende alsse gestoruen is, soo begraefse by my.

4

Ende hebt Godt voor ooghen ende int herte, alle den tijt ws leuens.^† Ende wacht v dat ghy in ghene sonde en bewillicht, ende niet en doet teghen Godts ghebodt.

† Roma. 6.b.12

5

⁺ Van uwe^† goederen helpt den Armen,^* ende en keert v niet af vanden Armen: Soo sal v Godt wederom ghenadichlijck aensien.

+ B vers 5

† Tob. 14.c.12. Prou. 11.c.24 19.c.17.

* Eccle. 4.a.7

6

Waer ghy moghet, daer helpt den behoeftighen. Hebt^† ghy vele, soo gheeft rijckelijck, hebt ghy weynich, soo gheeft doch van dat weynighe met trouwer herte.

† Eccl. 35.b.18

7

Want ghy sult een recht loon vergaderen inder noot,^* Want de aelmissen verlossen van alle Sonden, ende van de doot, ende en verlaten niet inder noot.

* Tobie. 12.b.11

8

Aelmisse is eenen grooten troost, voor den Alderhoochsten God.

9

^† Wacht v mijn sone voor alle hoererie, ende en hout v by gheen ander, dan alleen by uwe vrouwe.

† 1.Tes. 4.a.3.

10

De hoouaerdie en laet noch in uwe herte,^† noch in uwe woorden heerscappien,^* wandt si is een beghin van alle verderffenisse.

† Acto. 12.d.21.

* Gene. 3.a.5. Eccle. 10.b.15.

11

^+‡ Die v ghearbeydt heeft, dien gheeft terstont sinen loon: Ende en onthouwet niemant sinen verdienden loon.

+ C vers 11

‡ Deu. 24.c.15

12

^† Wat ghy niet en wilt datmen v doe, dat en doet eenen andereen oock niet.

† Math. 7.a.12

13

^* V broot deylt den hongherigen mede, ende bedeckt den Naecten met uwen cleederen.

* Esaie. 58.b.7 Luce. 14.b.13 Mat. 25.c.35. Eccle. 7.d.35. Tobie. 1.c.17. Ezech. 18.a.7 Psal. 112.b.9. Prou. 11.c.24

14

Gheeft aelmissen van v broot ende wijn, by de begrauenisse der Vromen, Ende en eet noch en drinct niet met de Sondaers.

15

^† Soect altijt Raet byde Wijsen, ende dancket God alle tijt, ende biddet dat hy v regere, ende ghy in alle uwe voornemen sinen woorde volcht.

† Eccle. 9.c.19

16

Ghy sult oock weten mijn sone,^† dat ick thien pont Siluers, doen ghy noch een kint waert, den Gabel geleent hebbe, in de stadt Rages in Meden, ende zijn Hantschrift hebbe ick by my.

† Tobie. 1.c.15.

17

Daerom ghedenckt dat ghy by hem coemt, ende soodanich ghelt vordert, ende hem zijn Hantschrift weder gheeft.

18

Sorcht slechs niet mijn Sone, want wy zijn wel arm,^† Maer wy sullen veel goets hebben, en wy Godt vreesen,^* de sonde mijden, ende goet doen.

† Roma. 8.d.32 Prou. 15.a.6.

* Eccle. 21.a.2