Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Een hertelijc ghebet aen Godt den HEERE, in zijnder ende des volcx droeffenisse, ende gheuangenisse, van Sara Raguels dochter, ende haer ongheluck ende ghebedt.

1

⁺ DOen Wert Tobias seer suchtende, ende begost te weenen, ende te bidden, ende sprack:

+ A vers 1

2

HEEre ghy zijt rechtueerdich, ende alle uwe werck is recht, ende enckel goetheyt ende trouwe.

3

Ende nv mijn HEERE, weest my ghenadich, ende en wreeckt mijne sonde niet, ende en ghedenct niet mijne, oft mijnder vaderen misdaet.

4

Want nademael dat wy uwe gheboden niet ghehouden en hebben,^† soo zijn wy ooc onsen vianden ouergeleuert, datse ons beroouen, gheuangen houden, ende dooden,^† Ende zijn te schanden ende tot spot, ende tot een begeckinge geworden den vreemden, daer ghy ons henen verstroyt hebt.

† Deut. 28.c.25.

† Psal. 79.a.4.

5

Ende nv HEERE, verschrickelijck zijn uwe Oordeelen, nademael dat wy uwe gheboden niet gehouden, noch niet recht ghewandelt en hebben voor v.

[p. 109r]

6

Och HEEre, bewijst my ghenade,^† ende neemt mijnen gheest wech in vreden, wandt ick wil lieuer doot zijn dan leuen.

† 3.Reg. 19.a.4 Ionas. 4.a.3

7

⁺ Ende het gebuerde des seluen daechs, dat Sara een dochter Raguels, in Rages der Meden stadt, van een Maget haers vaders, oock qualijck bescheldet ende gelastert werdt,

+ B vers 7

8

^† Datse seuen Mannen nae den anderen ghegheuen was, ende een boose gheest Asmodi ghenoemt, hadse al ghedoot, alsoo gheringhe als si byslapen souden.

† Tobie. 6.c.12.

9

Daerom schelde haer de Maghet haers vaders, ende sprack: God geue, dat wy nemmermeer, een sone oft dochter van v en sien opter Aerden,

10

Ghy Man moordersche? Wilt ghy my oock dooden, ghelijc als ghy de seuen Mannen ghedoodet hebt?

11

Op sulcke woorden ghincse in een Camer, bouen int huys, ende en at, noch en dranck niet in drie dagen ende drie nachten. Ende en liet niet af met bidden ende weenen, ende badt Godt, dat hy haer van de versmaetheyt verlossen woude.

12

⁺ Daer nae op den derden dach, doense haer ghebet geeynt hadde, loofdese God, ende sprack:

+ C vers 12

13

Ghelouet sy uwen Name O HEERE, een God onser Vaderen: Want als ghy toornich zijt, soo bewijst ghy genade ende goetheyt,^† Ende in de droeffenisse vergheeft ghy de sonde, den ghenen die v aenroepen.

† Eccle. 2.b.13.

14

Tot v mijn HEEre, keere ick mijn aensichte,^† tot v heffe ick mijn ooghen op, ende bidde v, dat ghy my verlost van dese sware versmaetheyt, oft dat ghi my vander Aerden wech nemet.

† Psal. 123.a.1.

15

Ghy weet HEEre, dat ick gheenen Man begheert en hebbe, ende mijn siele reyn ghehouden, van allen boosen luste,^* ende en heb my nemmermeer tot ontuchtich ende lichtueerdich gheselscap gehouden.

* Psal. 26.a.4.

16

Maer eenen Man te nemen heb ick bewillicht, in dijne vreese, ende niet wt mijne wellusticheyt. Ende oft ick en ben haer, oft si en zijn mijns bygeual niet weerdich gheweest. Ende ghy hebt my by auontueren eenen anderen Man behouden.^† Want uwen Raet en staet niet in des menschen ghewelt.

† Esai. 40.b.13 46.b.8.

17

⁺ Maer dat weet ick voorwaer, wie Godt dienet, die wert na de aenuechtinghe ghetroost, ende van de droeffenisse verlost: Ende nae de castijnge vint hy ghenade.^* Want ghy en hebt gheenen lust aen onse verderffenisse, Wandt nae dat onweder, laet ghy de Sonne wederom schijnen, Ende^† nae dat schreyen ende weenen, begaeft ghy ons rijckelijck met vruechde. Dijnen Name sy eewich, eere ende lof, O Godt Israels.

+ D vers 17

* Ezech. 18.e.32 33.b.11. 2.Petri. 3.b.9

† Luce. 6.c.21.

18

^* In dese tijt, werdt deser beyder ghebet verhoort, vanden HEERE inden Hemel.

* Prou. 15.d.29

19

Ende de Enghel des HEEREN, die heylighe Raphael, wert wtgheseynt, dat hy haer beyde helpen soude. Nademael dat haer ghebet op eenen tijt voor den HEERE, voorghebracht was.