Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ Wat profijts ende goets wt der wijsheyt den menschen aenstaende sy.

1

⁺ DE selue Wijsheyt bewaerde dien,^† die ten alder eersten gemaect, ende alleen geschapen wert, tot eenen Vader der werelt,^* ende brachten wt zijnder sonde,

+ A vers 1

† Gene. 1.d.27. 2.b.7.

* Gene. 3.c.15.

2

Ende gaf hem cracht, ouer alle dinck te heerschappen.

3

Van welcke, doen de onrechtuaerdige afuiel door zijnen toorne, verderf hy,^† van weghen der boslijcker moort zijns Broeders.

† Gene. 4.b.8.

4

^† Ende als de Aerde om desseluen wille, metter Diluuie verdoruen was, holp de wijsheyt wederom, ende regeerde den Rechuaerdigen, door een slecht houdt.

† Genes. 6. 7. 8.

5

Die selue, doen de Heydenen ghelijck inder dolinghe booslicken leefden^* vant sy den Rechtuaerdighen, ende onderhielt hem onstraffelijck voor Gode. Ende liet hem vast zijn, teghen dat Vaderlijcke herte, teghen den Sone.

* Gene. 11.d.31. 12.a.1. 4.Esd. 3.b.13.

6

⁺ Die selue, verloste den Rechtuaerdigen^† doen de Godloosen verghinghen, doen hy vloot voor den vyere, dat op de vijf steden viel:

+ B vers 6

† Gen. 19.e.24. Luca. 17.d.29 4.Esd. 2.b.8.

7

Welck verwoeste Lant noch rooct, tot een ghetuychenisse der boosheyt, tsamen metten boomen, die onrijpe vruchten draghen, ende der^† Sout Columne, die daer staet tot een ghedachtenisse der ongeloouigher sielen,

† Gene. 19.e.26 Luce. 17.d.32.

8

Want de ghene, die de wijsheyt niet en achten, en hebben niet alleen de schade, dat sy dat goet niet en kennen, maer laten oock den leuendigen een ghedachtenisse achter, dat sy niet en connen verborghen blijuen, in tgene, daer sy in dolende ghegaen hebben.

9

Maer de wijsheyt verlost de ghene wt alder moeyte, die hen aen haer houden.

10

^* Die selue leyde den Rechtueerdigen, die voor zijns Broeders toorne vlieden moste, op stracken wege, ende toonde hem dat Rijcke Gods, ende gaf hem te kennen wat heylich is. Ende holp hem in zijnen arbeyt,^* dat hy wel toenam, ende veel goets van zijnen arbeyt creech.

* Gen. 28.b.10.

* Gen. 30.g.42

11

Ende was by hem,^† doen hy bedroghen wert vanden ghenen, die hem ghewelt deden.

† Genes. 31.a.6.

12

Ende maecte hem seker voor den genen, die hem laghen leyden: Ende ghaf hem ouerwinninge in eenen stercken camp, Op dat hy onderuonde, dat de Godsalicheyt machtiger is, dan alle dinck.

13

⁺ Die selue en verliet den^† vercochten Rechtuaerdighen niet, Maer bewaerde hem vander sonde. Sy daelde met hem neder inden Kercker,

+ C vers 13

† Gen. 37.e.26. Acto. 7.b.9.

14

^* Ende inden banden en verliet sy hem niet. Tot dat sy hem toebrachte den Scepter des Conincrijcx, ende de Ouerheyt ouer de ghene, die hem ghewelt ghedaen hadden. Ende maecte die tot luegenaers, die hem boose daet toegeleyt hadden, ende ghaf hem een eewighe heerlijcheyt.

* Genes. 41.f.40. Psal. 105.c.21. 1.Mac. 2.f.53.

15

Die selue verloste dat heylige volck, ende onstraffelijcke saedt, vanden Heydenen,^* diese plaechden.

* Exodi. 1.b.11.

16

Sy^‡ voer inde siele des dienaers des HEEREN, ende wederstont den grouwelijcken Coningen, door wonderen ende teeckenen.

‡ Exod. 3. 4. 5. 7. 9.

17

⁺ Sy beloondet den Heylighen haren arbeyt, ende leydese door wonderlijcke weghen,^* Ende was hen des daechs een beschuttinghe, ende des nachts een vlamme ghelijck als de Sterren.

+ C vers 17

* Exod. 13.d.21. Psa. 105.e.39. 1.Cor. 10.a.1.

18

Sy voerdese door de Roode See, ende leydese door groote wateren.

19

Maer hare Vianden verdranck si, ende tooch dese wten gront der diepten.

20

Daerom namen de Rechtuaerdighen roof vanden Godloosen,^† ende presen uwen heylighen Naem HEERE, ende loefden eendrachtelijck uwe ouerwinnende hant.

† Exod. 14.e.21 Psal. 78.b.13. 106.b.9. Iudith. 5.c.13. Exod. 15.a.1. Psa. 106.b.12.

21

Want de wijsheyt opende der stommen mont, ende maecte der onmondiger tonghen, wel sprekende.