Den Bibel, Inhoudende dat Oude ende Nieuwe Testament (Biestkensbijbel)

Sapientia Dat Boeck der Wijsheyt.

¶ Dat eerste Capittel.

¶ Een vermaninge der Ouersten totter wijsheyt, de gheest des wijsheyts hatet valscheyt ende Hypocrisie, straft de ongherechticheyt ende de quade clappaerts.

1

⁺ HEbt de^† Gerechticheyt lief, ghy Regenten op Aerden, ghedencket dat de HEERE helpen can, ende vreest hem met ernste.

+ A vers 1

† Esai. 56.a.1. 3.Reg. 3.a.9.

2

^† Want hy laet hem vinden van dien, die hem niet en temteren, ende verschijnt dien, die hem niet en mistrouwen.

† 1.Par. 15.a.4

3

Maer roekeloos goetduncken, is verre van Godt. Ende als de straffinge coemt, so bewijst sy, wat ghene voor Sotten geweest zijn.

4

Want^† de wijsheyt en coemt niet in een boosachtige siele, ende en woont niet in een Lijf, der sonde onderworpen.

† Eccli. 15.b.12.

5

Want de heylighe gheest,^* die daer recht leert, vliet de Afgodisschen, ende wijct vanden roekeloosen, welcke gestraft worden met de sonden, die ouer haer verhanghen worden.

* Ioan. 14.c.26 1.Ioan. 2.d.27.

6

Want de wijsheyt is soo vroom, dat sy den Lasteraer niet onghestraft en laet. Want Godt is een getuyghe ouer alle ghedachten,^* ende kent alder herten conscientien, ende hoort alle woort.

* Iere. 17.b.10.

7

^† Want der werelt Rinck is vol vanden geest des HEEren, Ende die de redene kent, die is ouer al.

† Esaie. 6.a.3. Iere. 23.d.24. Acto. 7.f.49.

8

⁺ Daerom en can die niet verborghen blijuen, die dat onrecht spreect,^* Ende dat recht dat hem straffen sal, en sal zijnder

+ B vers 8

* 3.Re. 2.g.44.

[p. 102r]

niet faelgeren.

9

Want des Godloosen aenslaghen moeten voort Gerichte,^* ende zijne redenen, moeten voor den HEEre comen, dat zijn onduecht gestraft worde.

* Hebr. 4.b.12.

10

Want der ijuerighen oor hoort alle dinck, ende dat spotten der lasteraers en sal niet verborghen blijuen.

11

Soo hoedet v nv voor dat schadelijcke lasteren, ende onthout de tongen van dat vloecken.^† Want dat ghy heymelijcken met malcanderen inde ooren spreect, en sal soo slecht niet henen gaen, want de mondt,^* die daer liecht, doodet de Siele.

† Lucas. 12.a.2.

* Leuit. 19.b.11.

12

⁺ En staet so niet na den doot, met uwe dwalinghe,^† ende en worstelt so niet nae de verderffenisse, door uwer handen werck.

+ C vers 12

† Deut. 4.c.16.

13

Want God en heeft den doot niet ghemaect,^* ende en heeft ghenen lust aen de verderffenisse der leuendighen.

* Ezech. 18.e.32. 33.b.11.

14

Maer hy heeft alle dinck gheschapen, dattet int wesen zijn soude.^† Ende soo wat inder werelt gheschapen wordt, dat is goet, ende daer en is niet schadelijcx in.

† Gene. 1.d.31. Eccli. 40.a.6.

15

Daer toe en is der hellen Rijck niet op Aerden (want de gherechticheyt is onsterffelijc)

16

Maer de Godloosen worstelen daer na, beyde, met woorden ende met wercken. Want sy houden^† hem voor eenen vrient, ende varen daer henen, ende verbinden hen met hem, want sy zijns oock wel weert, dat sy zijns deels zijn.

† Dat is den doot.