Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ Hoe Godt de boose straft, de gheloouige leydet, beschermt ende onderhoudt, hoe hy haer goet doet, ende veel wonders om haeren wille werct.

1

⁺ DAeromme werden sy met der seluen gelijcken billicx gheplaecht,^* ende werden door de menichte der booser wormen, gemartelt.

+ A vers 1

* Exod. 8.e.24. Sapi. 11.c.18.

2

Tegen welcke plage, dedy dijnen volcke goet, ende bereydedet hem een selsaem spijse, te weten,^† quackelen ter neeringhe, na welcken sy lustich waren,

† Num. 11.g.31. Exo. 16.c.14. Psal. 78.c.27. 105.e.40.

3

Op dat die na sulcke spijse lustich waren, door sulcke gegeuen ende toegheschickte quackelen, oock leeren souden der natuerlijcker nootdruft af breken, Maer die andere, die een cleyne tijt commer gheleden hadden, een nieuwe spijse mede genieten souden.

4

Want het soude also zijn, dat den genen, die tyrannelijck handelden, soodanighen commer ouer comen soude, die niet op te houden en ware: Maer desen alleen een onderwijsinghe gheschieden soude, hoe hare vianden gheplaecht werden.

5

^† Voorwaer ouer dese quamen ooc boose toornige dieren, ende werden ghebeten, ende verdoruen vanden crommen slanghen,

† Num. 21.a.16

6

Nochtans en bleef den toorne eyndelijcken niet. Maer sy werden een cleyne tijdt verschrict, ter waerschouwinghe, want sy hadden^† een Heylsaem teeken, op dat sy ghedachten, aen dat ghebodt in uwer Wet.

† Num. 21.b.8. Ioan. 3.b.14.

7

⁺ Want die hen tot dat selue teeken keerden, die werden ghesont. Niet door dat, dat sy aensaghen, maer door v, alder Heylandt

+ B vers 7

8

Ende aldaer beweest ghy onsen vianden mede, dat ghy de Helper zijt van alle quaet.

9

Maer ghene werden door^† sprinchanen ende vliegen doot gesteken, ende en conden geen hulpe haers leuens geuinden, want sy warens weerdich dat sy daer mede geplaecht werden.

† Exo. 10.d.12. Psa. 105.d.34 Iohel. 1.a.4. Apoca. 9.a.3.

10

Maer uwen kinderen, en conden ooc de feninige draken tanden niet schaden, want dyne bermherticheyt was daer voor, ende maectese gesont.

11

Want sy werden daeromme also ghestraft, ende flucx weder gheheelt, op dat sy aen dijne woorden souden leeren dencken, ende niet te diep in de vergetentheyt en souden vallen, maer onafgeweynt van dijne weldaden, souden blijuen.

12

Want geen Cruyt noch Plaester en heeldese,^* maer dijn woort HEEre, dwelck alle dinc heelt.

* Psa. 107.c.20. Matt. 8.a.8.

13

^† Want ghi hebt macht, beyde ouer dat leuen, ende ouer den doot. Ende ghy leydet nederwaerts totter Hellen poorte, ende leydet weder daer wt.

† Deu. 32.f.39. 1.Reg. 2.b.6. Tob. 13.a.2.

14

Maer een mensche, ist dat hy yemanden doodet door zijne boosheyt, so en can hy den wtgheuaren gheest niet weder brenghen, noch de verscheyden siele weder halen,

15

^+† Maer het is onmogelijc, uwer hant te ontulieden,

+ C vers 15

† 2.mac. 6.d.26. Psal. 139.a.8. Amos. 9.a.2. Iona. 1.a.3.

16

Want de Godloosen, die v niet kennen en wilden, zijn door dijnen machtighen Arm ghegeesselt,^* doen sy door onghewoonlijcken Regen, Hagel ende Water, dien sy niet ontgaen en conden veruolcht, ende doort vyer verslonden werden.

* Exod. 9.e.23 Psal. 78.e.47 105.d.32.

17

Ende dat was dat alder wonderlijckste, dattet vyer alder meest int water bernde, welck doch alle dinck wt bluscht,

18

Want de Wereldt streedt voor de rechtuaerdighen. Somtijts matichde haer de vlamme, op dat sy ymmers de dieren niet verbranden en soude, die onder de godloosen ghesonden waren, Maer dat sy selue sien moesten, hoe sy door Gods oordeel, alsoo veruolcht werden.

19

Maer somtijdts brande de vlamme int Water, bouen de macht des vyers, op dattet de onrechtuaerdighe soude verdoen.

20

^+† Daer en tegen voedde ghy uwe volc met Enghelspijse, ende seyndet hen be-

+ D vers 20

† Exo. 16.a.4 4.Esdr. 1.c.19 Deut. 8.a.3. 2.Esd. 9.d.20 Psal. 78.c.24 105.e.41. Ioan. 6.d.31.

[p. 107r]

reyt broodt vanden Hemel, sonder arbeyt welc vermocht alderley lust te geuen, ende was eenen yeghelijcken na synen smake euen

21

(Want ist datmen op v wacht, dat maect dijnen kinderen openbaer, hoe soet dat ghy zijt) want een yegelijc maecte daer af, wat hy wilde, daer na als hem lust aen quam, sus ofte soo te smaecken.

22

^† Daer en bouen bleef ooc de Sneeu ende Hagel int vyer, ende en versmolten niet, op dat sy beuonden, dat dat vyer, dat ooc inden Hagel bernde ende inden Reghen blixemde, der Vianden vruchten verdorf.

† Exodi. 9.e.23.

23

Dat selfde vyer, op dat hen de Rechtuaerdigen souden gheneeren, soo moestet zijn eyghen cracht vergheten.

24

Want de Creatuer, die v als den Schepper, dient, is heftich totter plage ouer de onrechtuaerdighen. Ende maticht haer totter weldaet ouer die, die v betrouwen.

25

⁺ Daer omme liet sy haer, oock op dat mael, in alderley veranderen, ende diende inder gaue, welcke alle gheneerde, na eens yegelijcx wille, gelijck hijt behoefde.

+ E vers 25

26

Op dat dijne kinderen souden leeren, die ghy HEEre lief hebt,^* dat niet de ghewasschen vruchten den Mensche geneeren,^‡ maer dat dijn woort die onderhout die aen v gheloouen.

* Deut. 8.a.3. Matt. 4.a.4

‡ Iere. 15.c.16.

27

Want dat gene dat vant vyer niet verteert en wert, dat wert slechs van eenen cleynen schijn der Sonnen werm, ende versmolt.

28

Op dattet kenlijck soude worden, datmen v, eer de Sonne opgaet, dancken soude, ende voor v treden, als tlicht op gaet.

29

Want eens ondanckbaren hope, sal ghelijck als den Rijm inden winter vergaen, ende als een onnut water, verulieten.