Den Bibel, Inhoudende dat Oude ende Nieuwe Testament (Biestkensbijbel)

¶ Dat xv. Capittel.

¶ De vroome ende gheloouige hebben op Godt acht, sy en laten haer met den Beelde niet verleyden. Maer diese maken, liefhebben, daer op hopen, haer eeren, die zijn alle des doots weerdich.

1

⁺ MAer ghy onse Godt,^* zijt vriendelijck, ende^† trou, ende lancmoedich, ende regeert alle dinck met barmherticheyt.

+ A vers 1

* Psal. 106.a.1. 107.a.1. 118.a.1.

† 1.Cor. 1.a.8. 10.b.13. 1.Tess. 5.c.24 Exo. 34.a.6. Psal. 103.a.8. Ionas. 4.a.2

2

Ende oft wy alschoon sondighen, soo zijn wy doch uwe, ende kennen uwe macht. Dewijle wy dan sulcx weten, soo en sondighen wy niet, want wy zijn voor den uwen gherekent.

3

^‡ Maer v te kennen, is een volcomen gerechticheyt: Ende uwe macht te weten is een wortel des eewighen leuens.

‡ Ioan. 17.a.

4

Want ons en verleyden also niet, der menschen boose vonden, noch der Schilders onnutten arbeyt,

5

⁺ Namelijck, een bont Beelt, met menigerley verwe, welcx ghedaente den onuerstandigen arghert. Ende die gheerne quaet doen, die hebben ooc haren lust, aen dat leuenloose ende doode Beelt.

+ B vers 5

6

Sy zijn oock sulcker vrucht weerdich, beyde diese maken, begheeren, ende eeren.

7

^* Ende een potbacker, die dat weecke leem met moeyte bearbeyt, maect alderley vaten, tot onsen gebruycke. Ende hy maect van eenderley leem, beyde vaten, die tot reyne, ende oock die tot onreyne wercken, dienen. Maer waer een yeghelijck van de selue toe ghebruyct sal worden, dat staet byden potbacker.

* Rom. 9.c.21. Esa. 45.a.9. Iere. 18.a.3.

8

Maer dat is eenen ellendighen arbeyt, als hy van dat selue leem eenen ydelen Godt maect. So hy doch selue niet langhe te

[p. 106v]

voren,^† van Aerde gemaect is, ende ouer een cleyne tijt,^‡ daer weder toe coemt, daer hy af genomen is, als de siele, die hy gebruyct heeft, van hem ghenomen wort.

† Gene. 2.a.7.

‡ Gen. 3.c.19.

9

⁺ Maer zijn sorghe en staet daerop niet dat hy arbeyde, noch dat hy sulck een cort leuen heeft, maer dat hy met den^† goutsmeden ende siluersmeden, inde weddinghe arbeyde, ende dat hijt den Copergieters na doen mach. Ende hy houtet voor eenen roem, dat hy valschen arbeyt maect.

+ C vers 9

† Esa. 44.b.12 46.a.5.

10

Want zijns herten ghedachten zijn ghelijck als asschen, ende zijn hope minder dan Aerde, ende zijn leuen verachter dan leem.

11

Dewijle dat hy dien niet en kent, die hem gemaect, ende hem de siele, die in hem werct, inghegoten,^* ende den leuendighen Adem, ingheblasen heeft.

* Gene. 2.a.7.

12

Sy houden ooc dat menschelijcke leuen voor eenen schimp, ende dat menschelijcke wesen, voor een Iaermerckt. Gheuen voor, men moet oueral, gewin soecken, ooc door boose stucken.

13

Dese weten voor allen, dat sy sondigen, als sy sulcke broossche dinghen ende Beelden, van Aertsch leem maken.

14

⁺ Maer sy zijn duller ende ellendigher dan een kint (namelijck de Vianden ws volcx, diese onderdrucken)

+ D vers 14

15

Dat sy alderley Afgoden der Heydenen, voor Goden houden,^* der welcker oogen niet en sien, noch hare nuesen windt haelen, noch hare ooren hooren, noch de vingeren aen hare handen voelen en connen^† ende hare voeten gantsch traech zijn om te wandelen.

* Psal. 115.a.5. 135.c.15. Apoc. 19.c.20.

† Sap. 13.d.19 Iere. 10.a.5.

16

Want een mensch heeftse ghemaect, ende die den Adem van eenen anderen heeft, die heeftse gebeelt, maer een mensche en can ymmers niet maken, dat hem ghelijck sy, ende nochtans effen wel een Godt sy.

17

Want dewijle dat hy sterflijck is, soo maeckt hy vrijelijck eenen dooden, met zijne godloose handen. Hy is ymmers beter dan dat, dien hy Gods dienst doet, want hy leeft doch, maer ghene nemmermeer.

18

^* Daer toe eeren sy ooc, de alder schendichste dieren, welcke, ist datmense tegen anderen onuernuftighen dieren houdt, soo zijn sy veel snooder.

* Histo. vanden draeck. Roma. 1.c.23.

19

Want sy en zijn niet lieffelijck, gelijc als ander dieren, die fijn aen te sien zijn, Ende zijn van Godt noch gelouet noch gesegent.