Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ Een ghebet tot Godt, om de gaue der wijsheyt.

1

⁺ O Godt mijnder Vaderen,^† ende HEEre alder goedertierenheyt,^* ghy die alle dinck door v woort gemaect,

+ A vers 1

† 3.Reg. 3.b.7.

* Genes. 1.a.1.

2

Ende den mensche door uwe wijsheyt, bereydet hebt,^* Dat hy heerschappen soude, ouer de Creatuere, die van v ghemaect is,

* Gene. 1.d.28. Psalm. 8.b.7.

3

Dat hy de werelt regeren soude, met heylicheyt ende gherechticheyt, ende met gherechter herten oordeelen.

4

Gheeft my de wijsheyt die alleneen rontom uwen throon is, ende en verwerpt my niet van uwen kinderen.

5

Want^† ick ben v knecht, ende uwer Maerten sone, een swack mensche ende van corten leuen ende te cleyn int verstant des Rechts ende Wets.

† Psal. 86.c.16. 116.c.16.

6

Ende ofter alschoon een onder den menschen kinderen, volcomen ware, so en ghelt hy doch niet, indien hy sonder de wijsheyt is, die van v coemt.

7

Ghy hebt my vercoren^† tot eenen Coninc ouer v volck, ende tot eenen Richter ouer uwe sonen ende dochteren.

† 1.Par. 29.b.5. 2.Para. 1.a.1.

8

⁺ Ende ghy hiet my eenen, Tempel timmeren op uwen heylighen Berch, ende eenen Altaer inder stadt uwer wooninghen, die daer ghelijck ware, der heyligher Hutten, welcke ghy in voortijden liet bereyden.

+ B vers 8

9

Ende met v uwe wijsheyt die uwe wercken weet,^† ende daer by was, doen ghy de werelt maecte, ende kent, wat v wel behaghet, ende wat recht is in uwe gheboden.

† Prou. 8.c.27. Ioan. 1.a.2. Gene. 1. 1.Ioan. 1.a.1. Collos. 1.b.15.

10

Seyntse af, van uwen heyligen Hemel, ende wt den Throone uwer heerlicheyt. Seyntse, dat sy by my sy, ende met my arbeyde, Op dat ick kenne wat v wel behaghet,

11

Want sy weet alle dinck, ende verstaetet. Ende laetse my matelijck leyden in myne wercken, ende my behoeden, door hare heerlicheyt.

12

Soo sullen v mijne wercken aengenaem zijn, ende sal v volck recht oordeelen, ende weerdich zijn des throons mijns Vaders.

13

^† Want wat mensche weet Gods raet? Oft wie can dencken wat Godt wil?

† Esai. 40.b.13. Rom. 11.d.34 1.Cor. 2.b.16. Eccle. 1.a.3.

14

Want der sterflijcker menschen ghedachten, zijn mislijc, ende onse aenslagen zijn periculoes.

15

Want het sterflijcke lichaem beswaert de siele, ende de Aertsche Hutte, onderdruct den verstroyden sin.

16

^† Wy en kennen dat naulijcx, dat op Aerden is, ende vinden swaerlijcken, dat ons

† 4.Esd. 4.c.21 1.Cor. 2.b.14.

[p. 104v]

onder de handen is. Wie wil dan ondersoecken, dat inden Hemel is:

17

Wie wil uwen raet onderuinden? Het en sy dan dat ghy wijsheyt geeft, ende seynt uwen heyligen gheest wt der Hoochten,

18

Ende also dat doen op Aerden recht worde, ende de menschen leeren wat v welbehaghet, ende door de wijsheyt salich worden.