Den Bibel, Inhoudende dat Oude ende Nieuwe Testament (Biestkensbijbel)

¶ Dat .xix. Capittel.

¶ Ghelijck de Godtloose altijt meer ende meer sondigen, totten eynde toe, also en houdt ooc niet op den toorne Gods van haer, tot dat hyse te niet brengt, ende geheelijck wtroeyt, Maer zijn volc voert hy droochs voets door de See onghequetst. Hy ghaf haer quackelen te eten, Van die ghene die inder tijdt Lots ghestraft werden.

1

⁺ MAer de godloosen oueruiel de toornicheyt sonder bermherticheyt, totten eynde toe.

+ A vers 1

2

Want hy wist wel te vooren, wat sy noch doen souden, te weten,^* doen sy hen gheboden hadden wech te trecken, ende daer toe hem met neersticheyt, laten gheleyden, dattet hen berouwen soude, ende hen naiaghen.

* Exod. 12.e.31.

3

^† Want doen sy noch rouwe droegen, ende by den dooden grauen weenden, vielen sy op een ander dwaeslijck voornemen, dat sy veruolghen wilden, als de veldtvluchtighen, welcke sy doch met groot bidden wtghestooten hadden.

† Exod. 14.b.5

4

Maer het moeste alsoo toegaen, op dat sy tot sulcken eynde quamen, als sy verdient hadden, ende moesten vergeten, wat hen ghebuert was.

5

Op dat sy de straffinghe vercregen, die noch voorhanden was, Ende dijn volck een wonderlijcke reyse onderuonde, Maer ghene een nieuwe wijse des doots, vonden.

[p. 108r]

6

⁺ Want de geheele Creatuer, die haren eyghen aert hadde, veranderde haer wederomme, nae uwen ghebode, dien sy dient, op dat dijne kinderen onghequetst bewaert werden.

+ B vers 6

7

^* Daer was de wolcke, ende bescheen den Leger. Daer te voren water stont, daer sachmen drooch lant voortcomen.^† Daer werdt van de roode See, eenen wech sonder hindernisse, ende vanden machtigen vloet, een groen veldt.

* Exod. 13.d.21. 14.d.19.

† Exo. 14.c.21

8

Door welcke ghinck alle dat volc, dat onder uwer hant beschermt werdt, die sulcke wonderlijcke wonderen saghen,

9

Ende ghingen als Hengsten inder weyde, ende spronghen als Lammeren,^* ende loefden v HEEre, diese verlost had.

* Exod. 15.a.1.

10

Want sy dachten daer noch op, hoet hen ghegaen hadde inder Ellenden. Hoe de Aerde, voor geboren dieren, vliegen voort brachte, Ende dat water voor visschen,^* vorsschen met hoopen gaf.

* Exodi. 8.b.6. Psal. 78.e.46

11

^+† Maer ten laetsten sagen sy ooc een nieuwe aert der vogelen, doen sy lustich werden, ende om lecker spijse baden,

+ C vers 11

† Exo. 16.c.14 Num. 11.g.31. Psal. 78.c.27. Sapi. 16.a.2.

12

Want quackelen quamen hen vander See, om haren lust te boeten. Oock quam de straffinghe ouer de Sondaers, door Teekenen, die met machtige blixemen geschieden. Want het was recht, dat sy sulcx leden om haerder boosheyt wille, dewijle dat sy de Gasten qualijck ghehandelt hadden.

13

Sommighe, als die ghene quamen, die nergens henen en wisten, en namen sy de seluen niet aen, Ende sommige dwongen de Gasten, die hen wat goets gedaen hadden, tot dienste.

14

(Ende dat niet alleen, maer daer sal ooc noch een ander insien ouer hen comen, om dat sy de vreemden soo onuriendelijc handelen)

15

Ende sommighe plaechden met groote smerte, die ghene, die sy met vruechden aenghenomen, ende stadtrecht hadden laten mede gebruycken.

16

^† Maer sy werden oock met blindtheyt gheslagen (ghelijck als ghene voor der dueren des Rechtuaerdighen) met sulcken dicken duysternisse oueruallen, dat een yeghelijc den wech sochte na zijnder dueren.

† Gene. 19.c.11. 4.Reg. 6.c.18

17

⁺ De Elementen ghingen door malcanderen, gelijck als de snaren, opten Psalter, door malcanderen clincken, ende nochtans te samen luyden, ghelijckmen sulcx aen der daedt wel siet.

+ D vers 17

18

Want wat opten Lande plach te zijn, dat was int water. Ende wat int water plach te zijn, dat ghinc opten Lande.

19

Dat vyer was machtich int water, bouen zijn cracht, ende dat water vergat zijne cracht te blusschen.

20

Wederom de vlammen en verteerden dat vleesch der sterflijcker dieren niet, die daer midden onder ghingen, Ende en versmolten de onsterflijcke spijse niet die doch, gelijc als ijs, lichtelijc versmolt.

21

HEEre, ghy hebt dijn volck oueral heerlijck ghemaect, ende gheeert, ende en hebtse niet veracht, maer hen alle tijdt, ende op alle plaetsen, by gestaen.

¶ Eynde des Boecx der Wijsheyt.