Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Een vermaninghe aen de Regenten ende Ouersten, dat sy doch op de wijsheyt acht hebben. Oock van tlof ende profijte der wijsheyt.

1

⁺ ONgherechticheyt verwoest alle Landen, ende een quaet leuen stoot de stoelen der gheweldighen om.

+ A vers 1

2

^† So hoort nv ghy Coninghen, ende mercket, leeret ghy Rechters op Aerden.

† Prou. 8.b.15.

3

Nemet ter ooren ghy die ouer velen heerschapt, ghy die v verheft ouer de Volcken.

4

^† Want v is de Ouerheyt ghegheuen vanden HEEre, ende dat ghewelt vanden Alderhoochsten, welcke vraghen sal, hoe ghy handelt, ende vereysschen wat ghy ordineert.

† Roma. 13.a.1.

5

Want ghy zijt zijns Rijcx Officiers. Maer ghy en bedient uwe Officie niet fijn, ende en hout gheen recht, ende en doet niet na dien, dat de HEERE gheordineert heeft.

6

Hy sal gantsch grouwelijcken, ende corts ouer v comen, Ende daer sal een gantsch scherp oordeel ouer de Ouerheeren gaen.

7

^+† Want den slechten geschiet genade: Maer de Gheweldighe sullen gheweldelijck ghestraft worden.

+ B vers 7

† 1.Pet. 5.a.5.

8

Want die, die daer alder HEERE is,^‡ en sal niemants persoone ontsien, noch de macht schouwen. Hy heeft beyde de cleyne ende groote ghemaect, ende sorcht voor allen ghelijck.

‡ Deu. 10.d.17. 2.Par. 19.b.7 Iob. 34.c.19. Eccli. 35.b.22. Acto. 10.e.34. Roma. 2.b.11. Galla. 2.a.6. Ephe. 6.b.9. Collo. 3.c.25. 1.Pet. 1.b.17.

9

Maer ouer de machtighe, sal een sterck oordeel ghehouden worden.

10

Met v Tyrannen spreke ick, op dat ghy wijsheyt leert, ende dattet v niet en faelgere.

11

Want soo wie heylige leeringhe heylichlijck behout, die wort heylich ghehouden, Ende soo wie de selue wel leert, die sal wel bestaen.

12

Soo laet v nv mijne redene wel behaghen, begeertse ende laet v leeren.

13

Want de wijsheyt is schoone, ende onuerghanckelijck, ende laet haer gheerne sien van dien, diese lief hebben.

14

^† Ende laet haer vinden van dien, diese soecken. Ia sy ghemoet, ende gheeft haer seluen te kennen, den ghenen diese gheerne hebben.

† Prou. 8.b.17. Matt. 7.a.7.

15

Wiese gheerne gheringhe hadde, die en bederft niet veel moyten, Hy vintse voor zijnder dueren, op hem wachtende.

16

⁺ Want na haer te haecken, dat is de rechte cloecheyt, Ende

+ C vers 16

[p. 103v]

soo wie nae haer wacker is, die en derf niet langhe sorghen,

17

Want sy gaet rontsom, ende soeckt wie haerder weerdich is, ende verschijnt hem ghewillichlijcken onderweghen, ende heeft acht op hem, dat sy hem te ghemoet come.

18

Want wie hem gheerne laet onderwijsen, daer is gewisselijcken der wijsheyt beghinsel.

19

Ende soo wiese acht,^† die laet hem gheerne onderwijsen, soo wie hem gheerne laet onderwijsen, die hout hare geboden.

† Prou. 9.a.8.

20

Ende so waermen de gheboden houdt, daer is ghewisselijck een heylich leuen.

21

Ende soo wie een heylich leuen leydt, die is Gode gantsch na.

22

Soo wie nv lust heeft totter wijsheyt, dien maect sy tot eenen Heere.

23

Wilt ghy nv,^* ghy Tyrannen inden volcke, gheerne Coningen ende Vorsten zijn, so hout de wijsheyt in eeren, op dat ghy eewelijck heerschapt.

* Num. 27.d.18 2.Re. 14.c.17 3.Reg. 3.a.13.

24

Maer wat de wijsheyt is, ende van waer sy coemt, dat wil ick v vercondigen, ende wil v de heymelijcheyt niet verberghen, Maer vereysschen van aenbeghin der Creaturen, ende wilse openbaer te kennen gheuen, ende en wil der waerheyt niet sparen.

25

Want ick en wil met de venijnighe nidicheyt niet te doen hebben, Want die selue en heeft niet aen de wijsheyt.

26

Maer als der Wijsen veel is, dat is der werelt Heyl. Ende een cloeck Coninck, is des Volcx gheluck.

27

Daerom laet v onderwijsen door mijne woorden, dat sal v profijtelijck zijn.