Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Noch vander dwaesheyt, der geender die de Afgoden eeren, ende vander macht ende wijsheyt Gods. Van de straffinghe der beeldemakers ende diese eeren, Ende waer wt inden beghinne de Beelden opghecomen zijn. De eere der Beelden is een oorsake van alle boosheyt, ende beghin ende eynde.

1

⁺ DEs gelijcken doet ooc die daer schepen wil, ende door periculose vloet denckt de varen, ende^† roept een veel snooder hout aen, dan dat Schip is, daer hy op vaert.

+ A vers 1

† Ionas. 1.a.5.

2

Want dat selue is geuonden, om neringe daermede te soecken, ende de meester heeftet metter Conste bereydet.

3

Maer uwe voorsichticheyt, O Vader regeertet.^* Want ghy gheeft ooc inder See weghen, ende midden onder de baren, sekeren loop.

* Exo. 14.d.22.

4

Daer ghy mede bewijst, hoe ghy aen allen eynden helpen cont, oft hem oock alschoon yemant sonder Schip inder See gaue.

5

Nochtans de wijle ghy niet en wilt, dat dat ghene ledich ligge, wat ghy door uwe wijsheyt geschapen hebt: So geschietet dat de menschen haer leuen, oock sulcken slechten hout betrouwen, ende behouden worden int Schip, daer si door de baren der See mede varen.

[p. 106r]

6

⁺ Want ooc in voortijden, doen de hoomoedige Ruesen verdaen werden, doen vloden die, aen welcken een hope bleef, de werelt te vermeerderen,^† in een Schip dwelck uwe hant regeerde, ende lieten also der werelt saet na.

+ B vers 6

† Gen. 7.b.7.

7

Want sulcken hout is der segeningen wel weerdich, daermen recht mede handelt.

8

Maer des vloecx weerdich is dat, dat metten handen ghesneden wort^† so wel als de ghene, diet snijt. Dese daerom dat hijt maect, ghene daerom dattet Godt ghenoemt wordt, soot doch een verganckelijck dinck is.

† Deu. 27.b.15.

9

^‡ Want Godt is al beyderley gelijcke Viant, den Godloosen ende zijn Godloos wesen.

‡ Psal. 5.a.5.

10

Ende dat werck sal tsamen met den meester ghequelt worden.

1[11]

Daerom worden ooc de Afgoden der Heydenen besocht, want sy zijn wt der Creature Gods, tot eenen grouwel, ende tot eender argernisse der menschen siele, ende tot eenen stricke, den onuerstandigen, geworden.

12

Want^† Afgoden oprichten, is de alder grootste hoererie: Ende de selue versieren, is een schadelijc exempel int leuen.

† Iere. 2.c.17. 3.a.4. Ezec. 16.b.16.

13

Van aenbegin en zijn sy niet gegeuen, sy en sullen ooc niet eewich blijuen,

14

Maer door ydel eere der menschen, zijn si inde werelt ghecomen, ende daerom versiert, dat de menschen van een cort leuen zijn.

15

⁺ Want een Vader, als hy ouer zijnen sone, die hem al te vroech wech genomen wert, rouwe ende smerte droech, liet hy een Beelt maken, ende begoste, dien, die een doot mensche was, nv voor eenen Godt te houden, ende stichtede voor den zijnen eenen Gods dienst ende offer.

+ C vers 15

16

Daer na metter tijt, wert soodanighe Godloose wijse, voor een recht ghehouden^* datmen oock Beelden moeste eeren wt der Tyrannen ghebot.

* 3.Re. 12.e.28. Dan. 3.b.6. 1.mac 1.d.43.f.57. 2.mach. 6.a.8

17

Des seluen gelijcken, welcke de Lieden niet en conden voor haren ooghen eeren, daerom dat sy te verre woonden, der seluer aensichten lieten sy wt verre landen wtschilderen, ende maeckten een prijselijc Beelt des heerlijcken Conincx, Op dat sy met neersticheyt den afwesenden, als den tegenwoordigen pluymstrijcken mochten.

18

Ende de Constenaer dreef oock eergiericheyt, den onuerstandighen sulcken Gods dienst te stercken.

19

Want wie den Vorst wel dienen wilde, die maecte dat Beelt met alder Const, opt alder fijnste.

20

Maer den hoop, die door sulcken fijnen maecsel, aengheloct wert, begonst den ghenen voor eenen Godt te houden, die corts te voren voor eenen mensche gheeert was.

21

Wt sulcken quam de bedriegerie inde werelt, als den Lieden yet herts ouer quam, oft den Tyrannen ghelieuen wilden, so gauen sy den steenen ende houte sulcken naem, die doch den seluen niet toe en coemt.

22

⁺ Daer na en lieten sy hen daer aen niet genoegen, dat sy in Gods kennisse dwaelden,

+ D vers 22

23

Maer hoe wel sy in een wilt ende bijster wesen der onwijsheyt, leefden, soo noemden sy doch sulcken Crijch ende quaet, vrede.

24

^* Want sy verworghen dier een, hare kinderen ten offer, oft sy hanteren Gods dienst, die niet te seggen en is, oft houden woedige brasserien, na ongewoonlijcke wijse, ende en hebben voorder, noch een reyn wesen, noch een reyn houwelijck.

* Deu. 12.d.31 18.b.9. Ezec. 20.d.31. Iere. 7.d.30. 19.a.5. 4.Re. 16.a.3. 17.c.17. 21.a.6

25

Maer^† deen vermoort den anderen met list, oft quelt hem met ouerspel.

† Prou. 1.b.18. Iere. 7.a.9. 9.a.2. 23.b.10.

26

Ende daer gaet by hen door malcanderen bloet vergieten om,^‡ moort, dieuerie, valscheyt, bedroch, onghetrouwicheyt, pochen,^* meyneedicheyt, onrust der vroomen, ondanckbaerheyt, der iongher herten ergernisse, stomme sonde, bloetschanden, ouerspel, onsuyuerheyt.

‡ Iere. 7.a.9. Rom. 1.d.29.

* Iere. 7.a.9. Mala. 3.a.5. 1.Tim. 1.b.10.

27

Want den schandelijcken Afgoden, dienen, is alder boosheyt beghin, oorsake ende eynde.

28

Houden sy vierdaghen, soo doen sy, recht als waren sy ontsinnich,^* Propheteren sy, so ist enckel luegen, Sy en leuen niet recht,^† sweren lichtelijc valsche Eeden.

* Iere. 27.b.10. Ezech. 13.a.6.

† Iere. 5.a.2.

29

Want dewijle dat si geloouen, aende leuenloose Afgoden, so en sorghen sy voor gheen schande, als sy valschelijck sweeren.

30

Nochtans sal al beyderley recht ouer hen comen. Beyde des, dat sy van Godt niet recht en houden, dewijle sy op de Afgoden achten, Ende des, dat sy onrecht ende valschelijc sweeren, ende en achten niet heylichs.

31

Want der onrechtuaerdiger boosheyt neemt een eynde, niet na dat ghewelt, dat sy hebben, als sy sweeren, Maer nader straffinghe, die sy verdienen, met haren sondighen.