Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Vanden lof ende profijte der duechden, vander schande der godtloosen, wat eeren dat weert sy een eerlijck goduruchtich ouder, ende vanden schandelijcken doot der Godtloosen.

1

⁺ MAer de Rechtueerdighe, oft hy schoon al te tijtlijck sterft,^* soo is hy doch inde ruste,

+ A vers 1

* Sapien. 3.a.3 Esai. 56.c.14 Apoc. 14.d.13

2

(Want den ouderdom is eerlijck, niet die lange leeft, oft veel Iaren heeft,

3

Cloecheyt onder de menschen, is dat rechte grauwe hayr, ende een onbeulect leuen, is den rechten ouderdom)

4

Want^† hy behaget Gode wel, ende is hem lief, ende wordt wech ghenomen, wt den leuen onder de Sondaren,

† Gene. 5.b.24 4.Reg. 2.b.11 Ecc. 44.b.16 Hebreo. 11.a.5

5

Ende wordt wech gheruct, op dat de boosheyt zijn verstant niet om en weynde, noch de valsche leere, sine siele bedrieghe.

6

Want de boose exempelen verleyden, ende verderuen eenen dat goede,^† ende de aenlockende lust, verkeert ontschuldige herten.

† 2.Petri. 2.c.18

7

Hy is haest volcomen geworden, ende heeft veel Iaren veruult.

8

Wandt zijne siele behaecht Gode, daerom haest hi hem met hem wt den boosen leuen.

9

⁺ Maer de Lieden, diet sien, en achtens niet, ende en nement niet ter herten, te weten, dat de heylighen Godts, in ghenade ende bermherticheyt zijn, ende dat hy een opsien op sine wtuercorene heeft.

+ B vers 9

10

Want de ghestoruen Rechtuaerdige verdoemt de leuende Godloosen, Ende een die daer Ionck is, ende haest volcomen wort, dat langhe leuen, des onrechtueerdighen.

11

Sy sien des Wijsen eynde wel, mer si en mercken niet wat de HEEre ouer hem bedenct, ende waerom hyen bewaert.

12

Sy sient wel, ende en achtens niet.^† Want de HEEre belachtse, ende sullen daer nae schandelijcken vallen, ende eenen smaet zijn onder den dooden eewelijck.

† Psalm. 2.a.4 37.b.13. 59.b.9. Prou. 1.c.26.

13

Ende hy salse onuersiens ter neder stooten, ende salse wt den gront werpen, dat si gantschelijcken daer neder ligghen, ende si sullen in angste zijn, ende hare ghedachtenisse sal verloren zijn.

14

Ende si sullen comen versaecht metter conscientien haerder sonden,^† ende hare sonden sullense onder de oogen schelden.

† 4.Esd. 16.g.66.