Den Bibel, Inhoudende dat Oude ende Nieuwe Testament (Biestkensbijbel)

¶ Dat .xj. Capittel.

¶ Hoe de wijsheyt de gherechtighe drijft, ende leydet, Ende hoe de godloosen van de geweldige hant Gods ghestraft worden.

1

⁺ SI voerde der seluen wercken, door de hant des heylighen Propheets,

+ A vers 1

2

^† Ende leydese door een wilde Woestijne, dat sy Tenten opsloegen inde Woestijne,

† Exodi. 19.a.1. Psa. 136.b.16.

3

Ende haren Vianden wederstonden, ende hen wreecten aen haren wederpartien.

4

^† Doen si dorst hadden, riepen sy v aen, ende hen wert water ghegeuen wt den hooghen steen, ende leschten den dorst wt eenen herden steen.

† Exod. 17.b.6. Num. 20.b.11. Psal. 78.b.15. 105.e.41. 2.Esdr. 9.d.20 4.Esd. 1.c.20.

5

Ende euen daer door hare Vianden geplaecht werden, daer door geschiede hen goet, doen sy noot leden.

6

Want ghelijck als ghene voor den bloede verschrickt werden, dat inden plaetse des vlietende waters quam, tot een straffinghe des ghebots, datmen de kinderen dooden moeste:

7

Also gaeft ghy desen waters de volheyt onuersiens, ende gaeft daermede te verstaen, door ghener dorst, hoe ghy de wederpartien plaechde.

8

Want doen dese^† geproeft, ende met ghenade ghecastijt werden, bekenden sy, hoe de Godloosen met toorne gheoordeelt ende ghequelt worden.

† Deut. 8.a.2.

9

⁺ Deze hebt ghy voorwaer, als een Vader vermaent ende gheproeft:

+ B vers 9

10

Maer gene, als een streng Coninck, gestraft ende verdoemt.

11

Ende beyde die daer by waren, ende die niet daer by en waren, werden gelijck geplaget.

12

Want daer quam dubbel verdriet ouer hen, daer toe oock suchten, als sy des voorgaenden ghedachten.

13

Want doen sy hoorden, dat desen daer door goet geschiede, door welck sy gequelt werden, voelden sy den HEERE.

14

Want dien sy voortijts verachtelijc verstooten ende verworpen hadden, ende hem belachten,

15

Dies moesten si hen ten laetsten, doent daer henen quam, verwonderen, dat haren dorst so niet en was, gelijc der Rechtuaerdiger.

[p. 105r]

16

⁺ Also oock voor de dulle ghedachten, haers onrechtuaerdigen wesens,^† door de welcke sy bedroghen, onuernuftighe Wormen, ende verachtelijcke dieren, aenbaden, seynde ghy onder hen de volheyt der onuernuftigher dieren ter wrake.

+ C vers 16

† Sap. 12.e.24.

17

Op dat sy bekenden, dat soo waer yemant mede sondicht, dat hy daermede oock gheplaecht wort.

18

^† Want het en faelgeerde uwer Almachtiger hant niet (die de werelt gheschapen heeft, wt een onghedaen wesen) ouer hen te seynden, hoopen der Beyren, oft vrijmoedighe Leeuwen,

† Leui. 26.d.22. Sapi. 16.a.1. Iere. 8.c.14.

19

Oft van nieus gheschapen, geringe onbekende dieren, oft die daer vyer spogen, oft met grammen roocke bliesen, oft dien grouwelijcke voncken wt den ooghen stouen.

20

Welcke hen niet alleen met quetsinge, en conden te niet maken, maer oock wel met haer veruaerlijck ghesichte, verworgen.

21

Ia sy conden wel sonder dat, door eenen eenighen Asem vallen, met wrake veruolcht, ende door den gheest uwer cracht verstroyt worden.

22

⁺ Maer ghy hebt alle dinck gheordineert met mate, ghetal ende ghewichte: Want groot vermoghen is altijt by v,^† ende wie can der macht ws Arms wederstaen?

+ D vers 22

† Iudit. 16.c.18. 2.Hest. 2.a.4.

23

Want de werelt is voor v, ghelijck als dat tongesken aender wage, ende als een druppel des morgendaus, die op de Aerde valt.

24

Maer ghy ontfermt v ouer alle dinck, want ghy hebt macht ouer alle dinck,^† ende siet metter menschen sonden door de vingeren, om dat sy hen beteren souden:

† Rom. 2.a.4. Acto. 17.f.30. 2.Pet. 3.c.15.

25

Want ghy hebbet al lief, wat daer is, ende en haet niet wat ghy ghemaect hebt. Want ghy en hebt gewisselijck niet bereyt, daer ghy eenen haet toe hadt.

26

Hoe conde yet blijuen, als ghy niet en woudet? Oft hoe conde dat bewaert worden, dat ghy niet ontboden en hadt?

27

Maer ghy spaert alle dinghen, want sy zijn uwe HEEre,^* ghy liefhebber des leuens, ende uwen onuerganckelijcken geest^† is in allen.

* Ezech. 18.e.32 33.b.11.

† Sap. 1.a.7.